2
Èdhi hudꞌi pahaha iisi nuka sèmi Yesus Kristus
1 Aꞌari pasue aaꞌi-aaꞌi, unu Yesus Kristus! Na pangèdꞌu le miu jꞌara beꞌa ae-ae. De miu bisa paꞌèra dꞌara èci dènge èci. Miu bisa holo dhu mai nèti sasue miu. Miu bisa mamuri pabeꞌa èci dènge èci, lula Roh Lamatua dhu sabꞌa ètu talora aae miu. Aa miu bisa padꞌelo rasa kasia miu dènge dꞌara beꞌa èci dènge èci. 2 Ladhe miu tao sèmi èèna, na, dꞌara jaꞌa karejꞌe kea rae-rae. Risi-risi hari, ladhe miu pasue dènge dꞌara èci, mamuri ètu ca jꞌara, aa mere lii èci ètu dꞌara sasabꞌa-laꞌa. 3 Baku tao ngaa-ngaa dhu tenge dhoka paꞌoto ngiꞌu èu risi nèti dhèu leo. Aa baku pangee, na, èu risi nèti dhèu leo. Te pamone do pabhèni èu èèna, dènge boe kolo-kapua. Te ngaa èdhi hudꞌi pahaha iisi ku, sèna ka teꞌa, na, dhèu leo risi nèti èdhi. 4 Aa baku dhoka uri mamuri miu mesa-mesa mi. Te ngaa èdhi hudꞌi ladhe kahèi, ngaa dhu dhèu leo parluu.
5 Te dꞌara èdhi hudꞌi sama ku sèmi dꞌara Yesus Kristus.
6 Masi ka Nèngu ca ropa dènge Ama Lamatua,
aa Nèngu Kètu èdhi kahèi, èci èèna ka dènge Ama Lamatua,
te ngaa Na tèke eele hak Na,
aa pake boe dadedha dènge kapai Na.
7 Hèia Na puru mai asa rai-haha ne,
ca ropa dènge dhèu rai-haha.
Na tèke eele hak Na aaꞌi-aaꞌi,
sèna ka tao iisi Na jꞌajꞌi nuka sèmi ènu sa.
8 Mesa boe jꞌajꞌi dhèu haha dꞌai seli di,
te ngaa Na tao ngiꞌu Na jꞌajꞌi dhèu dhu laku-laku boe kahèi,
sèna ka tao madhutu dadꞌèi Ama Lamatua.
Masi ka ra pamadhe Ne ètu ajꞌu palolo-palèbha, Na sèmi nare kahèi,
aa madhe, nuka sèmi dhèu bhelu.
9 Lula Nèngu pahaha iisi sèmi èèna,
nèti èèna ka Ama Lamatua dedꞌe Ne padedha-dedha.
Aa pangèdꞌu Ne ngara dhu kapai aae.
Te abhu boe ngara èci sa dhu kapai aae risi nèti Nèngu.
10 Ama Lamatua dedꞌe padedha-dedha ngara Na èèna,
sèna ka dhèu aaꞌi-aaꞌi pakabꞌua Ne.
Nuka: dhèu ètu dedha-liru,
dènge dhèu ètu rai-haha ne.
Dhèu mamuri dènge dhèu madhe.
Bèli-camèdꞌa dhèu aaꞌi-aaꞌi patitu kètu urutuu, ho pahaha iisi mi Nèngu.
11 Aa bèli-camèdꞌa dhèu aaꞌi-aaꞌi peka na, “Yesus Kristus èèna, tareꞌa-reꞌa Lamatua!”
Dènge sèmi èèna, rèngu koa-kio Ama Lamatua kahèi.✡Yesaya 45:23
Èdhi nuka sèmi hua-hètu dhu pasaraa rai-haha
12 Aꞌari pasue aaꞌi-aaꞌi! Nanene paie-iie! Uru èèna, lodꞌo jaꞌa pea ètu kota Pilipi era, miu nanene lii padhai jaꞌa, ka miu madhutu jꞌara mola Ama Lamatua. Limuri ne, èdhi pahagꞌa, te ngaa jaꞌa manèngi ho miu titu èra ètu dꞌara mamuri mola. Sanèdꞌe, te ladhe miu nanene boe Nèngu, bèli-camèdꞌa pe mèdhi unu mi! Lula Nèngu ka dhu patalale miu nèti koasa sasala-sasigo mi. Hèia miu mamuri dhu mèci, te miu jꞌajꞌi le dhèu unu Na. 13 Te Ama Lamatua mesa Na ka dhu sabꞌa ètu dꞌara miu. Nèngu ka dhu bhoke jꞌara, sèna ka miu neo nanene Ne. Aa Nèngu ka dhu hia koasa kahèi, ho miu dꞌèi sabꞌa pakarejꞌe dꞌara Na.
14 De ladhe sadꞌi miu tao ngaa èèna ka, na, baku kaꞌuu-kamuki, aa baku pasibha dꞌara lii. 15 Tao sèmi èèna, sèna ka miu jꞌajꞌi dhèu dhu dꞌara mola-mèci, aa dhèu dhu dènge boe sasala. Miu mamuri ètu dꞌara talora aae dhèu bhelu dènge dhèu kapodꞌe-kabèli. Te ngaa baku madhutu si! Te mamuri miu hudꞌi mola-mèci ku, lula miu ana-ana Lamatua. Hèia mamuri miu hudꞌi heo ku, ho padꞌelo jꞌara hia rèngu, nuka sèmi hua-hètu dhu pasaraa ètu dꞌara maroga.✡Lole Hari Jꞌara-jꞌara Mamuri 32:5 16 Hèia miu mamuri mola dènge pakako Lii Holo-Nori Lamatua. Dènge sèmi èèna, bèli-camèdꞌa miu tao dꞌara jaꞌa kea rae-rae, lodꞌo Yesus Kristus lèpa hari mai. Aa rui-jꞌajꞌèra jaꞌa core eele boe iia dꞌara, te ngaa dènge kabꞌua.
17-18 Te ngaa ladhe sèmi jaꞌa dutu paꞌèle aaꞌi mèu-mèu mamuri jaꞌa, ho jꞌajꞌi nuka sèmi korban èi anggor, sèna ka miu bisa parcaya asa èra, aa pakako sasabꞌa Lamatua, jaꞌa sèmi kore mamadhe dènge karejꞌe. [Èèna nuka sèmi ama agama tiko èi anggor ètu mei korban, ho pahaha iisi mi Lamatua.] Dènge jꞌara ne, èdhi bisa sama-sama karejꞌe, lula korban ne, iia dꞌara boe.✡Sensus 28:7
Sasabꞌa Timotius
19 Jaꞌa sanao, nèbhu heka, Lamatua Yesus bhoke jꞌara, ho jaꞌa pua Timotius dhiu, sèna ka na paꞌèra dꞌara miu. Èle èèna, na lèpa hari mai sa neꞌe, ho na lolo dènge jaꞌa kakako miu, aa pakarejꞌe dꞌara jaꞌa. 20 Jaꞌa pua boe dhèu leo, dhoka Timotius di, lula nèngu ne dꞌara èci dènge jaꞌa. Aa na sue tareꞌa-reꞌa miu. 21 Nèngu ne, sama boe dènge aꞌari dhu leo sèra. Te rèngu sèra pangee dhoka ngiꞌu rèngu unu ra, te ngaa uri boe ngaa-ngaa dhu pamèci hia Yesus Kristus. 22 Te ngaa miu meꞌa le, na, Timotius sabꞌa dꞌai madhe, pakako sasabꞌa Ama Lamatua. Na sabꞌa dènge jaꞌa nuka sèmi ana dhu sabꞌa hia ama na. Jiꞌi dua mi laꞌa peka-padhai Lii Lolo Beꞌa Lamatua Yesus ètu mia-mia. 23 Ladhe rèngu pamaꞌète rare ku lii langu jaꞌa, jaꞌa heka pua Timotius dhiu asa miu kèna. 24 Te ngaa limuri ne, Lamatua paꞌèra dꞌara jaꞌa, na, nèbhu heka jaꞌa bisa dhiu paraga dènge miu.
Sasabꞌa Epaproditus
25 Uru èèna, lodꞌo jaꞌa ètu dꞌara jꞌajꞌèra era, miu pua aꞌari èdhi Epaproditus mai ladhe-leru jaꞌa. Na pakako sasabꞌa Lamatua sama-sama dènge jaꞌa, nuka sèmi ca dhèu sordadꞌu dhu majꞌèni madhutu paredha komedhaa na. Te ngaa neꞌe ne, jaꞌa neo pua na lèpa hari asa miu. 26 Te dꞌara na neo ae le nèdhi miu. Aa na ngee miu, lula neꞌa, na, miu tadèngi le nèngu dhu pèdꞌa. 27 Mema lèke tareꞌa. Ca hari ni, na pèdꞌa aae oe madhe. Te ngaa Ama Lamatua sue ne, aa Lamatua sue jaꞌa kahèi, ka Na puri-paꞌèle Epaproditus, sèna ka jaꞌa baku asa susa. 28 Nèti èèna ka, jaꞌa neo pua hari na lèpa, ho bisa paraga hari dènge miu dènge dꞌara karejꞌe-karae. Ladhe sèmi èèna, dꞌara jaꞌa heka mau kèna. 29-30 De miu hudꞌi sèmi mere ne dènge beꞌa, te nèngu ne dhèu unu Lamatua. Aa miu hudꞌi pakabꞌua ku dhèu aaꞌi-aaꞌi ra dhu ca ropa dènge ne. Te nèngu pakako sasabꞌa Kristus, toke oe madhe. Aa nèngu hari boe kabodho ciki sa, lula na neo soru-bara jaꞌa, gati miu. De sèmi mere hari ne dènge dꞌara karejꞌe.