Cuale Tlamachestelestle san quiene ca oquejcuelo
SAN JUAN
1
Yejuatzi Tlajtule nechihualuc tlöcatl
Cuöc noche opie ye iloaya Tlajtule, hua yejuatzi Tlajtule iloaya ca Deus, hua yejuatzi Tlajtule iloaya Deus. Yejuatzi oiloaya ca Deus desde cuöc opie noche sösantle. Yejuatzi quechejchijque noche sösantle; hua sin yejuatzi amo omochihuane niontle de lo que tli omochejchi. Tieca yejuatzi oyeya nemelestle, hua ini nönca nemelestle oyeya tlöbile para tlöca. Hua tlöbile tlaniextea ipa tlajtlayohuaquelestle; cache tlajtlayohuaquelestle abele oquexexico tlöbile.
Ohuöla sente tlöcatl que Deus ocualtitlanque. Itucö oyeya Xohuö. Ini nönca ohuöla para iyes testigo para ma tlatestificöro de inu tlöbile, para que por itlajtul ma moneltocacö innochtie. Yaja amo oyeya inu tlöbile, tlöcamo ohuöla para ma tlatestificöro de inu tlöbile.
Yejuatzi öque iloac tlöbile tli melöhuac, öque quentlaniextelilo noche tlöca, ohualiloaya ipa ini nönca tlöltecpactle. 10 Ipa tlöltecpactle oiloaya, hua yejuatzi oquechejchijque tlöltecpactle; pero tlöltecpactlöca amo tieixomatque. 11 Ohualiloac ipa tli tiehuöxca, pero tli tiehuöxcahua amo tieselejque. 12 Cache innochtie öque tieselejque quenmacaque beletelestle para ma mochihuacö tiepelhua de Deus, quejtusneque noche tli moneltoca tietucöyupantzinco. 13 Pos otlöcatque quiename tiepelhua. Ini intlöcateles amo oyeya de yestle, nimpor amo omochi por itlaeliebeles de tonacayo, nimpor porque tlöcatl oquenec, cache Deus oquenchihualtejque ma tlajtlöcatecö.
14 Hua yejuatzi Tlajtule nechihualuc tlöcatl, hua totzölö nemoac, hua otequejtaque tiecualniexteles. Hua tiecualniexteles oyeya quieme sa de sente Conietzi de Deus tieTajtzi. Tiechbiquelitz tiemeyac favur Deus hua lo que tlin melöhuac.
15 Xohuö tlatestificöro de yejuatzi. Tzajtzec checöhuac hua oquejto:
―Yejuatzi nöiloac de öque nequejtoöya naja cuöc nequejto: “Öque biloatz sötiepa de naja, cache bieyetzintle iloac que naja; ipampa nemoaya cachto de naja”.
16 Pos de noche tli quepealo otecselejque tejua tonochtie, hua tiechmacalo favur hua oc cache meyac favur. 17 Pos Moisés otiechmacac iley; cache tecpea favur hua tlin melöhuac por medio de Jesucristo. 18 Deus ayec yeca tieyejtac. TiesenteConietzi, öque iloac Deus, öque tieTajtzi lalebes tietlasojtlalo, yejuatzi otiechniextelejque tieTajtzi ca tejua.
Xohuö Bautista tlajtlajto de Cristo
19 Yaja ini nönca lo que tli oquepu Xohuö. Joriojte de ciudad de Jerusalén oquentitlanque teopexcötzetzi hua levitas tli tequeteya ca yejua. Oquentitlanque para ma quetlajtlanicö Xohuö:
―¿Öquenu tecaca taja?
20 Hua yaja amo quenegöro, cache oquejto:
―Amo naja neCristo.
21 Hua oquetlajtlanejque:
―¿Tli noso? ¿Taja tecaca teElías?
Oquejto:
―Amo necaca.
―¿Taja tecaca inu tlayulepante tli huölös?
Onöhuat:
―Amo.
22 Yecuöquenu oquelfejque:
―¿Öquenu noso taja? Xetiechelfe para tequenmelfisque öque tiechhualtitlanque. ¿Tli tequejtoa taja de taja mismo?
23 Oquejto:
―Naja necaca tli netzajtze ipa locör cöne nionöque chönte hua nequejtoa: “Xecmejmelöhuacö tieojfe Tlöcatzintle”. Pos ejqueu oquejto inu tlayulepante Isaías que naja necchihuasquea.
24 Hua yejua fariseos oquentitlanque ini nöncate tlöca. 25 Hua oquetlajtlanejque:
―¿Tlica noso tetlacuötiequea tlö amo taja tecaca teCristo, nimpor teElías, nimpor tetlayulepante tli huölös?
26 Hua Xohuö oquennönquele, oquejto:
―Naja netlacuötiequea ca ötzintle; cache nemonepantla de nemejua ye iloac öque nemejua amo nentieixomate. 27 Yejuatzi iloac öque biloatz sötiepa de naja. Naja amo necmeresieroa nion para netiequextelis tiecacua.
28 Ini nönca sösantle omochi itlac inu puieblo de Betania, ca nepa löro de ötlactle Jordán, cöne Xohuö tlacuötiequiöya.
Tiecalnielojtzi Deus
29 Ipa mustlateca Xohuö tieyejtac Jesús que hualiloöya ca itlac, hua oquejto:
―Xetieyejtacö tiecalnielojtzi Deus, öque quecuetlabiltisque para quequextisque tlajtlacule de tlöltecpactlöca. 30 Ini nöiloac de öque onequejto: “Sötiepa de naja biloatz sie tlöcatl que cache bieyetzintle iloac que naja, pos nemoaya cachto de naja”. 31 Hua naja ayemo netieixomateya. Pero para ma tieixomatecö giente de Israel, ipampaju nehualtlacuötiequiöya ca ötzintle.
32 Hua Xohuö nuyejque oquejto:
―Onetieyejtac Espíritu Sönto hualtemoac de elfecac quiename palumax hua onesiebiluc tiepa. 33 Hua naja ayemo netieixomateya, cache öque niechhualtitlanque ma netlacuötieque ca ötzintle, yejuatzi niechelfejque: “Ipa öque tetieyejtas temoas Espíritu Sönto hua ipa yejuatzi nesiebilus, yejuatzi tlacuötiequilus ca Espíritu Sönto”. 34 Hua naja onetieyejtac, hua ye netlatestificörojteca que yejuatzi iloac tieConietzi Deus.
Jesús quennutzque seque tiemachtejcöhua
35 Ipa mustlateca ocsajpa ijcataya Xohuö ca unte de imachtejcöhua. 36 Hua cuöc tieyejtac Jesús que ca ompa nejnemoaya, oquejto:
―Xetieyejtacö tiecalnielojtzi Deus.
37 Hua inu unte oquecajque lo que tli oquejto hua otietocaque Jesús. 38 Hua cuöc nemacuc bielta Jesús hua oquenmejtaque quiene tietocaya, oquenmelfejque:
―¿Tli nenquetiemoa?
Hua yejua oquejtojque:
―Rabbí―quejtusneque Maestro―. ¿Cöne tomochöntelea?
39 Oquenmelfejque:
―Xehuölöcö hua nenquejtasque.
Ohuölajque entunses hua oquejtaque cöne chöntihuaya, hua omocöjque tieca inu tunale. Pues ye oyeya quieme pa nöbe ura ca ye yohuac. 40 Andrés, icni Semu Piero, oyeya sente de inu niecate unteme tli oquecajque tli oquejto Xohuö hua otietocaque Jesús. 41 Ini nönca nima oqueniexte Semu icni, hua oquelfe:
―Ye otetieniextejque Mesías―quejtusneque Cristo noso Tlaixpejpentle de Deus.
42 Hua oquehualecac tieca Jesús. Hua cuöc oquejtaque Jesús, oquelfejque:
―Taja tecaca teSemu, iconie Xohuö. Taja motucöyu iyes Cefas ―quejtusneque Piero, noso Tietetu.
Quennutzque Felipe hua Natanael
43 Hua pa mustlateca oquenejque biloas ca estado de Galilea. Oqueniextejque Felipe. Jesús oquelfejque:
―Xeniechtoca.
44 Pos Felipe oyeya de inu puieblo de Betsaida, cöne chajchönteya Andrés hua Piero. 45 Felipe oqueniextito Natanael, hua oquelfe:
―Otetieniextejque inu tlöcatl de öque oquejcuelo Moisés ipa iley hua de öque oquejcuelojque inu tlayulepantejque. Yejuatzi Jesús iconie Josie, de inu puieblo de Nazaret.
46 Hua oquelfe Natanael:
―¿Cuale quisas de Nazaret canajyetla tlin cuale?
Oquenönquele Felipe:
―Xehuöla hua xequejtaque.
47 Hua Jesús oquejtaque Natanael que ohuölöya tietlac, hua oquejtojque de yaja:
―Xequejtacö, de melöhuac yaja ini nönca ica sente israelita que amo tlacajcayöhua.
48 Otieyelfe Natanael:
―¿De cöne teniechmixomachele?
Onöhuatihuac Jesús, hua oquelfejque:
―Antes que Felipe metznutzato, cuöc oteyeya itzintla icox cuabetl, temetzejtac.
49 Onöhuat Natanael, hua oquejto:
―NoTiemachtejcötzi, tejuatzi tetieConietzi Deus; tejuatzi terey de Israel.
50 Onöhuatihuac Jesús hua oquelfejque:
―Ipampa otemetzelfe que otemetzejtac itzintla icox cuabetl, ¿por inu tomoneltoca? Cache bejfeye sösantle tequejtas que ini.
51 Hua nuyejque oquelfejque:
―Melöhuac, melöhuac nemiechelfea: Nenquejtasque elfecac tlapojtas, hua nopa naja que onochi netlöcatl tlejcusque hua temusque tieöngeles Deus.