18
Ana pajuu Ama Lamatua lole gaguri kota Babel
1 Hèia jaꞌa ladhe kèdhi ana pajuu dhu leo ca dhèu, mai nèti sorga. Nèngu ne dhu dènge koasa aa saraa dhu kapai, ho pasaraa palème rai-haha. 2 Dènge lii aae, na peka,
“Laho le! Laho le! Kota Babel laho mae-mae le!
Guri le! Guri le! Kota kapai ne, guri dolu-dolu le!
Nèngu jꞌajꞌi le era pea nidhu.
Nèngu jꞌajꞌi le rai èta-èsu roh bhelu-katubꞌa aaꞌi-aaꞌi.
Nèngu jꞌajꞌi le era pakaboko nèti manu-bhui aaꞌi-aaꞌi dhu raꞌa sisi hèu.
Nèngu jꞌajꞌi le oka nèti badha aaꞌi-aaꞌi dhu dhèu madenge.✡Yesaya 21:9, Yermia 51:8, Rai-haha Rupa Hiu 14:8, Yesaya 13:21, Yermia 50:39
3 Nèngu guri le, lula suku aaꞌi-aaꞌi ètu rai-haha ne,
loe boe mai rinu mahu èi anggor na.
Nèngu laho le, lula udhu-rasa aaꞌi-aaꞌi ètu rai-haha ne,
loe boe mai adꞌu-ue jꞌara makae dènge ana kabarai kota ne.
Dhèu aae-dhèu aae nèti negara aaꞌi-aaꞌi,
mai jꞌunu paꞌèci ètu èèna.
Dhèu dꞌaga nèti kota aaꞌi-aaꞌi,
mai pahia toke rèngu jꞌajꞌi kaja.
Lula kota ne nuka sèmi dhèu bhèni dhu dꞌèi hèli mèdha dhu kabꞌua aae.
Lula kota ne sama sèmi bhèni kajeo dhu dꞌèi dhoka tenge ngaa-ngaa dhu hua iia di.”✡Yesaya 23:17, Yermia 51:7
4 Hèia jaꞌa tadèngi hari lii leo èci, paroa nèti dedha-liru, peka na,
“Wee! Dhèu Jaꞌa aaꞌi-aaꞌi!
Rai eele ka era èèna!
Tèke eele ka kota èèna!
Baku tao madhutu bhabhelu ana kabarai kota ne,
sèna ka baku lèke hahuku ra kahèi.✡Yesaya 48:20, Yermia 50:8, 51:6, 45
5 Lula bhabhelu ra,
ae seli eele.
Aa sasala ra,
tanga-tanga dꞌai dedha-liru.
Limuri ne Ama Lamatua bhèlu heka,
jꞌara mamuri ra dhu bhelu-katubꞌa èèna.
Limuri ne Ama Lamatua dhu paꞌèra le,
ho neo huku si.✡Lii Lolo dhu Uru Tèka 18:20-21, Yermia 51:9
6 De miu hudꞌi bꞌala ku bhabhelu ra,
sama sèmi rèngu tao le bhabhelu mi dhèu leo.
Te ngaa miu hudꞌi bꞌala si,
toke dꞌai babia na dua-dua hari.
Uru èèna, rèngu tipu le dhèu,
ho rinu nèti dꞌara cangkir hualaa ra, dhu pènu dènge èi anggor jꞌajꞌèra.
Te ngaa limuri ne rèngu mesa ra hudꞌi rinu ku
anggor jꞌajꞌèra èèna, toke dua-dua hari.✡Lii Sodꞌa Koa-Kio 137:8, Yermia 50:29
7 Rèngu se tao ngiꞌu ra kapai.
Aa ra padedha-dedha ngiꞌu unu ra.
Rèngu dꞌèi dhoka mamuri karejꞌe-karae di.
Rèngu dꞌèi dhoka dhu beꞌa-beꞌa di.
Nèti èèna ka, rèngu hudꞌi abhu ku sasusa dhu bia.
De rèngu hudꞌi mamuri jꞌèra bia ku.
Te uru èèna, ra padhai lii padedha iisi sama sèmi bhèni kajeo, peka na,
‘Jaꞌa ne, ina bhèni aae!
Jaꞌa ne, èèna na jꞌajꞌi boe bhèni balu!
Jaꞌa èèna na roma iisi boe.
Jaꞌa èèna na silu boe mèdha balu dhèu madhe.’
8 Ra padhai lii sèmi èèna, toke Ama Lamatua nasa le dènge ra.
Ka Ama Lamatua neo huku si.
Èèna na, dꞌara ca lodꞌo di,
rèngu manganga titu kèna,
rèngu tangi roma iisi,
aa ra madhe aapa.
Toke dhèu core eele si asa dꞌara ai.
Toke ai naꞌe pakèpu ngiꞌu aae si.
Te Lamatua dhu koasa kapai risi, ka dhu papuru huku ne.
Aa Lamatua dhu èra risi eele, dhu pamaꞌète lii langu ne.✡Yesaya 47:7-9
9 Dhèu aae-dhèu aae uru sa,
mai jꞌunu paꞌèci dènge ana kabarai kota ne,
aa mamuri karejꞌe-karae ètu èèna.
Pe ladhe rèdhi sèbꞌu dhu caꞌe nèti dꞌara ai,
pe reꞌa, na, kota ne dhu ai naꞌe aaꞌi le.
Ka ra tangi ne dènge dꞌara pèdꞌa.
10 Ka ra mangingi, ladhe jꞌajꞌèra dhèu sèra.
Te ngaa ra bani dhoka titu ètu kajꞌèu di.
Aa rèngu bani dhoka laladhe nèti nèi di.
Hèia ra padhai lii, peka na,
‘Ira ii! Kasian èu Babel!
Ira ii! Kasian kota kapai!
Te dhoka dꞌara ca jam di, èu abhu huku le.
Te dhoka dꞌara ciki ooꞌe di, èu laho le.’✡Yeskial 26:16-17
11 Tadèngi sèmi èèna, dhèu-dhèu dhu uru sèra, mai nèti mia-mia ho dꞌaga ètu èèna,
rèngu tangi roma iisi kahèi.
Te abhu boe ca dhèu sa,
dhu neo lasi hèli mèdha dꞌaga ra.✡Yeskial 27:31, 36
12 Abhu heka dhu neo lasi hèli
mèdha ra dhu tao nèti hualaa, doi pudhi,
hadhu kaleꞌe, do mutiara.
Abhu heka dhu neo lasi hèli
bèla lenan, do bèla sutra rèngu,
do bèla alus dhu leo, dhu mea oe sèmi mangèru sa.
Abhu heka dhu neo lasi hèli
mèdha ra dhu tao nèti ajꞌu hèu mèngi, aa mèdha dhu dꞌule nèti èli gajah,
do ajꞌu dhu dꞌule dhu leo sèra.
Abhu heka dhu neo lasi hèli
mèdha ra dhu tao nèti tabaga, bèsi, do hadhu marmar.
13 Abhu heka dhu neo lasi hèli
kayu manis, do bubhu lara dhu leo sèra.
Abhu heka dhu neo lasi hèli
raa ajꞌu hèu mèngi ra, do èi hèu mèngi dhu leo sèra.
Abhu heka dhu neo lasi hèli
èi anggor ra, èi mènyi saitun ra,
tarigu, do are-gandum ra.
Abhu heka dhu neo lasi hèli
sapi ra, kahibꞌi-kalèbho ra, do jara ra.
Abhu heka dhu neo lasi hèli
kareta mèdha ra,
do ènu ra sèra.✡Yeskial 27:12, 13, 22
14 Èèna na dhèu dꞌaga sèra manyasa, ka ra peka na,
‘Ira ii, Babel, ee!
Ira ii, kota kapai, ee!
Mèdha-panyau èu dhu hua iia sèra, dhu kabarai èu dꞌèi risi,
aadꞌo heka èci sa.
Aaꞌi-aaꞌi ra ela aaꞌi mèu-mèu, toke kabarai èu dènge boe ngaa-ngaa,
toke rodꞌo kakara dꞌai rai.’
15 Uru èèna, dhèu dꞌaga se jꞌajꞌi kaja, lula kota ne dhu nuka sèmi bhèni kajeo.
Te ngaa limuri ne, ra loe boe manyasa.
Rèngu jꞌajꞌi madhaꞌu titu kèna,
laladhe jꞌajꞌèra ana kabarai kota ne.
Rèngu jꞌajꞌi mangingi titu kèna,
laladhe hahuku ra.
Te ngaa rèngu dhoka bani laladhe nèti kajꞌèu di.
Rèngu bani dhoka titu nèti era nèi di.
16 Hèia ra padhai lii, peka na,
‘Ira ii! Kasian èu Babel, ee!
Ira ii! Kasian kota kapai, ee!✡Yeskial 27:31, 36
Uru èèna, ana kabarai èu pake mèdha bèla alus, dhu mea oe sèmi mangèru sa,
nèti bèla dhu kabꞌua titu kèna.
Uru èèna, ana kabarai èu dꞌèi panèu mèdha hualaa, mutiara,
dènge hadhu kaleꞌe dhu kabꞌua titu kèna.
17 Te ngaa dꞌara ca jam di,
mèdha-panyau èu sèra èla aaꞌi mèu-mèu si.
Dhodhoka dꞌara ciki ooꞌe èèna di,
kakaja èu saku hani-hani!’
Uru èèna juraga kapa, dènge mataroo sèra,
kako lasi-mai nèti kota èèna.
Te ngaa limuri ne, rèngu bani dhodhoka panahu nèti kajꞌèu di.
Te ngaa limuri ne rèngu bani dhoka laladhe nèti nèi di.✡Yesaya 23:14, Yeskial 27:26-30
18 Rèngu ladhe sèbꞌu kalua nèti dꞌara ai èèna.
Ka reꞌa, na, ai naꞌe aaꞌi le.
Hèia ra manyasa, ka peka na,
‘Ira ii, kasian! Abhu heka kota leo
dhu kapai sèmi kota Babel ne.
Aduu, kasian! Abhu heka kota dhu leo,
dhu babeꞌa na sama sèmi nèngu ne.’✡Yeskial 27:32
19 Rèngu soke ahu ho cebꞌe mi kètu ra,
lula dꞌara ra susa.
Rèngu tangi dꞌara pèdꞌa,
lula dꞌara ra laho mae-mae.
Ka ra peka na,
‘Ira ii! Kasian èu Babel, ee!
Ira ii! Kasian kota kapai!
Jiꞌi dènge kapa laꞌa-mai ngèti mèdha hia kabarai èu,
toke jiꞌi dꞌai kaja-suꞌi kahèi.
Jiꞌi hua ngèti le mèdha kabarai èu,
toke jiꞌi mamuri hua iia kahèi.
Te ngaa dhoka dꞌara ca jam di,
aaꞌi-aaꞌi se saku hani-hani.
Te ngaa dhoka ètu dꞌara ciki ooꞌe di,
laho aaꞌi si mèu-mèu.’✡Yeskial 27:30-34
20 Hèia jaꞌa tadèngi lii aae èci peka tabha hari, sèmi neꞌe ka:
‘He, miu dhu mamuri ètu sorga!
miu parluu heka dꞌara pèdꞌa.
He, miu dhu jꞌajꞌi le dhèu unu Lamatua!
Dꞌara miu parluu heka susa.
Miu dhu jꞌajꞌi le dhèu pajuu-paleha Lamatua,
hudꞌi laa dꞌara miu karae.
Miu dhu jꞌajꞌi le dhèu rèti lii padhai Lamatua,
hudꞌi laa dꞌara miu mahoꞌo.
Uru èèna, Babel pasusa le miu.
Uru èèna, kabarai kota ne pajꞌèra miu.
Te ngaa limuri ne Lamatua pamaꞌète le lii langu miu dènge mola.
Te limuri ne Na bꞌala le bhabhelu-katubꞌa kabarai kota èèna.’ ”✡Lole Hari Jꞌara-jꞌara Mamuri 32:43, Yermia 51:48
21 Ka jaꞌa ladhe kèdhi ana pajuu èci nèti sorga dhu èra titu kèna. Na mai dedꞌe nare hadhu aae cue, dhu kapai na sange dhèu èci. Hèia na pèci hadhu ne asa dꞌara dhasi. Ka na peka,
“Pe ra palaho eele Babel sèmi èèna kahèi.
Pe ra paꞌele kota kapai èèna, sèmi èèna kahèi.✡Yermia 51:63-64, Yeskial 26:21
22 Abhu heka ca dhèu sa,
dhu karihu musiik ètu dꞌara kota èèna.
Abhu heka dhèu,
dhu tadèngi lii gai sasadhu, tiu sakino,
aa lii tiu tèbhe ètu dꞌara kota èèna.
Abhu heka tuka èci sa,
dhu sabꞌa ètu dꞌara sabꞌa-laꞌa ra.
Abhu heka dhèu,
dhu gili are ètu kota èèna.✡Yeskial 26:13, Yesaya 24:8
23 Abhu heka dhèu,
dhu paheo labhu ètu dꞌara kota èèna.
Abhu heka dhèu,
dhu tao pesta kabꞌi ètu èèna.
Uru èèna, ètu kota ne, dhèu pahia-pahèli mèdha ra,
toke jꞌajꞌi kaja-suꞌi.
Uru èèna, dhèu dꞌaga ètu Babel,
mamuri hua iia.
Te ngaa rèngu pake naꞌi nidhu,
ho leko-monya dhèu ètu rai-haha.
Rèngu pake seher,
ho kapodꞌe-kabèli dhèu ètu rai-haha.✡Yermia 7:34, 25:10
24 Babel abhu le huku dhu bia,
lula kabarai na loe boe pamadhe dhèu rèti lii padhai Lamatua.
Kota kapai ne laho le,
lula kabarai na pajꞌèra toke madhe dhèu unu Lamatua.
Abhu kahèi dhèu-dhèu Lamatua dhu ra pamadhe ètu era-era leo.
Te ngaa Babel ka dhu hudꞌi dui nare sasala sèra.
Kota kapai èèna ka dhu hudꞌi tago nare aaꞌi.”✡Yermia 51:49
✡18:2 Yesaya 21:9, Yermia 51:8, Rai-haha Rupa Hiu 14:8, Yesaya 13:21, Yermia 50:39
✡18:3 Yesaya 23:17, Yermia 51:7
✡18:4 Yesaya 48:20, Yermia 50:8, 51:6, 45
✡18:5 Lii Lolo dhu Uru Tèka 18:20-21, Yermia 51:9
✡18:6 Lii Sodꞌa Koa-Kio 137:8, Yermia 50:29
✡18:8 Yesaya 47:7-9
✡18:10 Yeskial 26:16-17
✡18:11 Yeskial 27:31, 36
✡18:13 Yeskial 27:12, 13, 22
✡18:16 Yeskial 27:31, 36
✡18:17 Yesaya 23:14, Yeskial 27:26-30
✡18:18 Yeskial 27:32
✡18:19 Yeskial 27:30-34
✡18:20 Lole Hari Jꞌara-jꞌara Mamuri 32:43, Yermia 51:48
✡18:21 Yermia 51:63-64, Yeskial 26:21
✡18:22 Yeskial 26:13, Yesaya 24:8
✡18:23 Yermia 7:34, 25:10
✡18:24 Yermia 51:49