1-2 Bèli-camèdꞌa Yesus Kristus mai hari asa rai-haha ne, ho nèdꞌu paredha nuka sèmi Dhèu Aae. Masi ka dhèu dhu mamuri era, do dhèu dhu madhe le, aaꞌi-aaꞌi ra lasi asa katanga madha Na, sèna ka Na pamaꞌète lii langu ra èci-èci. Nèti èèna ka, ètu madha Ama Lamatua dènge Yesus Kristus, jaꞌa manèngi mi èu ho lamu peka-padhai dènge dhèu-dhèu, Lii Holo-Nori Ama Lamatua. Èu paꞌèra taruu! Baku pangee, na, lodꞌo dhu beꞌa, do aadꞌo. Padꞌelo sasala dhèu, te ngaa kai si pabeꞌa-beꞌa dènge lii mako. Paꞌèra dꞌara dhèu pake lii holo-nori dhu lèke.

3 Te bèli-camèdꞌa, dhèu roꞌo heka nanene lii holo-nori dhu lèke. Pe ra kaboko rare mese-mese dhu dꞌèlu-mèu padhue-padhai madhutu dadꞌèi ra, sèna ka pabeꞌa roꞌa dhilu ra. 4 Ra hutu dhilu ra ho tule eele lii holo-nori dhu lèke. Te ngaa pasa dhilu ra, ho nanene lii lolo nanuku dhu leko-monya sèra!

5 Masi ka tasamia èèna ka, èu hudꞌi taha dꞌara. Paꞌèra ètu dꞌara jꞌajꞌèra. Lamu lole Lii Lolo Beꞌa, sèna ka dhèu sèmi rare Yesus Kristus. Soru-bara dhèu dènge dꞌara kateme, toke paꞌèle sasabꞌa. Baku dènge dꞌara cabèka.

6 Baku pusi dènge ngiꞌu jaꞌa ne, te lodꞌo mamadhe jaꞌa dètu le. Èci èèna ka dènge galaa dhu isi na oe èle kèna.*Lodꞌo dhèu Yahudi sèra tao korban ètu Èmu Kapua Manèngi-Mangajꞌi, abhu korban ca macam dhu hudꞌi bhori anggor mi dedha mei korban. Ele boe Paulus pakasame mamuri nèngu nuka sèmi èi anggor dhu bhori oe èle kèna, jꞌajꞌi persembahan hia Lamatua. 7 Te ngaa jaꞌa segi le ètu dꞌara paꞌuji èèna dènge beꞌa. Jaꞌa rai dꞌai le lane. Jaꞌa madhutu taruu le Yesus Kristus dènge beꞌa. 8 De neꞌe ne, di èci ka dhu jaꞌa tatae. Nuka piala juara dhu Lamatua tao tèke le hia dhèu aaꞌi-aaꞌi dhu mamuri mola. Lamatua èdhi èèna, nuka Dhèu pamaꞌète lii langu dhu mola. Dhu neꞌa boe bia cabèka. Ladhe dꞌai ka lodꞌo na, Na pangèdꞌu mi jaꞌa piala juara èèna. Te ngaa mesa boe jaꞌa di. Dhèu aaꞌi-aaꞌi dhu sue Ne, aa dhu mate mamai Na, rèngu sèra abhu piala sèmi èèna kahèi.

9 Timotius! Mai ka lai-lai ngadꞌo jaꞌa! 10 Te limuri ne jaꞌa kaliu bia. Krekes laꞌe le asa propensi Galati. Aa Titus laꞌe le asa rai Dalmatia. Aa Demas sue risi jꞌara-jꞌara dhu lèke boe ètu rai-haha ne, laꞌe le sa kota Tesalonika.✡Kolose 4:14, Pilmon 24, 2 Korintus 8:23, Galati 2:3, Titus 1:4 11 Dhodhoka Lukas di dhu pea dènge jaꞌa ètu neꞌe. Tenge more Markus sèna ka dua mi mai palere-lere. Te nèngu èèna bisa ladhe-leru jaꞌa ètu neꞌe.✡Kolose 4:14, Pilmon 24, Lii Lolo nèti Dhèu Pajuu-paleha 12:12, 25, 13:13, 15:37-39, Kolose 4:10 12 Jaꞌa hia le Tikikus laꞌe asa kota Epesus.✡Lii Lolo nèti Dhèu Pajuu-paleha 20:4, Epesus 6:21-22, Kolose 4:7-8 13 Ladhe èu mai, baku bhèlu mèti kodho pana jaꞌa dhu tèke eele ètu èmu Karpus ètu kota Troas. Aa baku bhèlu mèti dènge sasuri jaꞌa sèra, risi-risi dhu jaꞌa suri ètu kaꞌuri badha.✡Lii Lolo nèti Dhèu Pajuu-paleha 20:6

14 Aleksander, tuka tabaga èèna, tao bhelu dhu ciki boe mi dedha jaꞌa. Hudꞌi nèngu sène, te bèli-camèdꞌa, Lamatua ka dhu bꞌala ne, sèmi dhu nèngu tao mi dedha jaꞌa.✡1 Timotius 1:20, Lii Sodꞌa Koa-Kio 62:12, Roma 2:6 15 Èu hudꞌi mage-mage ku dènge dhèu èèna, lula nèngu na dꞌèi palabꞌa lii-lii dhu èdhi ajꞌa-nori.

16 Lodꞌo hiu-hiu jaꞌa titu ètu madha hakim ho siri iisi jaꞌa, abhu boe ca dhèu sa dhu re jaꞌa. Rèngu aaꞌi-aaꞌi ra kako tèke eele jaꞌa mesa ku. Te ngaa hudꞌi rèngu sène! Pe Lamatua pabhèlu eele sasala ra. 17 Masi ka sèmi èèna, te ngaa Ama Lamatua tèke eele boe jaꞌa. Na paꞌèra jaꞌa, sèna ka jaꞌa bisa peka-padhai Lii Lolo Beꞌa Na dhu pakura boe ciki sa. Jaꞌa lolo sèmi èèna ka mi dhèu Yahudi boe, ho ra nanene Lii Lolo Beꞌa. Aa pakajꞌèu le nèti mamadhe-mamopo. 18 Aa èèna na Ama Lamatua pakajꞌèu jaꞌa nèti bhabhelu-katubꞌa aaꞌi-aaꞌi ra. Aa lere nèti jaꞌa dènge sodꞌa-mole laku asa sorga. Ètu era nèi, Nèngu ka dhu nèdꞌu paredha.

Lamatua èèna, kapai seli eele! Jaꞌa koa-kio dedꞌe padedha-dedha Ne, dhu maꞌète boe! Tareꞌa sèmi èèna.

19 Baku bhelu mèti lii mahoꞌo jaꞌa mi ina Priskila dènge dhèu èmu na Akila. Sèmi èèna kahèi, mi aꞌari Onesiforus.✡Lii Lolo nèti Dhèu Pajuu-paleha 18:2, 2 Timotius 1:16-17 20 Erastus pea ètu kota Korintus. Ca hari ni, jaꞌa tèke eele Trofimus ètu kota Miletus, lula na pèdꞌa aae.✡Lii Lolo nèti Dhèu Pajuu-paleha 19:22, Roma 16:23, Lii Lolo nèti Dhèu Pajuu-paleha 20:4, 21:29 21 Tenge jꞌara sèna ka lodꞌo dꞌai mèka hèru pacuhi, èu dhu dꞌai le neꞌe. Angalai ètu seꞌe se, nuka: Ebolus, Pudes, Linus dènge ina Klaudia paꞌadhu lii mahoꞌo hia miu. Sèmi èèna kahèi, dènge aꞌari dhèu Kristen dhu leo sèra.

22 Jaꞌa sanao sèna ka Ama Lamatua sama-sama dènge èu taruu. Sèna ka Lamatua padꞌelo dꞌara hua iia Na mi miu aaꞌi-aaꞌi mi.