Ŋwa' wvu fwe wvù Baul to saŋɛɛ ɛ̂ kentaashɛ ke
Tɛsalonika
Fiɛɛ fì nu ɛ̂ Ŋwa' wvu Tɛsalonika wvu fwe wvun e
Tɛsalonika to nu kelaante kemew ɛ̂ keba ke woŋ e kè Masedonia le jò Baul to kɛwcɛɛ kentaashɛ ke bonyii bo mbee le. Fí to baa moocɛ no kentaashɛ kin kɛwɛɛ kɛ, ɛ Bojuu mum kɛw no bane Baul bene kendoŋ bô wvú. Baul mum saŋ ŋwa' wvu fwe wvun fô bonyii bo Klistu le bo Tɛsalonika keeyvuwsɛ mvuntelem mvubole, ege ɛ bó eleemè tɛmyi.
Bikuu bi mwɛɛm e ɛ̂ Ŋwa' wvun e
1:1 Keŋkɛwcɛ
1:2–3:13 Ɛ Baul yuw njoŋ bvuu bɛnse bonyii bo mbee le
4:1-12 Ntefe ɛkumɛ nce wvu bonyii bò ɛ̀ nu bo Klistu le
4:13–5:11 Ntefe ɛkumɛ no Klistu nu ke ekase eto
5:12-22 Ntefe wvu fokemɛse
5:23-28 Kemɛse
1
2Kol 1:19; 2Tɛs 1:1; 1Bi 5:12; 1Kol 4:17; Lem 17:1Ɛ̀ nu me wvù Baul, ɛ me nu bee Silas noo Timatio. Me nsaaŋke ŋwa' wvun fô kentaashɛ ke bonyii bo mbee le ke Tɛsalonika le kè nu ɛ taashɛ ɛ no nu yî Nyo' Ice bô Tata Jisos Klistu le.
Mbuwma Nyo' bô nyɛkeey enù fô ben e.
Ɛ Baul nya keyoone ɛ̂ Nyo' yî kentaashɛ ke bonyii bo mbee le ke Tɛsalonika le
2:13; Fili 1:3; Kolo 1:3; 2Tɛs 1:3; 2:13Bese ké no nyaa keyoone ɛ̂ Nyo' sekecii ɛkumɛ ben bocii, bɛne ben sekecii ɛ̂ bunle yese le. 5:1-2Seke bese nu ɛ̂ Nyo' Icee wesebeene fwe, bese ké no kumyi gee dinɛn dì buyte yî fitele fì ben lese yî Klistu le bô lemme dinɛn dì buyte yî keŋkoŋɛn kenɛn e noo shém yì ben kuule yî buyte yî ntaa wvù ben taale fwe yî Tata wesebeene wvù Jisos Klistu le.
2Tɛs 2:13, 16Boom bo bwee wese le bò Nyo' kooŋke, bese kee lo lɛ Nyo' nu ɛ caw wase ben. 1Kol 4:20Bese kee nonɛn njefo kɛ saaka wvù jee wvù bese to toɛ dvú fô ben e to to kɛ ɛ ɛ̀ nu bô njeme maaŋ kɛ. Wvú to to tɛn bô mvuŋgay mvù nɛn'yi fô Keyoy ke Yuule le, ɛ bese looci kee lo lɛ saaka wvudvu nu kecɛɛy. Ben kee kfuu bonyii bò ɛ̀ to nu bese seke bese to cee ɛ̂ ben ɛntelɛŋ nje ben. Lem 17:5-9; 2Kol 6:10; 2Tɛs 3:7, 9Ben to nu ɛ no beŋene bese noo Tata njefo ben to nu ɛ fiisɛn saaka wvudvu bô nlaŋlaŋ wvù nɛn'yi fô Keyoy ke Yuule le naa no ben cim to nu yî ŋgɛw wvu baay e. Nonɛn ɛ ben mum tu bonyii bò bonyii bo mbee le bocii bo ɛ̂ keba kè Masedonia le noo kè Akɛya le ejoò kenfewsɛn fô bó le. Lum 1:8Me njemyi nɛn njefo kɛ ɛ̀ mɛy kɛ diɛw yì yi Tata yì nu ɛ san jo ben ɛ ghan keba kè Masedonia bô kè Akɛya le kɛ. Saaka wvu ɛkumɛ fitele finɛn fì ben lese yî Nyo' le nu ɛ ghan wase tɛn mondvuum e monciim. Nonɛn kɛ shiee bvuu nu dvú wvù bese ejemyi fiɛɛ ɛkumɛ fifiɛ kɛ. Jon 17:3; Lem 14:15Ben ekeè lɛ bonyii bodvu kebɛɛ nu ɛ no seŋe ɛkumɛ no ben to fiisɛnɛɛ bese ɛ̂ ben ɛntelɛŋ, noo no ben to cin'yɛɛ mvunyo' le tu wase ben ɛ bo Nyo' keelemte wase Nyo' wvu kecɛɛy wvù kɛŋke nshii le. 10  5:1-2, 9; Lum 5:9Bó seŋe tɛn no ben cɛyte Waa we wvù nu ke enɛ fowe eto le. Waa we wvun nu wvù wvú to bvusɛɛ yî kpwe le, ɛ ɛ̀ nu Jisos wvù bvuuse beene can shém Nyo' yì ffuuke yì wvú nu ke eduŋcɛ ɛ̂ bonyii le.

1:1 2Kol 1:19; 2Tɛs 1:1; 1Bi 5:12; 1Kol 4:17; Lem 17:1

1:2 2:13; Fili 1:3; Kolo 1:3; 2Tɛs 1:3; 2:13

1:3 5:1-2

1:4 2Tɛs 2:13, 16

1:5 1Kol 4:20

1:6 Lem 17:5-9; 2Kol 6:10; 2Tɛs 3:7, 9

1:8 Lum 1:8

1:9 Jon 17:3; Lem 14:15

1:10 5:1-2, 9; Lum 5:9