1 ¡Ximotlalana, Toteco Dios, huan xiquinsemana nochi mocualancaitacahua!

Xiquinchihua ma choloca tlen moixpa nochi tlen ax mitzcualitaj.

2 Xiquinixpolo queja poctli ixpolihui ipan ajacatl.

Xiquintlamilti queja nopa cera tlen atiya ipan tlitl.

Queja nopa ma ininpanti moixpa nochi ax cuajcualme.

3 Pero nochi tlacame tlen itztoque xitlahuaque ma paquica iixpa Toteco Dios huan ma huitonica ica paquilistli.

4 Xijhuicatica Toteco huan xijpaquilismacaca.

Xijhueyitlalica yajaya tlen nejnemi iixco mixtli,

yajaya tlen itoca TOTECO.

Xipaquica miyac iixpa ya.

5 Toteco Dios yajaya inintata tlen icnotzitzi.

Yajaya quinchihuilía tlen xitlahuac nopa cahual toahuihua,

pampa yajaya tlatzejtzeloltic.

6 Toteco Dios quinmaca ininchampoyohua tlen itztoque ininseltitzi.

Huan quinmalacanía tlen quintzactoque.

Pero tlen motlepanitaj quintitlanilía mayantli huan tlaijiyohuilistli.

7 Toteco Dios, quema tiquinyacantiyajqui motlacajhua tlen tlali Egipto

huan tiquinhuicac ipan nopa huactoc tlali,

8 nopa tlali mojmolini huan huetzqui atl tlen elhuicactli moixpa.

Nopa tepetl Sinaí mojmolini moixpa ta tlen titoTeco tiisraelitame.

9 Toteco Dios, ta tijchijqui ma huetzi miyac atl ipan ni tlali tlen tiquinmacac motlacajhua.

Quena, ica nopa atl tiquinfuerzajmacac tlen moaxcahua quema tlahuel tlaxicojtoyaj.

10 Yeca motlacajhua mocajque nica ipan ni tlali.

Huan ta ica moteicnelijcayo tiquinmacac nopa teicneltzitzi nochi tlen monequiyaya para ica mopanoltise.

11 Toteco quiijto para ya tlatlantoya,

huan miyac tlacame tzajtzique chicahuac para tepohuilise tlen panotoc.

Quiijtojque:

12 “Cholojtejque nopa soldados tlen hualajtoyaj para techtzontlamiltise.”

Quena, ama nopa israelita sihuame momajmacaj nochi tlamantli tlen quicajtejque nopa soldados.

13 Xiquitaca, yonque quinmocuitlahuiyayaj borregojme,

ama nopa sihuame hasta petlanij ica oro huan plata.

Nochi inintlacayo quitlamitzactoque ica tlamantzitzi tlen yejyectzitzi queja se paloma quitlamitzacua itlacayo ica ieltlapal.

14 Toteco Dios Tlen Quipiya Nochi Chicahualistli quinsemana icualancaitacahua queja nopa setl tlen huetzi ipan tepetl Salmón.

15 Nochi nopa tepetini tlen huejcapantique tlen mopantíaj ipan tlali Basán iaxcahua Toteco huan nelía yejyectzi inintzonatipa,

16 pero ma ax mochicoitas ica nopa Tepetl Sion tlen TOTECO quitlapejpenijtoc para ipan itztos para nochipa.

17 Toteco Dios quisqui ipan tepetl Sinaí ica millones icuacarrojhua huan ielhuicac ejcahua.

Yajaya yajqui ipan itiopa tlen tlatzejtzeloltic ipan tepetl Sion.

18 Quema Toteco tlejcoc elhuicac campa más huejcapa,

quichihuayaya queja se tlatlanquetl tlen mocuepa ipan se tlatehuijcayotl,

huan quinhuicac ilpitoque nopa tlacame tlen quintlantoya para iaxcahua.

Huan nopa tonal Toteco quiseli regalos tlen nochi tlacame,

hasta nojquiya tlacame tlen ax quinejque quitlepanitase.

Huan ama TOTECO temachtli itztos ica tojuanti.

19 Ma tijpaquilismacaca Toteco,

pampa yajaya mojmostla techmaca itlatiochihualis.

Yajaya Toteco tlen techpalehuía huan techmaquixtía.

20 Toteco Dios, yajaya tlen techmalacanía tlen ininmaco tocualancaitacahua.

Huan yajaya Toteco tlen techmanahuía para ax timiquise.

21 Temachtli Toteco quintzontlamiltis nochi icualancaitacahua,

pampa inijuanti tlahuel yoltetique huan ax quinequij quicahuase inintlajtlacolhua.

22 Toteco quinilhuijtoc itlacajhua:

“Na niquinhualicas nochi imocualancaitacahua.

Niquincuiti yonque motlatijtose ipan nopa huejcapantic tepetl tlen itoca Basán,

o yonque motlatijtose hasta atzintlaj ipan nopa hueyi atl.

23 Niquinhualicas pampa monequi nochi inquintzontlamiltise.

Inieso quixolonise imoicxihua huan imochichihua quipipitzose.”

24 NoTeco Dios, tinotlanahuatijca,

niquinita miyac tlacame mitztoquilíaj para yase ipan motiopa.

25 Inijuanti tlen huicaj tlayacantiyohuij.

Tlatlajco yohuij nopa ichpocame tlen quitzilinijtiyohuij panderos.

Tlatepotzco yohuij tlen tlatzotzonaj.

26 Huan quej ni huicaj:

“Nochi inisraelitame, xijhueyimatica Toteco Dios.

Xijpaquilismacaca Toteco tlen techmacatoc yolistli nochi tojuanti.”

27 Tlayacantiyohuij iixhuihua Benjamín.

Huan tlatepotzco hualahuij nopa tlayacanani huan huehue tlacame tlen iixhuihua Judá,

huan nopa tlayacanani tlen iixhuihua Zabulón huan Neftalí.

28 Toteco Dios, ica mohueyi chicahualis xijchihua nochi tlen titechilhuijtoc.

Quena, xijnexti mohueyi chicahualis para sequinoc ma quiitaca nopa huejhueyi tlamantli tlen ta titechchihuilijtoc.

29 Nopa tlanahuatiani tlen nochi tlaltini quihualicaj iniofrendas ipan motiopa tlen eltoc ipan altepetl Jerusalén.

30 Toteco Dios, xiquinajhua tocualancaitacahua.

Xiquinechcapantlali nopa tlacame tlen mosisiníaj queja torojme,

huan xiquinchihua ma motemactilica ica ta.

Ma mitzhualiquilica inintepos plata queja se ofrenda.

Xiquinsemana nopa mosisinijca tlacame tlen tlahuel quinpactía tlatehuise.

31 Nopa Egipto ehuani quinhualicase inintelpocahua huan nochi tlamantli ininteposhua tlen yejyectzitzi huan pajpatiyo.

Huan nopa Etiopía ehuani momatlalanase moixpa para mitzhueyichihuase.

32 Nochi intlanahuatiani ipan nochi ni tlaltepactli,

xijhuicatica Toteco Dios.

Xihuicaca huan xijpaquilismacaca Toteco.

33 Yajaya tlen nentinemi ipan nopa elhuicactli tlen hasta huejcajquiya eltoc.

Xijcaquica itos tlen chicahuac caquisti queja quema tlatomoni.

34 Xiquinpohuilica nochi tlacame quejatza hueyi ichicahualis Toteco Dios.

Huan itlatlanex ajsi ipan nochi israelitame.

Quena, nelía tlahuel hueyi ichicahualis nepa elhuicac.

35 Ma tijhueyitlepanitaca Toteco Dios pampa temajmati ihueyitilis nopano ipan itiopa.

ToDios tiisraelitame quinmaca tetili huan chicahualistli nochi itlacajhua.

¡Ma tijpaquilismacaca Toteco Dios!