1 Miu pajiko sèku sasue Ama ètu sorga mi dedha èdhi! Te sasue Na kapai titu kèna, toke Na dedꞌe nare èdhi jꞌajꞌi ana-ana Nèngu. Lèke si! Te ngaa dhèu dhu mamuri madhutu dadꞌèi rai-haha, reꞌa boe, na, èdhi se cee, lula rèngu tadhe boe Ama Lamatua.✡Yohanis 1:12

2 Ana-ana pasue! Èdhi jꞌajꞌi le ana-ana Ama Lamatua, te ngaa teꞌa tare mèka, bèli-camèdꞌa èdhi jꞌajꞌi sèmi ngaa sa. Dhu teꞌa, sèmi neꞌe ka: bèli-camèdꞌa ropa Kristus mai hari, èdhi jꞌajꞌi sama sèmi Nèngu kahèi, lula èdhi ladhe tèdhi Nèngu iia-iia. 3 Dhèu aaꞌi-aaꞌi dhu tatae mamai Kristus, tatu ra pamèu mamuri rèngu, sèna ka mamuri ra mola-mèci sama sèmi Kristus. 4 Sasala aaꞌi-aaꞌi ra ka dhu sisu paredha Lamatua. Nèti èèna ka, dhèu aaꞌi-aaꞌi dhu tao sala, sisu paredha Ama Lamatua aa palabꞌa dènge Ne. 5 Miu meꞌa le, peka na, Kristus jꞌajꞌi dhèu rai-haha sèna ka saku eele sasala-sasigo èdhi. Nèngu bisa tao jꞌara èèna, lula Nèngu mesa Na tao nèdhi boe sasala.✡Yohanis 1:29 6 De dhèu dhu mamuri paꞌèki taruu dènge Ne, mamuri heka dènge tao sala. Te ngaa ladhe dhèu loe boe adꞌu-ue sasala, sasoa na, nèngu tadhe boe aa paꞌèki boe dènge Kristus.

7 Ana-ana pasue! Baku lèke tipu. Te dhèu dhu mamuri madhutu ngaa dhu lèke, nèngu dhèu dꞌara mola èci èèna ka dènge Kristus. 8 Te ngaa dhèu dhu mamuri adꞌu-ue sasala, jꞌajꞌajꞌi ra nèti dhèu aae nidhu. Te dhèu aae nidhu ne, baki nèti bhabhelu-katubꞌa karèi nèti uru jꞌara ka. Nèti èèna ka, Ana Ama Lamatua mai ho dhedhe palaho bhabhelu nèti dhèu aae nidhu.

9 Dhèu dhu jꞌajꞌi le ana Lamatua mamuri heka tao sala, lula Lamatua dhu pea le ètu dꞌara nèngu. Nèngu bisa heka adꞌu-ue sasala taruu, lula jꞌajꞌajꞌi na nèti Lamatua. 10 Dènge jꞌara neꞌe, èdhi bisa tadhe mèu, cee ka dhu jꞌajꞌi nèti Lamatua, aa cee ka dhu mai nèti dhèu aae nidhu. Te dhèu dhu madhutu boe jꞌara dhu lèke, aa dhu sue boe aꞌari na, sasoa na, jꞌajꞌajꞌi na nèti boe Ama Lamatua.

11 Karèi nèti uru ka, miu tadèngi le lii moa dhu peka na, “Pasue èci dènge èci!”✡Yohanis 13:34 12 Miu sanèdꞌe era lii lolo Kaen dènge Habel, si? Baku tao madhutu Kaen, te nèngu ne dhèu bhelu-katubꞌa, ka nèngu pamadhe ari na, Habel. Nga tao ka nèngu tao sèmi èèna? Lula Kaen tao jꞌara-jꞌara dhu bhelu, te ngaa ari na tao jꞌara-jꞌara dhu mola.✡Lii Lolo dhu Uru Tèka 4:8

13 Aꞌari aaꞌi-aaꞌi! Baku malaa ladhe dhèu dhu madhutu dadꞌèi rai-haha dꞌèi boe miu. 14 Èdhi teꞌa le dhu peka na, dhèu dhu mamuri ètu dꞌara sasala, ladhe madhe, nèngu cèri eele nèti Ama Lamatua. Te ngaa, lula èdhi pasue dènge aꞌari èdhi, èèna jꞌajꞌi mi tadha, peka na, ropa èdhi madhe, èdhi mamuri taruu dènge Lamatua. Te, ladhe dhèu aaꞌi-aaꞌi dhu mamuri dènge boe sasue, bèli-camèdꞌa madhe, na, rèngu pakajꞌèu nèti Ama Lamatua.✡Yohanis 5:24 15 Te dhèu dhu sue boe aꞌari na, nèngu cakaraa dènge dhèu dhu pamadhe dhèu. De meꞌa le, na, dhèu dhu sèmi sèra sa, abhu boe mamuri taruu dènge Ama Lamatua. 16 Èdhi bisa teꞌa conto sasue dhu lèke nèti Kristus. Te Nèngu sue èdhi, ka soro ngiꞌu Na, sèna ka madhe gati èdhi. Nèti èèna ka, èdhi hudꞌi soro ngiꞌu èdhi kahèi bagi aꞌari èdhi. 17 Ladhe abhu dhèu dhu unu dꞌai, nèdhi aꞌari na ca dhèu dhu mamuri susa, te ngaa na tao boe madha-dhilu mi dhèu susa ne, na, tasamia ka nèngu peka na, “Jaꞌa sue Ama Lamatua!” Lèke boe!

18 Ana-ana pasue! Baku dhoka sue ètu hèbꞌa di, te ngaa tao jꞌara dhu beꞌa, ho padꞌelo sasue dhu lèke. 19 Te, ladhe èdhi padꞌelo sasue dènge adꞌu-ue jꞌara dhu beꞌa sèmi èèna, èdhi teꞌa, na, èdhi abhu mamuri dhu lèke. Dènge sèmi èèna, èdhi madhaꞌu heka, aa èdhi bisa doa kètu ropa èdhi ara lati asa madha Ama Lamatua. 20 Masi ka dꞌara iiki èdhi galaa èdhi lula-nèti jꞌara dhu lèke boe dhu èdhi adꞌu-ue uru èèna, èdhi madhaꞌu ia ka. Te rasa kasia Ama Lamatua kapai risi nèti rasa kasia èdhi. Aa Nèngu dhu neꞌa aaꞌi mèu-mèu kahèi.

21 Ana-ana pasue! Ladhe dꞌara iiki èdhi galaa boe èdhi, na, èdhi bisa bani aa makae boe, ropa èdhi ara lati asa madha Ama Lamatua. 22 Lula èdhi tao madhutu paredha Lamatua, aa pakarejꞌe dꞌara Na, nèti èèna ka èdhi bisa abhu ngaa aaꞌi-aaꞌi dhu èdhi manèngi nèti Nèngu. 23 Lii paredha Na sèmi neꞌe ka: parcaya taruu Ana Na Yesus Kristus, dhu Nèngu pua mai. Aa baku loe pasue èci dènge èci, sama sèmi lii paredha Yesus.✡Yohanis 13:34, 15:12, 17 24 Dhèu dhu tao madhutu lii paredha Ama Lamatua sèra, mamuri na paꞌèki dènge Ne, aa Ama Lamatua paꞌèki dènge ne kahèi. Èdhi teꞌa, na, Ama Lamatua ètu dꞌara èdhi, lula Roh Na mamuri ètu dꞌara èdhi.