5
1 Dhèu parcaya aaꞌi-aaꞌi dhu peka na, Yesus, tareꞌa-reꞌa Kristus dhu Ama Lamatua pua mai, dhèu sèra jꞌajꞌi le ana-ana Ama Lamatua. Te dhèu dhu sue ca dhèu ama, tatu sue ana na kahèi. 2 Ladhe èdhi sue Lamatua, aa sabꞌa madhutu paredha Na, èèna peka na, èdhi sue ana-ana Lamatua kahèi. 3 De ladhe èdhi sue Nèngu, èdhi hudꞌi tao madhutu ku paredha Na sèra. Aa paredha Na bia boe.✡Yohanis 14:15 4 Èdhi dhu jꞌajꞌi le ana-ana Lamatua, bisa segi dadꞌèi rai-haha ne, lula èdhi parcaya Ne. 5 Te dhèu dhu segi dadꞌèi rai-haha, nuka dhèu dhu parcaya, peka na, Yesus, Ana Ama Lamatua.
Parcaya Yesus, gaguna na ngaa?
6 Sadꞌi miu meꞌa, na, Yesus, dhèu rai-haha kahèi, aa Nèngu ne, Kristus kahèi dhu Ama Lamatua hia mai asa rai-haha ne. Lodꞌo Nèngu neo pakako sasabꞌa-laꞌa Na, Yohanis sarani Ne pake èi. Èle èèna ka, Nèngu madhe aa pasuti raa Na kahèi. De dhu lèke ka, mesa boe èi di dhu Yohanis pake sarani Nèngu, te ngaa raa Na dhu suti eele èèna dhu kabꞌua risi. Te Roh Ama Lamatua mesa Na ka dhu peka sèmi èèna, aa dhu neꞌa boe leko-monya. 7 Te abhu tèlu jꞌara dhu jꞌajꞌi sakasii:*Abhu Alkitab dhu suri tabha, peka na, [“(7b) ètu sorga, nuka Ama, Lii Holo-Nori, dènge Roh Mola-Mèci. (8a) Ka tèlu jꞌara se, jꞌajꞌi mi èci. Aa abhu tèlu jꞌara dhu jꞌajꞌi sakasii ètu rai-haha,”]. Aa te ngaa, lii seꞌe abhu boe ètu dꞌara sasuri lii Yunani uru tèka. Lii seꞌe ra suri tabha ètu èci-dua Alkitab leo, karèi nèti abad ka-14. 8 nuka Roh Lamatua, èi dhu Yohanis pake sarani Yesus, aa raa Yesus unu Na. Tèlu jꞌara seꞌe ka, padꞌelo ca jꞌara dhu sama lula-nèti Yesus. 9 Ladhe dhèu rai-haha ka jꞌajꞌi sakasii, na, èdhi bisa parcaya ne. Risi-risi hari ladhe Ama Lamatua unu Na ka dhu jꞌajꞌi sakasii lula-nèti Ana Nèngu unu Na. Aa te ngaa tèlu jꞌara seꞌe dhu Ama Lamatua pake, ho jꞌajꞌi mi tadha dhu peka na, Yesus mesa boe dhèu rai-haha biasa di, te ngaa Nèngu ne Kristus kahèi. 10 Dhèu dhu parcaya Ana Ama Lamatua, sasoa na, dhèu ne sèmi nare le Lii Holo-Nori Lamatua, lula-nèti Ana Na. Te ngaa dhèu dhu lèka boe Lamatua, nèngu nuka sèmi dhèu dhu padhai lii, peka na, “Ama Lamatua leko-monya!” Dènge jꞌara neꞌe, nèngu sèmi boe Lii Holo-Nori Lamatua lula-nèti Ana Na. 11 Isi nèti Lii Holo-Nori Lamatua nuka sèmi neꞌe: Lamatua hia le èdhi mamuri dhu lèke, toke dꞌai mia-mia. Aa èdhi abhu mamuri ne, lula èdhi parcaya Ana Na.✡Yohanis 3:36 12 De dhèu dhu paꞌèki dènge Ana Ama Lamatua abhu mamuri toke dꞌai mia-mia dènge Ne. Te ngaa dhèu dhu paꞌèki boe dènge Ana Ama Lamatua, abhu boe mamuri sèmi èèna.
Nga tao ka Yohanis suri sasuri ne?
13 Jaꞌa suri madha jꞌara seꞌe aaꞌi-aaꞌi hia miu dhèu parcaya Ana Ama Lamatua, sèna ka meꞌa mèu, na, miu unu mamuri toke dꞌai mia-mia.
Yohanis suri tabha jꞌara-jꞌara sabajꞌa
14 Ladhe èdhi sabajꞌa mi Ama Lamatua, sadꞌi èdhi manèngi ngaa èèna ka madhutu dadꞌèi Na, èdhi bisa teꞌa tareꞌa-reꞌa, na, Nèngu tadèngi lii manèngi èdhi sèra. 15 Aa ladhe èdhi parcaya tareꞌa-reꞌa sèmi èèna, èdhi teꞌa kahèi, na, èdhi abhu ngaa-ngaa dhu èdhi manèngi nèti Ama Lamatua.
16 Ladhe èu mèdhi aꞌari mu tao sala dhu nèti boe mamadhe, beꞌa risi èu sabajꞌa sèna ka Ama Lamatua soru-bara aꞌari èu èèna ho na abhu sodꞌa. Aꞌabhu jaꞌa sèmi neꞌe ka: abhu sasala dhu nèti boe dhèu asa dꞌara mamadhe. Abhu kahèi sasala dhu nèti dhèu asa mamadhe. Te ngaa jaꞌa pua boe miu ho sabajꞌa ladhe abhu sasala sèmi èèna. 17 Tatao karehe aaꞌi-aaꞌi, sala ètu madha Ama Lamatua. Te ngaa abhu kahèi sasala dhu nèti boe mamadhe.
Yohanis pasanèdꞌe hari jꞌara-jꞌara dhu kabꞌua risi
18 Dhèu dhu paꞌèki le dènge Ama Lamatua, mamuri heka tao sala, te Ana Ama Lamatua dhu ladhe-leru ne. Aa dhu bhelu-katubꞌa bisa boe segi ne kahèi.
19 Èdhi teꞌa, na, èdhi kapua ètu dꞌara Ama Lamatua. Te ngaa èdhi teꞌa kahèi, na, dhu bhelu-katubꞌa dènge koasa ho ator dhèu aaꞌi-aaꞌi ètu rai-haha ne.
20 Èdhi teꞌa, na, Ana Ama Lamatua mai le, sèna ka hia èdhi teꞌa mèu jꞌara seꞌe, ho èdhi bisa tadhe mèu Ama Lamatua dhu tareꞌa. Limuri ne, èdhi bisa mamuri pabeꞌa dènge Ne, lula èdhi mamuri dꞌara èci dènge Ana Na, Yesus Kristus. Te Yesus Kristus èèna, tareꞌa-reꞌa Lamatua kahèi.†Sasuri Lii Yunani suri, peka na, “Ama èèna, θεός (theos, nuka Allah).” Aa “Ana Na, Yesus Kristus, θεός (theos, nuka Allah) kahèi.” Aa Nèngu ka hia dhèu abhu mamuri toke dꞌai mia-mia laꞌe.
21 Ana-ana, ee! Jꞌaga paie-iie mamuri miu. Mage abhu dhu seti eele ho gati Ama Lamatua nèti dꞌara miu.
Dꞌai sange neꞌe ka.
Nèti jaꞌa, Yohanis
*5:7 Abhu Alkitab dhu suri tabha, peka na, [“(7b) ètu sorga, nuka Ama, Lii Holo-Nori, dènge Roh Mola-Mèci. (8a) Ka tèlu jꞌara se, jꞌajꞌi mi èci. Aa abhu tèlu jꞌara dhu jꞌajꞌi sakasii ètu rai-haha,”]. Aa te ngaa, lii seꞌe abhu boe ètu dꞌara sasuri lii Yunani uru tèka. Lii seꞌe ra suri tabha ètu èci-dua Alkitab leo, karèi nèti abad ka-14.
†5:20 Sasuri Lii Yunani suri, peka na, “Ama èèna, θεός (theos, nuka Allah).” Aa “Ana Na, Yesus Kristus, θεός (theos, nuka Allah) kahèi.”