Ŋwa' Nyo' Moŋkan mo Monfɛm 1 Timatio 1

Ŋwa' wvu fwe wvù Baul to saŋɛɛ ɛ̂

Timatio

Fiɛɛ fì nu ɛ̂ Ŋwa' Timatio wvu fwe wvun e

Ŋwa' wvun nu wvu fwe wvù Baul to saŋɛɛ fô cuwee mvu wvù diee to nu Timatio le. Timatio to nu wee Klistu, ɛ wvú to nu wee wvu woŋ wvù Ɛsia wvu caan e. Mwɛɛm mvù Baul saŋ ɛkumɛ mvú ɛ̂ ŋwa' we wvu fwe wvun e nu mvuntɛntem.

Fi fwe nu ɛ wvú jemyi jó teete lɛ bó eyɛnè ɛkumɛ n'yɛɛyi wvù yaa nu kɛ wvu lɛŋ ɛntelɛŋ jo bonyii bo mbee le. Wvuwvun n'yɛɛyi to nu lɛ, woŋ wvù beene yɛne wvun nu woŋ kebefɛ, ɛ wee nulo ke ekɛŋkɛ mboyma kɛ seke wee kee mwɛɛm mvumew mvù nu ɛ̂ kenyilɛ le bô seke wee cee nce mvu kɛ diɛwɛ keetune keediee kfuu mwɛɛm mvumew bô keenu sɛ kpwoon kɛnɛɛ diemsɛn.

Ŋwa' wvudvu jemyi tɛn ɛkumɛ no ɛ̀ nulo ɛ́ Timatio egeè lemme diew ɛ̂ kentaashɛ ke bonyii bo mbee le ɛnte, bô no bonyii ebunleè Nyo'. Wvú bvuu seŋe kfuu keŋge kè bikuu bi bintaashɛ bi bonyii bo mbee le noo bonyii bò fici gee dilemme ɛ̂ bintaashɛ ɛnte kɛŋke keekɛŋke. Keemɛse nu ɛ wvú ɛ tefe Timatio no wvú nulo elemte diɛwɛ waa lemme Jisos Klistu wvù jee le.

Bikuu bi mwɛɛm e ɛ̂ Ŋwa' wvun e

1:1-2 Keŋkɛwcɛ

1:3–3:16 Bontefe ɛkumɛ no bó egeè mwɛɛm ɛ̂ kentaashɛ le bô ɛkumɛ bocee bikuu bi kentaashɛ le

4:1–6:21 Bontefe ɛkumɛ no Timatio egeè lemme diew

1 Ɛ̀ nu me wvù Baul, ɛ me nu waa ntum Klistu Jisos no Nyo' wvù Mboyse wesebeene bô Klistu Jisos wvù beene gɛke bvufee yî ye le to gayɛɛ lɛ me enù.

2 Me nsaaŋke ŋwa' wvun fô wo le Timatio wvù ɛ̀ nu waa wɛm wvu kecɛɛy yî mbee le.

Nyo' Ice bô Klistu Jisos wvù Tata wesebeene ebuw wo, ecam shen fô wo le, enya wo bô nyɛkeey.

Lɛ Timatio ecilè bon'yɛɛyi bo mbiay e

3 No me nto ŋgayɛɛ ɛ̂ wo seke me nto ŋgɛne Masedonia lɛ wo eshɛɛ enù Ɛfɛsus, nu ɛ me mbvuu ŋgayte lɛ wo enù kɛ jó wvu lɛ wo ecilè bonyii ba bò yɛɛyi kfuu n'yɛɛyi mvu wvu jɛɛy. 4 Ɛ̀ cilè tɛn lɛ fo bó ejoò kefew kebole jewsee yî mvumaŋgaan e noo yî ɛdiee ɛ bo'icee dikfuu di bonyii le yò bó ké no taaŋke gɛne dvú sɛ yó kaa lo ŋkuuŋ. Mvumvun nu mwɛɛm mvù too kɛ ɛ ɛ̀ nu bô bombew, ɛ ɛ̀ yaa nu kɛ bô ntaŋ wvù wvu Nyo' wvù bii mbee le kɛ. 5 Shiee ntefe wvun nu keege lɛ bonyii ekɛŋkè keŋkoŋɛn kè nɛn'yi fô mvuntelem mvù yuule le bô kè nɛn'yi fô mvuntelem mvù wee gee fiɛɛ ɛ ɛ̀ yaa nu fì fitele esaake wvú le noo kè nɛn'yi fô fitele fi kecɛɛy fì wee lese yî Nyo' le. 6 Bonyii bomew nu ɛ cinɛ wase yiyin je le ɛ no bvuyte gɛne wase ɛ ɛ̀ nu yî bonjeme bo ɛcici le. 7 Bó gomte keenu bonyii bò yɛɛyi bonyii bô bonci bo Nyo' le, geenɛn yaa cim kee naa fiɛɛ fì bó jemyi ɛkumɛ fí kɛnɛɛ kenyi ke fiɛɛ fì bó tɛɛncine yî dvú le sɛ nfan e kɛ.

8 Beene kee lɛ nci Nyo' nu fiɛɛ fì jee fɛn ɛ́ wee joo nci wvudvu ɛ̂ je yi lɛŋ no wvú kɛŋke keejoo le. 9 Beene kee tɛn lɛ nci nu ɛ bó yaa to gɛke fô bonyii bò nu teytey e kɛ. Bó to gɛke ɛ ɛ̀ nu fô bonyii bò ŋgoyte bonci le bô bò tɛmyi bikuu le, noo bò maa lo Nyo' le, noo bò gee bibefɛ le, noo bò yaa yuule kɛ le, noo bò beete bô diee di Nyo' le, noo bò yuwyi bo'icee bobole noo bobwee bobole, noo bò yuwyi bonyii bomew e. 10 Ɛ̀ nu tɛn fô bokɛnɛ bô bolemsɛ bò jaaŋke kenjaŋ e, noo fô bolemsɛ bò jiime fô bomew e. Ɛ̀ nu tɛn fô bonyii bò cooŋke bonyii gɛne bô bó le, noo fô bò mbiayte mbiay e, noo bò kane keesee kecɛɛy kane mbiayte lo le. Ɛ ɛ̀ nu tɛn fô bò gee naa la fì yaa bii kɛ n'yɛɛyi wvu lɛŋ e. 11 N'yɛɛyi wvun bii saaka wvù jee wvù kuuke wvù ɛ̀ nu wvu Nyo' wvù bó bensee le, ɛ saaka wvudvu nu wvù bó to nyaɛ can yɛm e.

Ɛ Baul nya keyoone ɛ̂ Tata yî shen yì wvú to camɛɛ fô wvú le

12 Me nyaa keyoone ɛ̂ Klistu Jisos wvù Tata wesebeene wvù nu ɛ nya me mvuŋgay keelemte lemme diew dì wvú to jiŋyɛɛ me yɛn lɛ me nu ɛ ŋkocɛn, mum baa me lɛ me enlemte le. 13 Naa no me ncim nto nu fwele njemyi díɛw yì befe ɛkumɛ wvú, mbone bikaa ɛ̂ wvú ɛjim, nan'yi wvú, geenɛn ɛ wvú cam kɛ shen fô me le, njefo me nto ŋgee kenjiwe le n'yaa ŋkɛŋke wase mbee kɛ. 14 Tata to nu ɛ tfuw lo mbuwma we keŋkoŋɛn yî yɛm e, ge ɛ me no ŋkɛŋke mbee bô keŋkoŋɛn no wee wvù nu ɛ taashɛ bô Klistu Jisos ké no kɛŋke. 15 Njeme wvù lɛ Klistu Jisos to to yî nshɛ le keeboyse bonyii bò befe nu naa kecɛɛy, ɛ ɛ̀ nu njeme wvù nu ɛ kocɛn wvù wee ebee wvú le sɛ kemaŋɛn. Me kebɛɛ nto nu naa lo nfon bonyii bò befe. 16 Geenɛn, ɛ Tata ke cam shen fô me le, wvu lɛ Jisos Klistu eduŋcɛ yî yɛm e, me wvù nu nfon bonyii bò befe, shém ye yì wvú kuule gɛne mɛɛse bô bonyii. Ɛ me nto nu nonɛn diɛwɛ kenfewsɛn e fô bonyii bò nu ke ebee wvú le ke ekɛŋkɛ nshii wvù mɛy lo le. 17 Nyo' nu Nfon wvu bvuyvuum e sɛ ŋka, ɛ kɛ wvù yaa nulo ekpwe kɛ, ɛ kɛ bó nulo eyɛn wvú le kɛ. Ɛ̀ mɛy kɛ wvú maaŋ wvù ɛ̀ nu Nyo'. Beene etumtè moŋkum mew, nyaà n'wvum ɛ̂ wvú sekecii sɛ ŋka. Fí enù nonɛn.

Lemme dì Timatio elemtè

18 Timatio waa wɛm, me nyaa lemme di fiɛɛ fì me njeme fin e can yo le, ɛ fí bii ɛ ɛ̀ nu mwɛɛm mvù bonyii to jemyɛɛ wase ɛkumɛ wo diɛwɛ bonyii bò teete bontum bo Nyo' le, wvu lɛ mvú ke efi wo ɛ́ wo etum jem yì jee. 19 Ɛ̀ leemè kɛ yî fitele fì wo lese yî Klistu le, eyekè fiɛɛ fì fitele fiuw jemyi ɛ̂ wo ntay. Bonyii bomew nu ɛ cinɛ wase keeyeke fiɛɛ fì fitele fibole jemyi ɛ̂ bó, ɛ mum ɛ gbwe yî mbee wvubole diɛwɛ ŋguw wvu ɛ̂ joo fò wvú ɛ bvuŋ e. 20 Ŋgoo bó le nu 'Imenayus bô Alɛksanda. Me nu ɛ nya wase boban can Satan e, wvu lɛ bó ekɛŋkɛ bvufee, elu bô diee di Nyo' le dì bó beete dvú.

1:1 2:7; Tay 3:4; Kolo 1:26-27

1:2 1Kol 4:17; 1Kol 4:15; 1Tɛs 2:11; Tay 1:4

1:3 Lem 20:1; 4:1-10; 6:3-5, 20-21; 2Tim 2:16-18, 23-26; Tay 1:10-16; 3:9-11

1:4 4:7; 6:20; 2Tim 2:16, 23; 4:4; Tay 1:14

1:5 1:14, 19; 2:15; 4:12; Lum 12:9; 13:10; 1Kol 8:1; Gal 6:10; 2Tim 1:3, 13; 3:10; Tay 1:15

1:6 1:4; 6:4, 20; Tay 1:10

1:8 Lum 7:12, 16

1:9 Gal 5:19-21

1:10 4:6; 6:3; 2Tim 1:13; 2:2, 15; 3:14; 4:2-3; Tay 1:9; 2:1, 7-8

1:11 1Tɛs 2:4

1:12 2:7

1:12 Gal 1:15-16

1:13 Lem 8:3; 9:1-5; 1Kol 15:9; Gal 1:13

1:14 1:5; 1Kol 15:10

1:15 Luk 15:2; 19:10; Lum 5:8

1:16 Ɛfɛ 3:7-9; Kolo 1:25

1:17 Lum 16:27

1:18 4:14; 6:12; 1Kol 9:24-25; 2Tim 4:7-8; Jut 3

1:19 1:5

1:20 2Tim 2:17; 2Tim 4:14; 1Kol 5:5