Ŋwa' Nyo' Moŋkan mo Monfɛm 1 Bita 1

Ŋwa' wvu fwe wvu

Bita

Fiɛɛ fì nu ɛ̂ Ŋwa' Bita wvu fwe wvun e

Ŋwa' Bita wvu fwe wvun nu ɛ wvú to saŋ fô bonyii bo Klistu le bò to nu ɛ saaŋkɛn gɛn no cee mondvuum e jɛɛy jɛɛy (1:1). Fiɛɛ fi baay fì to geɛ ɛ́ wvú sɛ saŋ ŋwa' wvun to nu keetefe bonyii ban no bonyii to bone bikaa ɛ̂ bó ɛjim e, ɛ bó yɛne boŋgɛw nje fitele fì bó lese yî Klistu le. Keetefe bó nonɛn, ɛ Bita mum kume bó ɛkumɛ saaka wvù jee wvu ɛkumɛ Jisos Klistu wvù kpwe ye bô mbuy we yî kpwe le noo ŋkawma we lɛ wen nu ke ekase eto, nu fiɛɛ fì bó etaalè fwe ɛ bó ɛ gɛɛ bvufee yî dvú le.

Bikuu bi mwɛɛm e ɛ̂ ŋwa' wvun e

1:1-2 Keŋkɛwcɛ

1:3-12 Keekume no Nyo' boysee bonyii

1:13–2:10 Ntefe ɛkumɛ keecee nce wvù yuule

2:11–4:19 No ɛ̀ nulo ɛ́ wee Klistu ejoò boŋgɛw bò wvú yɛne

5:1-11 No ɛ̀ nulo ɛ́ wee Klistu eshiwsè ɛkolɛ kew bvuu lemte tɛn fô bonyii le

5:12-14 Kemɛse

1 Ŋwa' wvun saŋ me wvù Bita waa ntum Jisos Klistu. Ɛ me nsaŋ fô bonyii bò Nyo' nu ɛ caw lɛ ɛ̀ nu bew e bò nu ɛ saaŋkɛn ɛ no nu biba bì Bontus bô Galɛshia noo Kafadosia noo Ɛsia noo Bitinia le. 2 Nyo' Icee wesebeene to caw ben no wvú to seysɛɛ wase ɛ ɛ̀ bɛɛ lo lɛ fí nu ke enù. Ɛ Keyoy kew mum seyse ben gɛɛ lɛ ben eyuukè Jisos Klistu wvù nu ɛ cukɛ ben bô ɛlɛmɛ kew e. Nyo' ebuw ben bô kembonɛn naa ntay ebvuu enya ben bô mvuntelem mvù lɛɛtene naa ntay.

Beene cee taale kɛ wase ɛ ɛ̀ nu fwe

3 Mbense enù fô Nyo' le wvù nu Nyo' Tata wesebeene wvù Jisos Klistu bvuu nu Ice. Wvú nu ɛ cam shen fô beene le baay, ɛ boo beene ɛ̂ mboo wvu fwɛ le no Jisos Klistu to buyɛɛ yî kpwe le. Fifin nu ɛ ge beene ɛ no cee keseen taale kɛ wase ɛ ɛ̀ nu fwe, 4 keeke edie bvushɛw bvù wvú nu ɛ gɛɛ ɛ̂ beene woŋ wvu we le. Bvushɛw bvun nu bvù yaa nulo efo, kɛnɛɛ ebefe, kɛnɛɛ ekpwe ncom kɛ. 5 Nyo' gemgeme ben bô mvuŋgay mwew fele yî fitele fì ben nu ɛ lese yî ye le ɛ no cɛyte mboyma wvù nu ke eyenɛ diuu di fokemɛse le. 6 No ben kee nonɛn, ɛ mum ɛ no yuuke njoŋ. Geenɛn ɛ ben kɛŋke kɛ keeyuuke nsase yî kefew e caan nje mmom yì too fô ben e jé le jé le. 7 Yí too keemom laa fitele finɛn fì ben lese yî Nyo' le tɛmyi kɛ ntay ɛ. Kɛ naa ketwaa ke bigew e kè yɛɛle nu ɛ bó ké mom bô ŋguy, ɛ ketwaa kin nu fiɛɛ ɛ fí nulo ebefe, tu ɛ̀ nulo ɛ́ bó emom kɛ tɛn fitele fì ben lese yî Nyo' le. Ɛ fitele fin nu fiɛɛ ɛ fí fele ketwaa ke bigew e kè yɛɛle. Nonɛn, ɛ́ ke edioo enu diuu dì Jisos Klistu nu ke eduŋcɛ ɛkolɛ kew, ɛ́ bó ebɛnsee ben, tumte moŋkum monɛn, wvumte ben. 8 Keseen nu ɛ ben kooŋke Jisos Klistu ɛ ben ke baa cim yɛn wase wvú le kɛ, ɛ ben ɛ lese fitele yî ye le, yaa yɛne wvú le kɛ. Ben ɛ mum ɛ no yuuke njoŋ naa wvu baay wvù ɛ̀ nulo wee saa esee kɛ, 9 njefo ben kee lɛ no ben nu ɛ lese fitele yî ye le nu ɛ Nyo' nu ke eboyse ben. 10 Bonyii bo ntum Nyo' le bò to jemyi ɛkumɛ mbuwma wvù Nyo' to nu keeke ebuw ben dvú to nu ɛ no tɛmte, gomte keekiɛɛ ɛkumɛ mboyma wvun. 11 Keyoy ke Klistu le to nu yî bó le no bó to teete lɛ Klistu nu ke eyɛn ŋgɛw ɛ́ ke edioo enu ɛjim jodvu, ɛ́ wvú ekɛŋkɛ bvukukɛ. Ɛ bó mum no gomte keekiɛɛ kefew kè mwɛɛm mvudvu nu ke ekooy, bô je yì mvú nu ke eghan sɛ kooy jó le. 12 Ɛ Nyo' mum ge ɛ bó kiɛɛ lɛ mwɛɛm mvù bó to jemyi mvun nu ɛ bó yaa jemyi ɛ ɛ̀ nu fô bikuu bibole kɛ, lɛ mvú nu fô ben e. Ɛ̀ nu mvú mvù ben to yuwɛɛ dew bonyii bò to fewcɛɛ saaka wvù jee wvù wvu Nyo' ɛ̂ ben ɛ̂ mvuŋgay mvu Keyoy ke Yuule kè Nyo' to ciinsɛɛ ɛ kí to fowe le. Mvun nu mwɛɛm ɛ naa bonceendaa bo Nyo' le beele keekiɛɛ mvú.

Bonyii bo Nyo' le eyuulè yî gee dibole

13 No fí nu nonɛn, ben ekay bicaw binɛn enù ɛ ben ɛ seyse bvufee bvunɛn. Ben ekemsenè bô bikuu binɛn, taalè kɛ fwe ɛ ɛ̀ nu yî mbuwma wvù nu ke eto fô ben e seke Jisos Klistu ɛ kase ɛ duŋcɛ ɛkolɛ kew e. 14 Ben eyuukè kɛ Nyo' le diɛwɛ boom bew e. Fo ben ebvuu egeè mwɛɛm bii nyam ye le no ben to shee gee seke ben to bɛɛ kenjiwe le kɛ. 15 Nyo' wvù to cawɛɛ ben nu ɛ wvú yuule. Ben tɛn eyuulè yî gee dinɛn e dicii, 16 no fí nu ɛ bó ɛ saŋ lɛ,

“Ben eyuulè njefo me n'yuule lo.”

17 No ben teŋe Nyo' lɛ Icee wene, ɛ wvú nu wee wvù saake wee tfuu yî gee diew e yaa duŋci kejɛɛy jɛɛy kɛ, tu ben kɛŋke keecee nce wene tfuu bô nfan wvù wvu Nyo' yî kefew e kecii kè ben nu yî woŋ wvun e kɛ diɛwɛ botolo le. 18 Kɛ ben kee lɛ Nyo' to nu ɛ sum wase ben yî nce wvu ɛcici wvù bo'icee bonɛn to kuusɛɛ ben dvú, ɛ kɛ wvú to sum ɛ ɛ̀ nu bô fiɛɛ diɛwɛ bigew e bì nulo ebefe kɛ. 19 Wvú to sum ɛ ɛ̀ nu bô ɛlɛmɛ ke Klistu le kè yaa nu kɛ fiɛɛ fi ncɛw, kè nu diɛwɛ ke waa njee kentaŋe le wvù yaa kɛŋke nlom kɛnɛɛ fiɛɛ fimew fì befe yî dvú le kɛ. 20 Nyo' to seyse wvú ɛ ɛ̀ bɛɛ lo ɛ woŋ sɛ ke kɛw, ɛ duŋcɛ wvú ɛdiuw yo fokemɛse ɛyan e nje yene. 21 Ɛ̀ ge Klistu ben ɛ sɛ lese fitele yî Nyo' wvù to bvusɛɛ wvú yî kpwe le nya wvú bô bvukukɛ le. No wvú ge nonɛn, mvuntelem mvunɛn bô boŋkpwawcɛ bonɛn ɛ mum ɛ no nu ɛ ben ɛ gɛɛ yî Nyo' le. 22 No ben yuuke kecɛɛy e, ɛ kí gee ɛ mvuntelem mvunɛn yuule wvu lɛ ben ekɛŋkè keŋkoŋɛn fô boom bo bwee wene le ɛ ɛ̀ nu ke kecɛɛy, ben emum ekoŋenè kɛ nonɛn bô mvuntelem mvunɛn mvunciim. 23 Ben ekoŋenè nonɛn, njefo bó nu ɛ kase wase ɛ boo ben ɛ̂ mboo wvu fwɛ le. Kɛ wee wvù boke ben wvun nu wvù nulo ekpwe kɛ. Ɛ̀ nu Nyo' kebɛɛ ɛ wvú yaa nulo ekpwe kɛ. Wvú to boke ben ɛ ɛ̀ nu bô diɛw ye yì nyaa nshii. Ɛ diɛw yin nu ke emɛy kɛ eleeme fó. 24 Fí nu no bó saŋ ɛ̂ Ŋwa' Nyo' le lɛ,

“Wee wvu wum tfuu nu kɛ diɛwɛ ɛgay e,

ɛ bvujoŋkɛ bwew nu kɛ diɛwɛ fow e.

Ɛgay ké no yowlene, ɛ fow tɛn yɛɛte,

25 geenɛn ɛ diɛw Tata nu ke eleeme kɛ fó sekecii.”

Diɛw yidvu yin nu saaka wvù jee wvù wvu Nyo' wvù bó to fewcɛɛ ɛ̂ ben.

1 Bita
<
1
>

1:1 2:11; Jɛm 1:1

1:2 2:9; Lum 8:29; Ɛfɛ 1:4; 2Tɛs 2:13; 2Bi 1:10; 1:19

1:3 1:23; 2Kol 1:3; Tay 3:5

1:6 2Kol 4:17; Jɛm 1:2-3

1:7 Job 23:10; Mben 66:10; Yɛsa 48:10; 1Kol 3:13

1:8 Jon 20:29; 2Kol 5:7

1:9 Lum 5:2; 6:22; Ɛfɛ 1:14

1:10 Luk 24:46; 1Kol 15:3-4; 2Bi 1:19-21

1:12 Ɛfɛ 3:9-10

1:14 Lum 12:2; Ɛfɛ 2:3; 4:17-18

1:15 Lɛw 19:2

1:16 Lɛw 11:44-45

1:17 Yɛsa 63:16; Yɛli 3:19; Mat 6:9; 16:27; Lum 2:6; Jɛm 2:1; 1Bi 4:5

1:18 Mat 20:28; 1Kol 7:23; 6:20

1:19 1:1-2; Jon 1:29; Lem 20:28; 1Kol 5:7; Ɛfɛ 1:7; Ibu 9:12

1:20 Ɛfɛ 1:4

1:21 5:1; Lum 5:2

1:22 2:17; 3:8; 4:8; Lum 12:9; Gal 6:10; 2Bi 1:7; 1Jon 4:11

1:23 Jon 1:13; Ibu 4:12; Jɛm 1:18

1:24 Yɛsa 40:6-8; Jɛm 1:10-11

1:25 Yɛsa 40:6-9