11
Ama Lamatua rasa kasia mi dhèu Israꞌel sèra
1 De jaꞌa neo karèi sèmi neꞌe: ele boe miu pangee, na, “Lula dhèu Israꞌel roꞌo boe nanene Ama Lamatua, nèti èèna ka Na tule eele le si.” Sèmi èèna ka, do? Aadꞌo! Te jꞌajꞌajꞌi jaꞌa nèti rèngu kahèi! Jaꞌa ne, nèti suku Benyamin. Ama Benyamin, nuka Yakob. Baki na, Isak, Ama Isak, ka Abraham, dhu jꞌajꞌi bèi-baki nèti dhèu Israꞌel aaꞌi-aaꞌi.✡Pilipi 3:5 2 Ama Lamatua tule eele nèdhi boe dhèu unu Na sèra. Rèngu seꞌe ka dhu Na tadhe karèi nèti uru-uru ka. Miu sanèdꞌe era, ngaa dhu suri tèke ètu dꞌara Sasuri Mola-Mèci lula-nèti Elia, si? Elia kaꞌuu-kamuki mi Lamatua lula-nèti dhèu Israꞌel sèra, hèia na manèngi, sèna ka Lamatua huku si, 3 peka na,
“Ama! Dhèu se pamadhe dhèu rèti lii padhai,
dhu Ama pua mai.
Ra paꞌele iie le mei korban kahèi,
ètu era dhu dhèu tema pahaha iisi mi Ama.
Nèti dhèu rèti lii padhai Lamatua aaꞌi-aaꞌi,
ate dhoka jaꞌa mesa-mesa ku di dhu mamuri.
Te ngaa rèngu tenge jꞌara,
ho neo pamadhe jaꞌa kahèi!”✡1 Dhèu Aae sèra 19:10, 14
4 Te ngaa Lamatua dhaa, peka na: “Lii èu èèna, sala! Te dhèu dhu pahaha iisi mi Jaꞌa, abhu pidhu riho dhèu era. Rèngu se taha dènge èra, aa sogo-tagu boe Baꞌal!”✡1 Dhèu Aae sèra 19:18
5-6 Sèmi èèna kahèi limuri ne. Te dhèu Yahudi aaꞌi-aaꞌi boe dhu soro kabodho mi Ama Lamatua. Abhu ciki nèti jiꞌi era dhu Lamatua pili nare, sèna ka hia mamuri, lula Na neo padꞌelo dꞌara hua iia Na mi jiꞌi, lula boe nèti tatao jiꞌi dhu beꞌa! Te ladhe Nèngu hudꞌi pili nare ku jiꞌi lula tatao jiꞌi dhu beꞌa, sasoa na, Nèngu bisa boe pamaꞌète sèna ka neo padꞌelo, do padꞌelo boe, dꞌara hua iia Na mi jiꞌi. Ladhe sèmi èèna, peka iia ka, na, ‘Nèngu padꞌelo dꞌara hua iia Na’.✡Lole Hari Jꞌara-jꞌara Mamuri 7:7-8 7 De lalaꞌe na sèmi neꞌe ka: dhèu Yahudi ae ka dhu tenge-tenge jꞌara ho Ama Lamatua padꞌelo dꞌara hua iia Na mi rèngu, sèna ka rèngu bisa pabeꞌa kahèi dènge Lamatua. Te ngaa abhu boe, lula dꞌara rèngu adhu sèmi hadhu, dènge roꞌo boe nanene Lamatua. Te ngaa cahagꞌe nèti dhèu se abhu. Dhèu seꞌe ka dhu Lamatua hagꞌe nare si. 8 Ètu dꞌara Sasuri Mola-Mèci Lamatua, dhu suri lula-nèti dhèu kètu hadhu sèra, peka na,
“Lamatua hia si,
musi madha dhu bisa boe ladhe rèdhi,
roꞌa dhilu dhu bisa boe tadèngi,
aa kahadhu dhu bisa boe pangee.
De rèngu reꞌa mèu iia boe,
toke dꞌai sange neꞌe.”✡Lole Hari Jꞌara-jꞌara Mamuri 29:4, Yesaya 29:10
9 Dhèu aae Daud suri le kahèi lula-nèti dhèu Yahudi se, ètu Sasuri Mola-Mèci, na,
“Hudꞌi laa ho ra tao pesta ètu mei unu ra.
Te tatao rèngu neꞌe ka dhu jꞌajꞌi sasii ho sii hari rèngu,
ka ra ngee na aaꞌi-aaꞌi se beꞌa le.
Aa nèti mèdha-panyau unu ra, ka dhu pasaleku rèngu.
10 Hudꞌi laa sèna ka musi madha ra maroga,
ho rèdhi boe ngaa-ngaa!
Hudꞌi laa rèngu dui bia taruu,
sèna ka kabodho ra asa kabhuku!”✡Lii Sodꞌa Koa-Kio 69:23-24
Lamatua neo hia mamuri mi dhèu Yahudi boe kahèi
11 De jaꞌa neo karèi sèmi neꞌe: Nga tao ka dhèu Yahudi sèra kadhunu? Ra bèbha le, do? Aadꞌo! Te ngaa, lula rèngu roꞌo boe nanene Ama Lamatua, aa roꞌo boe parcaya Kristus, neꞌe ne ka dhu bhoke jꞌara hia dhèu Yahudi boe, sèna ka ra bisa abhu mamuri, lula Lamatua patabuli si nèti sasala ra. Nèti tatao Lamatua sèmi èèna, Nèngu neo ho dhèu Yahudi sèra tèka dꞌara, hèia ra lèpa hari ho madhutu Ne. 12 De dhu mola na kèna, peka na, dhèu Yahudi se sisu ngaa dhu lèke. Nèti èèna ka, dhèu leo nèti palème rai-haha ne bisa rasa kakee-mamènyi dꞌara hua iia Lamatua. De dhèu Yahudi rugi kapai. Te ngaa èèna tao dhèu Yahudi boe sèra oto titu kèna. De nèbhu-nèbhu, ladhe dhèu Yahudi aaꞌi-aaꞌi ra pabeꞌa hari dènge Lamatua, èèna beꞌa risi hari!
13 Jaꞌa neo peka jꞌara èci dènge miu dhèu Yahudi boe, sèmi neꞌe: Lamatua pua jaꞌa sèna ka, laku peka-padhai dènge miu, lula-nèti Lii Lolo Beꞌa Na. Nèti èèna ka, jaꞌa paꞌèra ngiꞌu, sèna ka pakako sasabꞌa dhu beꞌa aae ne. 14 Te ladhe jaꞌa pakako sasabꞌa ne dènge beꞌa, jaꞌa sanao sèna ka dhèu Yahudi unu ku tèka dꞌara. Dènge jꞌara sèmi neꞌe, jaꞌa bisa bara rèngu cahagꞌe sèna ka abhu mamuri. 15 Ropa Lamatua tule eele dhèu unu Na, lodꞌo èèna kahèi Lamatua bhoke jꞌara, sèna ka dhèu leo abhu jꞌara ho maso jꞌajꞌi dhèu unu Lamatua. Te ngaa èle èèna, ladhe sèmi rèngu padame hari dènge Lamatua, èèna beꞌa risi. Te èèna sama sèmi rèngu mamuri hari nèti mamadhe ra!
16 Nuka sèmi dhèu neo tao roti. Ladhe nare tarigu ciki saraka mi Lamatua, èèna na roti se jꞌajꞌi mola-mèci unu Lamatua. Aa ladhe dhèu hia amo ajꞌu èci, ho jꞌajꞌi bua sulung mi Lamatua, èèna na ajꞌu ca kapua ne jꞌajꞌi mola-mèci unu Lamatua kahèi.
17 Jaꞌa neo pakasame dhèu Yahudi dènge ajꞌu saitun ca kapua dhu ra piara ètu dꞌara oka. Ama Lamatua dhu tutu eele le dadana cahagꞌe nèti ajꞌu ne. Te ngaa miu dhu Yahudi boe, nuka sèmi saitun jꞌami. Hèia, nèti dadana miu cahagꞌe, Lamatua pare nare ka laꞌe patapa mi ajꞌu dhu ètu dꞌara oka deo na. Dènge jꞌara ne, dadana nèti ajꞌu dhu ètu liꞌu oka, sakidꞌo nare mamuri nèti ajꞌu ètu dꞌara oka deo na. Neꞌe ne, èci èèna ka dènge miu dhu Yahudi boe, dhu sèmi mere dꞌara hua iia Lamatua kahèi, dhu Na neo hia mi dhèu unu Na, dhèu Yahudi sèra. 18 Te ngaa baku pamudꞌe! De mage mi padedha iisi, ho pangee na, miu dhu nèti liꞌu, beꞌa risi nèti dadana dhu Lamatua tutu eele sèra! Ladhe èu neo padedha iisi, mage èu bhèlu, te, èu ne dhoka ca dadana di! Èu boe ka dhu paꞌèra kapua ajꞌu ne. Te amo ka dhu paꞌèra ajꞌu ne!
19 Ele boe èu neo peka, na, “Lamatua pare eele dadana èci nèti ajꞌu dhu muri ètu dꞌara oka Na, sèna ka Na pakajꞌèpe jaꞌa mi era deo na, ho gati dadana deo na.” 20 Mema lèke. Te ngaa baku bhèlu, na, Lamatua tutu eele dadana sèra, lula rèngu parcaya boe Ne. Aa èu gati si, lula èu parcaya Nèngu. De baku padedha iisi! Beꞌa risi loe aa baku lela dedha! 21 Te dhèu Yahudi sèra nuka sèmi dadana dhu muri mema, dhu cèu uru tèka. Te ngaa Lamatua tèke eele boe si toke panèbhu ètu èèna. De ladhe èu parcaya boe taruu mi Lamatua, mage èu maena ho Na soro tèke èu taruu ètu èèna!
22 De miu hudꞌi pangee pabeꞌa-beꞌa ku. Ama Lamatua mema dꞌara hua iia. Te ngaa neꞌa hia huku dhu bia kahèi. Pe Nèngu huku dhèu dhu manahu le, dhu pabeꞌa heka dènge Ne. Te ngaa mi miu dhèu Yahudi boe, Lamatua padꞌelo dꞌara hua iia Na, sadꞌi miu paꞌèki taruu dènge Ne, aa miu sèmi mere babeꞌa Na. Te ngaa ladhe miu sèmi mere boe jꞌara sèmi èèna, Lamatua pare eele kahèi miu nèti ajꞌu Na. 23 Sama sèmi èèna kahèi dènge dhèu Yahudi sèra. Ladhe ra ele-hoꞌa ka, ho mulai parcaya Kristus, pe Lamatua tape hari rèngu mi ajꞌu uru èèna. Te Nèngu dènge koasa ho bisa tao jꞌara sèmi èèna! 24 Te miu dhu dhèu Yahudi boe, nuka sèmi dadana nèti ajꞌu saitun hui, dhu muri tabꞌa ètu liꞌu oka. Te ngaa Lamatua hagꞌe nare miu, ka pakajꞌèpe laa mi ajꞌu saitun dhu hua iia, dhu Na sèle ètu dꞌara oka Na, sèna ka hudꞌi laa ajꞌu hui èèna leko-leo, aa ajꞌu ètu dꞌara oka leko-leo. Te ladhe dhèu Yahudi boe, bisa jꞌajꞌi sèmi sèra, ngaa hari dhèu Yahudi. Rèngu bisa risi eele hari, ladhe Lamatua pakajꞌèpe hari si mi laa ajꞌu rèngu unu ra.
Bèli-camèdꞌa dhèu Yahudi pabeꞌa hari dènge Lamatua
25 Aꞌari ètu Roma! Miu hudꞌi meꞌa ku ngaa dhu uru èèna jꞌajꞌi mi rahasia. Te ladhe miu meꞌa, miu mage pakapai iisi, dhu peka na, miu dꞌèlu-mèu risi. Te jꞌara na sèmi neꞌe: limuri ne dꞌara dhèu Yahudi, adhu sèmi hadhu, aa roꞌo boe parcaya Kristus. Te ngaa rèngu bisa boe sèmi èèna taruu. Te ladhe dhèu Yahudi boe aaꞌi-aaꞌi dhu Ama Lamatua pili nare si, parcaya le Kristus, bèli-camèdꞌa dhèu Yahudi sèra parcaya Ne kahèi. 26 De ladhe dꞌai ka lodꞌo na, pe Lamatua patalale dhèu Yahudi aaꞌi-aaꞌi nèti koasa sasala-sasigo ra. Jꞌara neꞌe jꞌajꞌi, nuka sèmi dhu suri tèke ètu dꞌara Sasuri Mola-Mèci, dhu peka na,
“Bèli-camèdꞌa Dhèu èci mai,
dhu patabuli èdhi nèti mamadhe-mamopo.
Nèngu mai nèti ledhe Sion, nuka kota Yerusalem.
Èèna na, Nèngu ka dhu tao ho ana-èpu Yakob ele-hoꞌa.
Te rèngu mamuri pusi-pahae boe Jaꞌa,
aa ra soro kabodho mi jꞌara mamuri Jaꞌa dhu mola.✡Yesaya 59:20-21
27 Jaꞌa neo saku eele sasala-sasigo ra.
Te Jaꞌa paꞌèki le lii padhadha dènge rèngu sèmi èèna ka.”✡Yermia 31:33-34
28 Lodꞌo-lodꞌo dhèu Yahudi tadèngi Lii Lolo Beꞌa Lamatua, ra tao iisi ra nuka sèmi musu dhu palabꞌa dènge Ne. Dènge sèmi neꞌe ka, rèngu hia jꞌara mi miu dhu Yahudi boe! Masi ka sèmi èèna, te ngaa Lamatua sue si era, lula Na sue bèi-baki ra, aa Na hagꞌe nare si jꞌajꞌi dhèu unu Na. 29 Te ladhe Ama Lamatua hia le mèdha èci, Na nare heka. Aa ladhe Na paroa nare le dhèu, peka na, “Mai madhutu Jaꞌa! Mai asa dꞌara ho jꞌajꞌi dhèu Jaꞌa!” Na babège eele heka si.
30 Uru èèna, miu dhèu Yahudi boe, moꞌo boe nanene Lamatua. Te ngaa limuri ne, miu sèmi mere rasa kasia nèti Lamatua, lula dhèu Yahudi roꞌo boe nanene Ne. 31 De rèngu seꞌe ka dhu limuri ne roꞌo boe tao madhutu dadꞌèi Lamatua. Nèti èèna ka, Lamatua neo padꞌelo rasa kasia Na mi miu era. Aa bèli-camèdꞌa Nèngu neo padꞌelo rasa kasia Na mi dedha rèngu kahèi. 32 Limuri ne, Lamatua tao ai-hèbꞌa mi dedha dhèu Yahudi, èci èèna ka dènge dhèu Yahudi boe. Te aaꞌi-aaꞌi ra tao boe madhutu dadꞌèi Na, nuka sèmi rèngu ètu dꞌara babèdho, aa reꞌa boe jꞌara kalua. Lamatua soro tèke si sèmi èèna, sèna ka Na bisa padꞌelo rasa kasia Na mi dhèu aaꞌi-aaꞌi ra.
Lamatua ne beꞌa seli eele!
33 Ama Lamatua dꞌèlu-mèu titu kèna!
Aa Na pake mamèu Na, sèna ka tao jꞌara hua iia.
Abhu boe ca dhèu sa dhu tadhe mèu Ne.
Abhu boe dhèu èci sa dhu neꞌa mèu jꞌara-jꞌara dhu Lamatua pamaꞌète lii langu.
Abhu boe ca dhèu sa kahèi dhu neꞌa mèu,
nga tao ka Lamatua adꞌu-ue jꞌara èci.✡Yesaya 55:8
34 Abhu boe dhèu èci sa dhu neꞌa mèu ngangee Ama èdhi.
Abhu boe ca dhèu sa dhu bisa holo Ne.✡Yesaya 40:13
35 Abhu boe dhèu dhu bisa hia iia Lamatua mèdha èci.
Abhu boe dhèu èci sa dhu bisa laka-seti Lamatua sèna ka Na bꞌala hari!✡Ayub 41:11
36 Te aaꞌi-aaꞌi kapua ra nèti Ama Lamatua!
Aaꞌi-aaꞌi jꞌajꞌi, lula Nèngu ka!
Aaꞌi-aaꞌi dhu èdhi tao,
èdhi sabꞌa hia Ne.
Èdhi koa-kio Ne,
taa-taa toke dꞌai mia-mia!
Lèke tareꞌa-reꞌa!✡1 Korintus 8:6