HEBERA NE
Tcgãyas Hebera ne góá mááèa sa
Téé-cookg'ai sa
Tcgãyas Hebera ne di sa kò xg'aes dtcòm̀-kg'ao ne di sa góá mááèa, ncẽe kò gane di xgàrasean domka tshoa-tshoa a ko gane di dtcòm̀an aagu ne. Góá-kg'ao ba kò gane di dtcòm̀an koe ntcàm ne, a ko Jeso Kreste ba tseegu dim Nqari Me e sa x'áí. Nqoana gúùan cgoam ko tseeguan x'áí:
1. Jeso ba chõò tamam Cóá Me e Nqarim di ba, ncẽe kò tseegu di komsanan xgaa-xgaase ba, Xõòm koe guu a, ẽem kò hãa-q'ooa xgàrasean koe. Nqarim dim Cóám iisem, Jeso ba moengelean koe hẽé, naka Ncìís Qáé-xg'aes di xu porofiti xu hẽé, naka Moshem koe ga hẽéthẽé cgáé Me e.
2. Cám̀ dis kam Jeso ba Nqarim ka nxárá tcg'òóèa hãa, chõò tamasem gha peresiti ba ii ka, peresiti xu Ncìís Qáé-xg'aes di xu ka cgáé iise.
3. Kaiam Peresitim iisem, Jeso ba tseegu di kgoarasean óágara hãa, me dtcòm̀-kg'ao ba gaa domka chìbian koe hẽé, naka q'áòan koe hẽé, naka x'ooan koe hẽéthẽé kgoaraèa. Ncìís Qáé-xg'aes di x'aè kas xg'ao kgoaraku sa x'áíè, igabas ncẽeska Jesom koe xg'ara-xg'araèa hãa.
Góá-kg'ao ba ko dtcòm̀an di qarian x'áí Iseraele di ne dtcòm̀-kg'ao ne di kg'õèan koe, a ko gam di ne nxárá-kg'ao ne ncẽeta ma ntcàm, dtcòm̀a hãase ne gha qarika téé sa (11 dim tceem koe). A ba a ko 12 dim tceem koe gam di nxárá-kg'aoan ntcàm, gane di tcgáían ne gha Jesom koe qãea tòó, xháé zi hẽé naka qóḿ zi hẽéthẽé ẽe gha hàà cgae ne zi koe.
Qaa-qaasa kg'uia ne:
- peresiti, chìbi, dàòa-mááku, còrè-nquu
- qáé-xg'ae
- dtcòm̀
- Kreste ba moengele xu ka cgáé Me e (1–2)
- Kreste ba Moshe ba hẽé naka Joshuam ka hẽéthẽé cgáé Me e (3–4)
- Kreste ba peresiti xu ka cgáé Me e (5–7)
- Krestem dis qáé-xg'ae sa Ncìís Qáé-xg'aes ka cgáé si i (8–9)
- Krestem di dàòa-máákua ne cgáé e (10)
- Dtcòm̀ sa (11–12)
- Nqari ba ko qãè-tcaokagu zi tséé zi (13)
Kreste ba moengele xu ka cgáé Me e (1–2)
1
Nqarim dim Cóá ba kaiam ga Me e
Ncìí kuri kam kò Nqari ba káí xu dàò xu tãáka xu cgoa porofiti xu tséékagu a gatá ka tsgõose ga xu cgoa kg'ui, igabagam ncẽeska còo di x'aèan ka ko Gam dim Cóám koe guu a kg'ui cgoa ta a. Gaam ncẽem kò Gam koe guu a nqõó ba kúrú, a wèé zi gúù zi dim q'õò-kg'ao ba kúrú Me ba. Nqarim di x'áà-q'ooa nem ko x'áí, a wèé za ga Nqarim khama ii, a ba a ko wèé zi gúù zi Gam dim kg'uim di qarian ka qgóó. Eẽm ko gatá di chìbian koe q'ano-q'anokuan kúrúa xg'ara kam kò tc'amaka hãam Qarim wèém dim x'õàm kg'áòm xòè koe síí ntcõó.
Nqarim dim Cóá ba moengele xu ka kaia hãa
Ncẽes ma Gam dis cg'õè sa ma moengele xu di cg'õèan ka tc'amaka hãa khamagam gaxu dis téé-q'oos ka tc'amaka hãas téé-q'oo sa máàèa. Gatagam Nqari ba qanega c'ẽem moengele ba bìrí naka máá:
“Tsáá tsia Tiri tsi cóá tsi i,
Ra ncẽem cáḿ koe guu a tsarir Xõò Ra a,”
témé ta ga hãa,
kanam Nqari ba qanega c'ẽem moengele ba bìrí na máá:
“gam ka Xõò bar gha ii,
me gha Tirim cóá ba ii,”
témé ta ga hãa khama.
Igabagam kò Nqari ba ẽem ko Gam dim Cóám tc'ãà di ba nqõóm koe tsééa óá ka máá:
“Wèé moengelean Nqarim di méé i dqo̱m̀ Me,”
témé.
 
Moengele xu kam kòo kg'ui nem ko máá:
“Nqari ba ko Gam di xu moengele xu kúrú xu tc'ãán khama ii,
a Gam di xu tséé-kg'ao xu kúrú xu c'eean di ka̱ru ta̱man khama ii,”
témé,
igabam kòo Cóám ka kg'ui nem ko máá:
“Nqari Tseè,
Tsaris ntcõó-q'oos x'aian di sa
gha chõò tamase hãa.
Tsari ne khóè ne
Tsi ko tchànom dxòm cgoa tc'ãà-cookg'ai.
Eẽ tchàno ii sa Tsi ncàm̀a hãa,
a ẽe cg'ãè ii sa hòrea.
Gaa domkam Tsarim Nqari ba, Nqari Tseè,
Tsáá ka c'ẽe xu nqáéa hãase nxárá tcg'òó Tsia,
a qãè-tcaoan di nxúìan cgoa ntcã̱á tcúú Tsia hãa,”
témé.
 
10 A ba a ko máá:
“X'aigaè,
Tsáá Tsia tshoa-tshoases koe nqõó ba kúrúa hãa,
i nqarikg'aian Tsari tshàuan di tséé e;
11 kaàku i gha,
igabaga Tsi gha Tsáá chõò tamase hãa.
Wèéan ga gha qgáían khama ma cg'ãa-cg'anase,
12 hã̱aèkom qgáím khama Tsi gha ma kabèa xg'ae e,
i gha qgáían ko ma hã̱aè a tcg'òóè
i c'ẽean hã̱aè khamaga ma ka̱bi-ka̱biè,
igabaga Tsi gha Tsáá ẽe Tsi ii khama cúíga ii,
i kuria Tsi chõò tite,”
tam méé.
 
13 Qanegam Nqari ba c'ẽem moengelem kaga máá:
“Ncẽe koe ntcõó Tirim x'õàm kg'áòm xòè koe,
nakar gha nxãakg'aiga síí tsari cg'õo-kg'aoan kúrú
naka i nqàrè-kg'ama tsi dis ntcõó-q'oos koe ntcõó,”
témé ta ga hãa.
 
14 Kháé i nxãaska moengelean dùúa? Kg'amaga xu Nqari ba ko tsééa máá xu tc'ẽe xu u, ncẽe Gam ka tsééa óáèa hãa xu, hàà xu gha khóèan hùi i kgoarasean hòò ka.