19
1 Sötiepa de inu onejcac quieme tlajtulte checöjque de meyactie giente ompa elfecac. Quejejtoöya:
Nemöquextelestle hua yectieniebelestle hua checöhualestle tiehuöxcatzi toDeus.
2 Pos yejuatzi tlaestlöculo melöhuac hua quiene conbenierebe.
Porque yejuatzi ye quecuntenörojque inu cacherila,
yaja tli quenmajmöhuaya tlöltecpactlöca ca itlajtlacul,
hua yejuatzi ye quecuepelejque ipa yaja inmequeles de tietlatequepanojua.
3 Hua ocsajpa oquejtojque:
¡Aleluya!
Hua inu puctle nochepa tlejcotas.
4 Entunses inu veinticuatro biebentzetzi hua inu nöbeme tli yojyulejtecate motlancuöquetzque ca inxöyac tlölpa, hua tieteochijque Deus öque yehualuteca ipan trono. Oquejtojque:
―Amén, ma ejqueu iye. ¡Aleluya!
“Ye aseco tiempo para nesohuajtilus Calnielo”
5 Entunses ocaquestec desde inu trono sente tlajtule tli quejtoöya:
Xetiecuicaticö toDeus, noche nemejua nentietlatequepanojua,
hua nemonochtie tli nentiemabelea, sea tzequetzetzi noso bejfeye.
6 Nuyejque onejcac quieme tlajtulte de meyac giente, quieme caqueste meyac ötzintle, hua quieme cuöc checöhuac tlatecuine. Quejejtoöya:
¡Aleluya!
Ye opiehualuc tlagobernörusque Tlöcatzintle,
yejuatzi toDeus, öque quepealo noche checöhualestle.
7 Ma tepajpöquecö, ma tieme toyulo de pöquelestle, ma tetiechamöhuacö,
ipampa ye aseco nönca tiempo para nesohuajtilus yejuatzi Calnielo,
hua inu tli iyes tiesohua ye moyecchejchi.
8 Hua quepermetierfejque ma motlaquente ca tzotzomajtle de lino chepöhuac hua tzotlöne.
Pos inu tzotzomajtle de lino querepresentöroa lo que tlin cuale oquechijque yecteque.
9 Entunses niechelfe:
―Xequejcuelo ini nönca: “Cuale inmicnupel de niecate tli quentlalfejque para tlacuösque cuöc nesohuajtilus Calnielo”.
Nuyejque niechelfe:
―Ini nöncate tlajtulme cate tietlajtulhua de Deus hua cate melöhuac.
10 Entunses notlancuöquetz icxetla para necteochihuas. Pero niechelfe:
―Amo xecchihua inu. Naja nuyejque neca netietlatequepano de Deus quieme taja hua quieme mocnihua tli tlatestificöroa de Jesús. Sa xetieteochihua Deus. Tiemensöje de Jesús ica lo más importönte de lo que tli quejtoöya tlayulepantejque.
Hualyehualutöya sie tlöcatl ipa sente caböyo istöc
11 Entunses nequejtac omotlapö elfecac, hua moniexte sente caböyo istöc. Hua yejuatzi öque ipa hualyehualutöya iloac melöhuac hua ayec nepatlalo, hua yejuatzi tlajuscöruro hua quechihualo guierra quiename conbenierebe. 12 Tieixtelolojua tzotlöneya quieme cuöc möna tletzintle, hua ipa tietzonteco quebicaloöya meyactie corunajte. Hua quepealoöya sente numbre tlajcuelulyeya tli solamiente yejuatzi quematiloöya. 13 Hua quepealoöya tietlaquie que motlapalulte ca yestle, hua necuitiloöya Tlajtule de Deus. 14 Hua tietocaya inu ejército de elfecac, ca intlaquie de lino cuale hua chepöhuac hua istöc, hua ipa oyejyetöya caböyojte istöque. 15 Hua de ijtec tiecamac quisaya sente espöda bieye hua tlateque para que ca inu espöda quenmacasque naciones; hua yejuatzi quemixutisque ca sente tlacutl de tepostle. Hua yejuatzi iloac öque quenpötzcalo inu uvas ijtec inu tönque de uvas tli querepresentöroa tiecualöneles hua tietlabiemequeles de Deus öque quepealo noche checöhualestle. 16 Hua ipa tietzotzoma hua itech tiequiescuajyo tlajcuelulyeya sente tucöyutl:
REY DE REYES HUA TLÖCATZINTLE DE TLÖCATZETZINTE
17 Entunses nequejtac sente öngel ijcataya ijtec tunale. Quentzajtzele checöhuac noche yulcöme tli patlöne, oquemelfe:
―Xehuölöcö hua xomosentlölicö para nenquecuösque inu bieye tlacuale tli Deus nemiechmacasque. 18 Pos nenquecuösque innacayo de reyes hua de coronielte hua de tli checöjtecate, hua de caböyojte hua de tli ipa tlejcoöya caböyojte, hua de innochtie giente, sea esclavos noso amo, sea bejfeye noso tzequetzetzi.
19 Hua nequejtac que inu petzoyulcötl hua reyes de tlöltecpactle ca insoltörojua mosentlölejque para mopeleörusque ca yejuatzi öque biloaya ipa inu caböyo istöc hua ca tiesoltörojua. 20 Hua caseque prieso inu petzoyulcötl ihua inu tlayulepante istlacatque. Yaja inu tlayulepante istlacatque oyeya tli quechihuaya tietzöbeme ixtla petzoyulcötl. Hua ca inu tietzöbeme quencajcayöhuaya nieca giente tli queselejque inu sieñas de inu petzoyulcötl hua queteochijque itesönto. Inu petzoyulcötl hua inu tlayulepante istlacatque innehua quentitlanque san quiene yojyulejtöya ijtec inu locör de tletzintle tli xutla ca azufre. 21 Hua tli mocöjque giente quenmejmectejque yejuatzi öque yehualutaya ipa caböyo. Quenmejmectejque ca tieespöda tli quisaya de ijtec tiecamac. Hua inu yulcöme tli pajpatlöne ixbeque de innacayo de inu giente.