Ŋwa' wvu bokaŋ bofɛɛ wvu
Jon
Fiɛɛ fì nu ɛ̂ Ŋwa' Jon wvu bokaŋ bofɛɛ wvun e
Jon to saŋ ŋwa' we wvu bokaŋ bofɛɛ wvun, teŋe ɛkolɛ kew lɛ, “Cee ɛkolɛ ke kentaashɛ ke bonyii bo mbee le (1:1).” Wvú to saŋ fô kpwoon mvu le wvù Nyo' nu ɛ caw bô boom bew e. Kpwoon wvun nɛlo enu kentaashɛ ke bonyii bo mbee le kemew, ɛ boom bew ban nu bonyii bo kentaashɛ kedvu le. Fiɛɛ fì wvú to saŋɛɛ ɛ̂ ŋwa' wvun e, nu kɛ nɛn kfuy. Wvú to saŋ keelɛkɛ lɛ bó ekoŋenè, bvuu tefe bó lɛ bó eyɛnè ɛkumɛ bonyii bo n'yɛɛyi le bo mbiay e.
Bikuu bi mwɛɛm e ɛ̂ Ŋwa' wvun e
1-3 Keŋkɛwcɛ
4-6 Keŋkoŋɛn nu ɛkolɛ ke fiɛɛ ficii le
7-11 Ntefe keeyɛne ɛkumɛ n'yɛɛyi wvu mbiay
12-13 Kemɛse
1
1 3Jon 1Ɛ̀ nu me wvù cee ɛkolɛ kentaashɛ ke bonyii bo mbee le. Me nsaaŋke ŋwa' wvun fô wo le kpwoon wvù Nyo' nu ɛ caw noo fô boom buw e. Me ŋkooŋke ben yî kecɛɛy e. Ɛ kɛ ɛ̀ mɛy kɛ me maaŋ wvù kooŋke ben kɛ. Bonyii bocii bò kee kecɛɛy kooŋke tɛn ben. 2 Bese kooŋke ben nje kecɛɛy kè nu yî yese beene le, ɛ kí nu ke emɛy nu kɛ yî yese beene le sekecii. 3 Mbuwma Nyo' bô shen noo nyɛkeey wvù nɛn'yi fô Nyo' Ice bô fô Jisos Klistu wvù Waa Nyo' Ice le nu enu yî yese beene le no beene nu yî kecɛɛy e bô yî keŋkoŋɛn e.
Ben enù yî kecɛɛy e noo yî keŋkoŋɛn e
4 3Jon 3Me nlaŋlaŋe baay no me nu ɛ n'yɛn ɛ boom buw bomew bii kecɛɛy e kɛ no Nyo' Ice to gayɛɛ lɛ beene egeè. 5 Jon 13:34; 1Jon 4:11Yî keseen e bwee bonyii, me nlɛke lo wo ŋgayte lɛ beene ekoŋenè. Kɛ fin nu nci mvu wvu fwɛ ɛ me nsaaŋke fô wo le kɛ. Ɛ̀ nu kɛ nci wvù beene to kɛŋke wase ɛ kɛw foŋkɛw. 6 Jon 14:15; 1Jon 2:5; 5:3Keŋkoŋɛn nu fin fì lɛ beene ebiì nci we le. Ɛ nci wvudvu nu wvun wvù ben to yuwɛɛ wase ɛ ɛ̀ bɛɛ foŋkɛw lɛ ben eceè yî keŋkoŋɛn e.
7 1Jon 2:18Bonyii bo mbiay e nteen nu wase ɛ̂ woŋ, ɛ ɛ̀ nu bonyii bò yaa tomte lɛ Jisos Klistu to nu ɛ tu wee wvu wum to fokuse fɛn kɛ. Boba bonyii nu bo wee mbiay e wvù nu tɛn wee bvuban Klistu. 8 Ben eyɛnè bô bikuu binɛn fo ben ke enɛ elase fiɛɛ fì ben nu ɛ lem wase. Ben emomtè ɛ ɛ̀ nu keeke ekɛŋkɛ nlawma wene tfuu. 9 1Jon 2:23Wee tfuu wvù daaŋke gɛne fwe yaa leeme kɛ yî n'yɛɛyi wvu Klistu le, nu ɛ wvú yaa bvuu kɛŋke Nyo' yî ye le kɛ. Ɛ wee wvù leeme sekecii yî n'yɛɛyi wvu Klistu le, nu ɛ wvú kɛŋke Nyo' Ice bô Wan yî ye le. 10 Lum 16:17Ɛ́ wee to fô ben e ɛ faŋɛ yaa eto ɛ ɛ̀ nu bô wvuwvun n'yɛɛyi, fo ben efiisɛn wvú ɛ̂ ben yew kɛnɛɛ egay lo wvú le kɛ. 11 Ɛ́ wee gay wvú le, tu wvú nu ɛ taashɛ wase bô wvú yî lemme diew dì befe le.
Njeme wvu fokemɛse
12 3Jon 13-14Me ŋkɛŋke naa mwɛɛm nteen keensaŋ ɛ̂ ben, geenɛn ɛ me n'yaa nu ensaŋ lo ɛ̂ ŋwa' le kɛ. Me n'yɛne lɛ me nu ŋke ento en'yɛn lo ben e ɛ́ beene ejemyi ɛ wee yɛne wee le ɛ̂ jise, wvu lɛ beene emɛse eyuw njoŋ. 13 Boom bo waa bwoo wvù Nyo' nu ɛ caw tɛn e, gayte wo le.