3
Paulus pamaꞌète sèna ka Timotius laꞌe asa Tesalonika
1-2 Sèna ka miu meꞌa, ca hari ni jiꞌi kako tèke eele miu èèna, madhutu boe dadꞌèi jiꞌi. Jiꞌi neo ae le dhiu paraga dènge miu, te ngaa bisa mèka. Lula jiꞌi ngoꞌo heka mate panèbhu, hèia jiꞌi pamaꞌète le ho pua Timotius dhiu. Te ngaa jaꞌa dènge Silas pea ètu kota Atena. Timotius ne aꞌari jiꞌi. Nèngu ne angalai jiꞌi ètu dꞌara sasabꞌa-laꞌa, dhu bera-bera pakako Lii Lolo Beꞌa Lamatua Yesus. Jiꞌi pua na dhiu, ho na ajꞌa miu aa paꞌèra dꞌara miu, sèna ka miu asa parcaya èra Ama Lamatua.✡Lii Lolo nèti Dhèu Pajuu-paleha 17:15 3 Dènge jꞌara neꞌe, ladhe miu paraga dènge sasusa, dꞌara miu roe boe. Kèpe paꞌèra-èra lalèka miu. Te miu meꞌa le, dhèu cee dhu parcaya Kristus, tatu na paraga dènge jꞌajꞌèra. 4 Ca hari ni, lodꞌo jiꞌi dènge miu era, jiꞌi pasanèdꞌe le miu, peka na, dhèu cee dhu parcaya Lamatua Yesus, bèli-camèdꞌa paraga dènge rupa-rupa sasusa. Limuri ne jꞌajꞌi le, si!
5 Lula jaꞌa susa titu kèna nèti jꞌajꞌèra miu seꞌe ka, nèti èèna ka jaꞌa pua Timotius dhiu asa Tesalonika, ho jiꞌi ngeꞌa mèu kèna, miu parcaya era Lamatua, do aadꞌo. Te jaꞌa mage-mage, dhèu aae nidhu dadugu miu, ho miu soro kabodho mi Lamatua. Ladhe jꞌajꞌi ka sèmi èèna, sasabꞌa jiꞌi uru sèra, ele iie dꞌara!
Timotius lèpa nèti Tesalonika
6 Lai-lai ne, Timotius lèpa hari mai nèti Tesalonika. Ka nèti lii dhu pakarejꞌe dꞌara jiꞌi. Na lolo, na, miu parcaya Kristus era, aa miu èci pasue dènge èci. Na peka kahèi, na, miu ngee jiꞌi sèmi mia dhu jiꞌi sanèdꞌe miu kahèi.✡Lii Lolo nèti Dhèu Pajuu-paleha 18:5
7-8 Aꞌari aaꞌi-aaꞌi! Masi ka ètu neꞌe jiꞌi ako rasa bia, lula abhu susa ae nèti mia-mia, te ngaa ropa tadèngi lii lolo Timotius, ka dꞌara jiꞌi tareꞌa-reꞌa abhu karejꞌe. Lula limuri ne jiꞌi ngeꞌa le miu parcaya Lamatua era.
Paulus sabajꞌa hia dhèu sarani ètu Tesalonika
9 De jiꞌi manèngi makasi ae-ae mi Lamatua dènge dꞌara dhu karejꞌe titu kèna, lula miu madhutu Ne taruu. 10 Mèu-mèda jiꞌi loe boe sabajꞌa sèna ka catèka sa èdhi paraga hari. Jiꞌi neo ajꞌa miu sèna ka pamèci dꞌara miu ètu jꞌara mamuri Lamatua.
11 Jiꞌi sanao sèna ka Ama Lamatua èdhi, aa Kètu èdhi, Yesus Kristus, bhoke jꞌara sèna ka jiꞌi dhiu paraga hari dènge miu. 12 Jiꞌi manèngi sèna ka Lamatua hia miu asa pasue risi eele hari. Nuka sèmi èèna kahèi miu dènge dhèu aaꞌi-aaꞌi ra asa pasue, sèmi dhu jiꞌi sue miu. 13 Dènge sèmi èèna Lamatua paꞌèra dꞌara miu, ho mamuri mola dènge mera-milu, toke bèli-camèdꞌa Lamatua Yesus lèpa hari mai dènge dhèu unu Na, miu bisa titu kahèi ètu katanga madha Ama Lamatua èdhi, dènge dui heka sasala-sasigo.