27
Tetini ipan tepetl Ebal para se tlailnamiquistli
1 Teipa Moisés ininhuaya nopa huehue tlacame tlen israelitame quinnahuatijque nopa tlacame huan quinilhui:
“Xijtoquilica nochi ni tlanahuatili tlen ama nimechnahuatía. 2 Ipan nopa tonal quema inapanose nopa atemitl Jordán huan incalaquise ipan nopa tlali tlen imoTECO Dios inmechmacas, monequi xiquinquejquetzaca tetini tlen huejhueyi huan xiquinchipahualtica ica nextli. 3 Huan ipan nopa tetini xiquijcuiloca nochi tlajtoli tlen nochi ni tlanahuatili tlen nimechnahuatijtoc xijchihuaca. Ya ni inquichihuase quema achtohui inajsitij ipan nopa tlali tlen nochi temaca hasta mocahua tlen imoTECO Dios inmechmactilis queja quiijtojtoc quichihuas. 4 Huajca quema ya inquipanotose nopa atemitl Jordán, monequi xijtlalanaca ipan tepetl Ebal nopa tetini tlen ya nimechilhuijtoc, huan xiquinchipahualtica ica nextli. 5 Nojquiya monequi xijchihuaca se tlaixpamitl ica tetini para imoTECO Dios, huan amo xiquintejtequica nopa tetini ica niyon se tepostli. 6 Xiquintequihuica tetini tlen nejnejmajtic huan ax tlatectli para ica nopa xijchihuaca nopa tlaixpamitl. Huan nopona ipan nopa tlaixpamitl xijmactilica imoTECO Dios tlacajcahualistli tlatlatili. 7 Xijmacaca tlacajcahualistli para tlasehuilistli huan nopona iixtla imoTECO Dios xijcuaca tlen nopa tlacajcahualistli huan xiilhuichihuaca. 8 Ipan nopa tetini xiquijcuiloca para cuali ma nesi nochi ni tlajtoli tlen nochi ni tlanahuatili.”
9 Teipa Moisés ihuaya nopa levita totajtzitzi quinilhuijque nopa israelitame:
“Israelitame, amo ximolinica. San xijtlacaquilica. Ama imojuanti inmocueptoque itlacajhua imoTECO Dios. 10 Huajca monequi xijneltoquilica imoTECO Dios huan xijchihuaca nochi itlanahuatilhua huan itlamachtilhua tlen ama timechnahuatijtoque xijchihuaca.”
Tlen quinajsis israelitame intla ax quineltocase
11 Huan nojquiya ipan nopa tonal Moisés quinilhui nochi nopa tlacame:
12 “Quema inquipanotose nopa atemitl Jordán, nopa huejhueyi familias tlen Simeón, Leví, Judá, Isacar, José huan Benjamín moquetzase ipan nopa tepetl Gerizim para tlayolmelahuase tlaque tlatiochihuali inisraelitame inquipantise intla inquineltocase TOTECO. 13 Huan nopa huejhueyi familias tlen Rubén, Gad, Aser, Zabulón, Dan huan Neftalí moquetzase ipan tepetl Ebal para tlayolmelahuase tlaque tlatelchihuali inquiselise intla ax inquineltocase TOTECO. 14 Huan nopa levitame tlananquilise ica inintos tlen chicahuac para nochi inisraelitame inquicaquise huan quiijtose ni tlajtoli:
15 “Tlatelchihuali ma eli tlen quichijchihuas se tlaixcopincayotl ica tepostli tlaatilili, o tlen ica ima quinchijchihuas tiotzitzi, huan ixtacatzi quintlalis canajya campa axaca quimatis intla quinhueyitlalis. Ya nopa TOTECO ax quinequi quiitas.
Huan nochi inisraelitame inquiijtose: ‘Queja nopa ma eli.’
16 Tlatelchihuali ma eli tlen ax quitlepanitas itata o inana.
Huan nochi inisraelitame inquiijtose: ‘Queja nopa ma eli.’
17 Tlatelchihuali ma eli tlen quipatlas nopa tetini tlen quinextía se nepamitl para quiichtequilis seyoc itlal.
Huan nochi inisraelitame inquiijtose: ‘Queja nopa ma eli.’
18 Tlatelchihuali ma eli tlen quicuapolos ipan ojtli se tlen popoyotzi.
Huan nochi inisraelitame inquiijtose: ‘Queja nopa ma eli.’
19 Tlatelchihuali ma eli tlen quichihuilis tlen ax xitlahuac se sejcoyoc ejquetl, o se cahualtzi o se icnotzi.
Huan nochi inisraelitame inquiijtose: ‘Queja nopa ma eli.’
20 Tlatelchihuali ma eli tlen ihuaya motecas isihua itata pampa quiixpanotoc itata.
Huan nochi inisraelitame inquiijtose: ‘Queja nopa ma eli.’
21 Tlatelchihuali ma eli tlen quichihuas tlen hueli ica se tlapiyali.
Huan nochi inisraelitame inquiijtose: ‘Queja nopa ma eli.’
22 Tlatelchihuali ma eli tlen ihuaya motecas isihua icni o se tlen icone itata o inana.
Huan nochi inisraelitame inquiijtose: ‘Queja nopa ma eli.’
23 Tlatelchihuali ma eli tlen ihuaya motecas imona.
Huan nochi inisraelitame inquiijtose: ‘Queja nopa ma eli.’
24 Tlatelchihuali ma eli tlen quimictis seyoc ixtacatzi.
Huan nochi inisraelitame inquiijtose: ‘Queja nopa ma eli.’
25 Tlatelchihuali ma eli tlen quiselis tomi para quimictis seyoc tlen ax tleno quichijtoc.
Huan nochi inisraelitame inquiijtose: ‘Queja nopa ma eli.’
26 Tlatelchihuali ma eli tlen ax quitlepanitas nochi ni tlanahuatili huan ax quineltocas.
Huan nochi inisraelitame inquiijtose: ‘Queja nopa ma eli.’