Ŋwa' wvu fwe wvu
Jon
Fiɛɛ fì nu ɛ̂ Ŋwa' Jon wvu fwe wvun e
Ŋwa' wvu fwe wvun wvù Jon to saŋɛɛ fô bintaashɛ bi bonyii bo mbee le, kɛŋke bikuu bi mwɛɛm e bifɛɛ. Ɛ̀ nu keeyvuwsɛ mvuntelem mvu bonyii bò wvú to saŋɛɛ fô bó le, lɛ bó eceè yî kentaashɛ le bô bo Nyo' noo Waa we wvù Jisos Klistu bô keetefe bó, lɛ bó eyɛnè fo bó ebiì n'yɛɛyi wvu mbiay e. Wee wvù saŋ ŋwa' wvun nu ɛ loocɛ ɛ ciise lo lɛ, ɛ́ wee cee ɛnte jo n'yuu, wvú saa ebvuu egeè gee di ɛjiwɛ le kɛ. Wvú nu ɛ bvuu ɛ saŋ tɛn lɛ Jisos Klistu to nu naa wee wvu wum, ɛ wee tfuu wvù nu ɛ lese fitele yî ye le ɛ no kooŋke Nyo', kɛŋke tɛn keekooŋke waabwee.
Bikuu bi mwɛɛm e ɛ̂ Ŋwa' wvun e
1:1-4 Keŋkɛwcɛ
1:5–2:29 Saaka wvu ɛkumɛ n'yuu bô ɛjiwɛ
3:1-24 Boom bò ɛ̀ nu bo Nyo' le bô bò ɛ̀ nu bo dɛwle le
4:1-6 Fiɛɛ fì ɛ̀ nu fi kecɛɛy e bô fì ɛ́ nu fi mbiay e
4:7-21 Ɛkumɛ keŋkoŋɛn
5:1-21 Fitele fì wee lese yî Klistu le soo lo fiɛɛ ficii
1
Diɛw yì nyaa nshii
1 2:13-14; Jon 1:1-2, 14; 4:14; 6:35; 8:12; 11:25Fiɛɛ fì bese saaŋke fin nu ɛkumɛ Diɛw yì nyaa nshii yì to nu wase foŋkɛw. Diɛw yì nyaa nshii yin nu ɛ bese to yuw mwɛɛm mvù yí to jemyi, yɛn yí le bô ɛjisɛ ɛyese, taa no yí nu, kum yí le bô can yese. 2 Jon 15:27Nshii wvun nu ɛ bó to duŋcɛ ɛ bese yɛn wvú le, ɛ mum ɛ no jemyi ɛkumɛ wvú, fewci ɛ̂ ben ɛkumɛ nshii wvù mɛy lo wvun wvù to nu bô Ice, ɛ wvú ke duŋcɛ ɛ̂ bese. 3 Fifiɛ fì bese to yɛnɛɛ bvuu yuw, nu fí fì bese fewci tɛn ɛ̂ ben wvu lɛ ben ekɛŋkè kentaashɛ beene. Kentaashɛ kesɛse nu ke bee bo Nyo' Ice bô Waa we wvù Jisos Klistu le. 4 Jon 15:11Bese ɛ mum ɛ no saaŋke fin wvu lɛ njoŋ wesebeene enu ɛ wvú ɛ yiŋsɛn.
Beene eceè ɛnte jo n'yuu
5 Jon 8:121Tim 6:16Wvun nu saaka wvù bese to yuwɛɛ ɛ̂ wvú, ɛ mum ɛ no seŋe ɛ̂ ben lɛ, Nyo' nu n'yuu ɛ kejiwɛ yaa nu naa lo yî ye le kɛ. 6 2:4Nonɛn, ɛ́ beene duu lɛ beene nu yî kentaashɛ le beene ɛ bó, geenɛn kaa lɛne ɛ ɛ̀ nu ɛ̂ kejiwɛ le, tu beene mbiayte lo, yaa cee bii kecɛɛy e kɛ. 7 3:5; Yɛsa 2:5; Ibu 9:12; Mwm 1:5Geenɛn, ɛ́ beene cee ɛnte jo n'yuu no wvù wvú nu ɛnte jo n'yuu, tu beene nu enù yî kentaashɛ le wee noo wee, ɛ ɛlɛmɛ ke Jisos wvù Waa we le cuke beene ɛ beene yuule ɛnte jo bibefɛ bisɛɛbeene bicii. 8 Ɛ́ beene duu lɛ kɛ beene kɛŋke bibefɛ kɛ, tu beene lɛɛle lo bikuu bisɛɛbeene, ɛ kecɛɛy yaa nu yî yese beene le kɛ. 9 Mben 32:3-5Geenɛn, ɛ́ beene seŋe lo bibefɛ bisɛɛbeene ɛ̂ wvú, no wvú nu wee wvù ké no leeme yî diɛw ye le bvuu gee mwɛɛm lɛŋ, tu wvú nu elɛɛshɛ bibefɛ bisɛɛbeene ecukɛ beene, ɛ́ beene eyuule yî gee disɛɛbeene le dicii dì yaa nu kɛ teytey e. 10 Ɛ́ beene duu lɛ beene baa ge kebefɛ kɛ, tu beene joo wvú lɛ wvú nu wee mbiay, ɛ diɛw ye yaa kɛŋke bvudvuu yî yese beene le kɛ.