3
Masi ka dhèu Yahudi dènge hak ho abhu pusaka nèti lii padhadha Lamatua, te ngaa jꞌara èèna patabuli boe rèngu nèti koasa sasala-sasigo ra
1 Ladhe sèmi èèna, dhèu Yahudi dhu suna sèra, aꞌoto na ngaa? Ele boe miu pangee, na, dhèu Yahudi abhu ae dènge dhu beꞌa risi nèti dhèu Yahudi boe, do? 2 Tareꞌa! De dhèu Yahudi abhu oto ètu jꞌara ae-ae. Ka èci, lula Lamatua pangèdꞌu sasabꞌa sa dhèu Yahudi, ho suri aa jꞌaga paie-iie Lii Holo-Nori Na. 3 De tasamia? Miu dhu pangee, na, Ama Lamatua bisa boe tao madhutu ngaa dhu Na padhai le, lula abhu dhèu Yahudi cahagꞌe dhu parcaya boe Nèngu, do? 4 Bisa boe! Masi ka dhèu aaꞌi-aaꞌi ètu rai-haha ne kapodꞌe-kabèli, te ngaa Ama Lamatua padhai lii dhu mola taruu! Sanèdꞌe, te dhu suri tèke ètu Sasuri Mola-Mèci lula-nèti ngiꞌu Lamatua, peka na,
“Abhu dhèu dhu pèci sasala, peka na,
Nèngu pamaꞌète lii langu dhu bia cabèka.
Te ngaa pe rèngu reꞌa, na,
ngaa dhu Na peka-padhai èèna lèke tareꞌa.
Nèngu tatu segi,
lula Na bisa boe padhai lii sale.”✡Lii Sodꞌa Koa-Kio 51:4
5 Te ngaa ladhe èdhi tao sala, èèna ka dhu peka paledꞌa mi dhèu aaꞌi-aaꞌi, ngaa dhu Lamatua tao èèna mema lèke tareꞌa. Ladhe sèmi èèna, èdhi peka ngaa hari? Neo peka, na, Lamatua adil boe ladhe Na huku èdhi, do? (Te abhu dhèu cahagꞌe dhu padhai lii sèmi èèna.) 6 Bisa boe! Lamatua sala boe ladhe Na huku èdhi. Lula Na dènge hak ho huku dhèu dhu tao sala ètu rai-haha ne.
7 De ladhe jaꞌa padhai lii monya, èèna peka na, hahuku Lamatua lèke tareꞌa. Ladhe jaꞌa padꞌelo dadedha Na sèmi èèna, nga tao ka Nèngu parisa mamuri jaꞌa, ka pamaꞌète lii langu jaꞌa, na, ngaa dhu jaꞌa adꞌu-ue ne, sala? 8 Baku sèmi èèna! Ladhe madhutu ka ngangee sèmi èèna, miu madhutu dhèu dhu peka, na, “Hudꞌi laa èdhi tao bhelu-katubꞌa ae risi hari, sèna ka jꞌara beꞌa asa tabha ae kahèi!” Dhèu dhu peka sèmi èèna, pantas abhu huku. Te ngaa abhu dhèu dhu paꞌele iie kolongara jaꞌa, peka na, jaꞌa ka ajꞌa dhèu sèmi èèna.
Abhu boe ca dhèu sa dhu dꞌara mola, te dhèu aaꞌi-aaꞌi tao sala
9 De tasamia? Miu pangee, na, èdhi dhèu Yahudi beꞌa risi nèti dhèu Yahudi boe, do? Aadꞌo! Te jaꞌa peka le dènge miu, na, dhèu aaꞌi-aaꞌi dhu manahu le asa dꞌara sasala, masi ka dhèu Yahudi, do dhèu Yahudi boe. 10 Te dhu suri mema ètu dꞌara Sasuri Ama Lamatua dhu Mola-Mèci, na,
“Abhu boe ca dhèu sa dhu mamuri mola taruu.
Èci sa aadꞌo!
11 Abhu boe ca dhèu sa dhu reꞌa mèu jꞌara-jꞌara Ama Lamatua.
Abhu boe èci sa dhu neo patadha dènge Lamatua.
12 Rèngu pakajꞌèu le nèti jꞌara mamuri dhu mola.
Ka rèngu se guna heka mi ngaa èci sa.
Abhu boe ca dhèu sa dhu padꞌelo dꞌara beꞌa.
Èci sa aadꞌo hèi!✡Lii Sodꞌa Koa-Kio 14:1-3, 53:1-3
13 Lii padhai ra dhu hèu bhobꞌo,
nuka sèmi roꞌa dhèu madhe dhu ra kèi hari.
Nèti dꞌara hèbꞌa ra kalua dhoka lii kapodꞌe-kabèli di.
Lii dhu kalua nèti dꞌara hèbꞌa ra,
nuka sèmi raco mege.✡Lii Sodꞌa Koa-Kio 5:10, 140:4
14 Hèbꞌa ra reꞌa dhoka padhèdꞌa di,
aa lii padhai ra karehe, dhu papèdꞌa dꞌara dhèu,
te èèna ka dhu mai nèti dꞌara rèngu dhu karehe.✡Lii Sodꞌa Koa-Kio 10:7
15 Reꞌa boe madhaꞌu ladhe pamadhe dhèu.
16 Sadꞌi rèngu ètu mia èèna ka, na,
lii langu, muri ètu èèna,
aa pasusa rupa-rupa mi dedha dhèu.
17 Mamuri ra dhu reꞌa boe padame,
aa reꞌa boe mamuri dènge dꞌara dhu mau.✡Yesaya 59:7-8
18 Rèngu se bisa boe taha rare dꞌara ra,
lula dènge boe dꞌara madhaꞌu ciki sa mi Ama Lamatua.”✡Lii Sodꞌa Koa-Kio 36:2
19 De èdhi teꞌa, na, Lamatua hia Atora Na mi dhèu dhu pahaha iisi mi Atora sèra. Dènge sèmi èèna, dhèu abhu boe alasan ho siri iisi, peka na, rèngu se, dhèu dꞌara mola. Ladhe dhèu aaꞌi-aaꞌi ètu rai-haha ne hudꞌi paraga ku dènge Ama Lamatua, te Nèngu ka dhu jꞌue lii langu dhu peka na, sala do aadꞌo. 20 Nèti èèna ka, abhu boe ca dhèu sa dhu bisa peka, na, “Ama Lamatua cap jaꞌa, dhèu dꞌara mola, lula jaꞌa tao madhutu aaꞌi Atora Lamatua.” Bisa boe! Te Atora Lamatua ka dhu padꞌelo, na, èdhi aaꞌi-aaꞌi ti tao sala.✡Lii Sodꞌa Koa-Kio 143:2, Galati 2:16
Hudꞌi parcaya uuru ku Lamatua Yesus, heka Ama Lamatua cap èdhi, dhèu dꞌara mola
21 Baku malaa dènge naneo Lamatua dhu pajꞌujꞌu jꞌara, ho èdhi bisa pabeꞌa hari dènge Nèngu. Dhu lèke, ladhe èdhi bisa pabeꞌa dènge Lamatua, te ngaa lula boe nèti èdhi tao madhutu Atora Na. Te Atora Na dhu suri le sèmi èèna, aa dhèu rèti lii padhai Na uru-uru sèra, peka sèmi èèna kahèi ètu dꞌara Sasuri Mola-Mèci Na. 22 Ama Lamatua peka, na, èdhi dhèu dꞌara mola dhu pabeꞌa dènge Ne, ropa èdhi parcaya Yesus Kristus. Nèngu dhu hagꞌe boe rèhu dhèu, te Na tao sèmi èèna mi dhèu aaꞌi-aaꞌi dhu parcaya Yesus.✡Galati 2:16
23 Te dhèu aaꞌi-aaꞌi tao sala. Nèti èèna ka, dhèu dhu tenge-tenge jꞌara ho neo pabeꞌa ngiꞌu rèngu dènge Ama Lamatua, bisa boe pamèci dènge dadedha Lamatua. 24 Masi ka sèmi èèna, te ngaa Ama Lamatua mesa Na ka dhu padꞌelo dꞌara hua iia Na, aa pamaꞌète, peka na, èdhi dènge heka sasala. Na sèmi nare èdhi, lula Yesus Kristus sui nare le èdhi nèti sasala-sasigo èdhi.
25-26 Ama Lamatua pajꞌujꞌu le Yesus, sèna ka jꞌajꞌi korban papo makae ho saku eele sasala-sigo èdhi. Te ngaa èdhi hudꞌi parcaya Ne, na, Nèngu ka dhu tago nare hahuku èdhi. Ka Na pasuti raa Na, aa madhe gati èdhi. Dènge jꞌara neꞌe, Ama Lamatua peka na, ngaa dhu Na pamaꞌète ne, lèke tareꞌa. Uru èèna, dꞌara Lamatua taleo titu kèna, hèia Na pamaꞌète ho pabhèlu eele sasala-sasigo dhu dhèu adꞌu-ue le. Te ngaa ladhe Na huku boe dhèu dhu tao sala, Nèngu adil boe. De Na bhoke jꞌara, sèna ka Yesus Kristus dui nare hahuku nèti dhèu sala. Limuri ne, Lamatua padꞌelo mi dhèu aaꞌi-aaꞌi, peka na, Nèngu tao dhu beꞌa taruu. Ka dhèu sala aaꞌi-aaꞌi ra dhu parcaya Yesus, Na cap si dhèu mola.
27 De tasamia? Ele boe miu pangee, na, miu bisa padhai lii lela dedha, lula Ama Lamatua sèmi nare miu, do? Bisa boe! Miu neo padꞌelo Atora èci dhu tao pabeꞌa miu dènge Lamatua, do? Miu pangee, na, Lamatua sèmi nare miu lula miu tao dhu beꞌa, do? Bisa boe! Èdhi teꞌa dhoka pajꞌujꞌu mi Atora dhu peka na, Ama Lamatua sèmi nare èdhi, lula èdhi parcaya Yesus. Nèngu na, kèna!
28 Nèti èèna ka, èdhi teꞌa sèmi neꞌe: dhèu bisa pabeꞌa dènge Lamatua, nèti ra parcaya Yesus, nèti boe rèngu tao madhutu Atora di.
29 De jaꞌa neo karèi sèmi neꞌe: Ama Lamatua sèmi nare dhoka dhèu Yahudi di, do Nèngu sèmi nare dhèu leo kahèi? Lèke! Na sèmi nare aaꞌi!
30 Te Ama Lamatua ne, dhoka èci di. Aa dhoka jꞌara èci di, dhu Na sèmi nare sèna ka èdhi dhèu rai-haha ne bisa pabeꞌa dènge Ne. Nuka èdhi hudꞌi parcaya Kristus. Jꞌara ne pala mi dhèu Yahudi dènge dhèu Yahudi boe kahèi.✡Lole Hari Jꞌara-jꞌara Mamuri 6:4, Galati 3:20
31 De jaꞌa neo karèi sèmi neꞌe: ladhe èdhi parcaya Lamatua, èèna na tao Atora Na jꞌajꞌi heka ngaa-ngaa, do? Aadꞌo! Dhu lèke ka, parcaya èdhi èèna ka dhu tao pamèci Atora Na.
✡3:4 Lii Sodꞌa Koa-Kio 51:4
✡3:12 Lii Sodꞌa Koa-Kio 14:1-3, 53:1-3
✡3:13 Lii Sodꞌa Koa-Kio 5:10, 140:4
✡3:14 Lii Sodꞌa Koa-Kio 10:7
✡3:17 Yesaya 59:7-8
✡3:18 Lii Sodꞌa Koa-Kio 36:2
✡3:20 Lii Sodꞌa Koa-Kio 143:2, Galati 2:16
✡3:30 Lole Hari Jꞌara-jꞌara Mamuri 6:4, Galati 3:20