2
Ben ejoò kenfewsɛn yî Jisos Klistu le
1 Kɛ ben nu ɛ taashɛ wase ben ɛ bo Klistu wvú ɛ ge ben ɛ no kɛŋke mvuntelem? Kɛ keŋkoŋɛn kew fô ben e nu ɛ ge wase mvuntelem mvunɛn ɛ no yvuwse? Kɛ ben ɛ bo Keyoy ke Yuule nu ɛ taashɛ wase, ɛ Klistu kɛŋke fitele fì jee fô ben e bvuu camte shen fô ben e? 2 Jon 13:34; 1Kol 1:10-11; Gal 6:10; Ɛfɛ 5:2; 1Jon 4:12No fí nu nonɛn, ben ege lɛ ɛ́ me emɛse en'yuw njoŋ. Ben enù diuw mwaaŋ, kooŋkè bikuu binɛn, kɛŋkè fitele fimwaaŋ bvuu kɛŋkè ŋkpwawcɛ mwaaŋ. 3 Lum 12:10; Gal 5:26Fo ben dioo nu ɛ wee no kpwaake kɛ ɛ ɛ̀ nu ɛkumɛ ɛkolɛ kew kɛnɛɛ bensee ye yi ɛcici kɛ. Wee tfuu eshike ɛkolɛ kew, eyɛnè wee mvu le fele ɛkolɛ kew. 4 1Kol 10:24Fo wee ekpwaakè kɛ ɛ ɛ̀ nu ɛkumɛ ɛkolɛ kew kɛ. Wvú ekpwaakè tɛn ɛkumɛ bonyii bomew.
5 Jon 13:15; Lum 13:14; 15:5Keŋge kenɛn kɛŋke keenu lɛŋlɛŋ kɛ diɛwɛ ke Klistu Jisos e.
6 Jon 1:1-2; 17:5; Ibu 1:3Wvú to nu Nyo',
faŋɛ yaa ejo fifiɛ lɛ ɛ̀ nu fiɛɛ fì wvú emɛy eghemte yî dvú le kɛ,
7 Jon 1:14; Lum 8:3; 2Kol 8:9; Ibu 2:14, 17geenɛn, cinɛ bvudvuu bvudvu le,
jo ɛ ɛ̀ nu bvu nfwa le.
Ɛ bó boo wvú,
ɛ wvú no nu lɛŋlɛŋ kɛ diɛwɛ wee wvu wum e.
8 Jon 10:17; Ibu 5:8; 12:2Seke wvú to nu wee wvu wum,
ɛ wvú shike ɛkolɛ kew no yuuke Nyo' le,
ke bee keekpwe kpwe,
ɛfey mvunciim, kpwe yi yî kentam e.
9 Lem 2:33; Ɛfɛ 1:21; Ibu 1:4No wvú to geɛ nonɛn, ɛ Nyo' bense wvú
gɛɛ bvudvuu le bvù fele bvu wee tfuu le,
buw wvú bô diee dì fele ɛdiee ɛcii,
10 Yɛsa 45:23; Jon 5:23; Lum 10:9; Mwm 5:13wvu lɛ wee tfuu wvù nu woŋ wvu we le
bô wvù nu yî nshɛ le noo wvù nu ɛkuse jo nshɛ,
ke dioo ɛ yuw diee di Jisos e didvu, ŋgvuum,
11 ɛ́ wee tfuu ejemyi bô diuw we lɛ Jisos Klistu nu Cee Ɛkolɛ.
Ɛ́ bó edioo egee nonɛn ɛ́ mbense egɛne ɛ̂ Nyo' Ice.
Ben ebaà ɛ̂ woŋ jan diɛwɛ jón e
12 Nonɛn nsáa yɛm shém, ben eyuukè kɛ tɛn Nyo' le nonɛn no ben to yuuke seke me nto nu beene. Ben eyuukè keseen fele lo wvù me n'yaa nu kɛ beene, egɛne fwe gee mwɛɛm mvu ɛkumɛ mboyma wene. Ben egeè nonɛn, fane ciiŋke. 13 1:6; Jon 15:5; Lum 7:18; 15:18; 1Kol 12:6; 15:10; 2Kol 3:5Ben ekeè lɛ ɛ̀ lemte Nyo' yî yene le, gee lɛ ben eshieelè keegee mwɛɛm mvù wvú kooŋke. Ɛ ɛ̀ bvuu nyaa wvú mvuŋgay keegee mwɛɛm mvudvu dvú.
14 Ben dioo gee fiɛɛ ficii fì ben gee, fo ben ewvukenè, kɛnɛɛ beekè mbew kɛ, 15 1:10; Dito 32:5; Dan 12:3; Mat 5:14; 10:16; 1Kol 1:31; 2Kol 1:14; Gal 2:1-2; Ɛfɛ 5:8; 1Tɛs 2:19wvu lɛ ben eyuule, nu sɛ nlom. Nonɛn, ɛ́ ben emum enu boom bo Nyo' le bò nu sɛ jay ɛntelɛŋ jo ɛŋgokɛ kin kè kɛŋke mvuntelem mvù yiile, buuke mwɛɛm. Ben ebaà ɛ̂ woŋ jan diɛwɛ jón e, 16 no ben jici *Kɛnɛɛ lɛ, “… no ben fewci.” saaka wvù nyaa nshii wvù mɛy lo ɛ̂ bonyii le. Ɛ́ ben gee nonɛn, ɛ́ ke edioo enu diuu dì Jisos Klistu kaase too, ɛ́ me embensee ye lɛ me mbaa nlem lemme di ɛcici kɛ.
17 Lum 15:16; 2Tim 4:6; 1Jon 3:16No ben nu ɛ lese fitele yî Nyo' le, tu ɛ̀ nu ncese ɛ ben ɛ ge fô wvú le. Ɛ́ ɛ̀ cim nu naa lɛ bó nu emɛse enya me diɛwɛ no bó ké fuu mbvuum, ebise yî wene ncese le, ɛ́ me en'yuuke kɛ ɛ ɛ̀ nu njoŋ, nlaŋlaŋe beene bocii. 18 3:1; 4:4Ɛ me ŋgomte lɛ ben ebɛne me le ɛ́ beene eyuuke njoŋ, laŋlaŋe.
Ɛ Baul jeme ɛkumɛ Timatio bô Ɛbaflodaytus
19 1:1Ɛ́ Tata Jisos beŋe lo, tu me n'yɛne lɛ ɛ̀ shɛke caan ɛ́ me entum Timatio fô ben e. Wvú nu ke edioo ɛ to ɛ kase ɛ tu jim, esee ɛ̂ me no ben nu, ɛ́ fitele fiem elɛɛtɛn. 20 Lem 16:2Kɛ me ŋkɛŋke wee mvu diɛwɛ wvú le wvù looci naa kɛŋke tɛn shiee fô ben e diɛwɛ no me ŋkɛŋke kɛ. 21 2Tim 4:10Me njemyi nɛn, njefo wee nteen kɛŋke shiee ɛ ɛ̀ nu fô ɛkolɛ kew e, yaa taale kɛ ɛkumɛ fiɛɛ fì Jisos Klistu gomte le kɛ. 22 Geenɛn, Timatio nu ɛ ben kee wase wee wvù ɛ̀ nu wvú, no wvú nu ɛ lem wase bee wvú keefewcɛ saaka wvù jee, ɛ wvú lemte bee wvú lɛŋlɛŋ diɛwɛ no wan ké no lemte bô ice. 23 Ɛ̀ nu fiɛɛ fì me n'yɛne lɛ ɛ̀ shɛke caan ɛ́ me entum ɛ ɛ̀ nu wvú. Fiɛɛ fì me mbɛɛ ntaale nu keen'yɛn laa mwɛɛm nu etu nɛɛ le yî yɛm e lɛ. 24 Me ŋgɛɛle bvufee yî Tata le lɛ ɛ̀ shɛke caan, ɛ́ me kebɛɛ ento tɛn en'yɛn ben e.
25 4:18Me n'yɛne lɛ fí nu shiee le lɛ me eŋkase enciinse Ɛbaflodaytus ɛ̂ ben. Wvú nu waa bwee wesebeene, ɛ bee wvú lemte bvuu diuu yî diɛw Nyo' le. Ɛ̀ nu wee wene ntum wvù ben to tumɛɛ lɛ wvú eto etaale fô me le. 26 Wvú se kɛŋke wase shiee keeyɛn ben e bocii, ɛ fitele buuke wvú no wvú se yuwɛɛ lɛ ben nu ɛ yuw lɛ wen cɛmte lo. 27 Ɛ̀ nu kecɛɛy, wvú se nu ɛ loocɛ ɛ cɛm ɛ shɛɛ kɛ caan keekpwe. Geenɛn, Nyo' se nu ɛ cam shen fô wvú le, ɛ kɛ wvú se cam kɛ ɛ ɛ̀ nu fô wvú le maaŋ kɛ. Wvú nu ɛ cam tɛn fô me le lɛ fo wvú ekpwe ebvuu ebise ŋgɛw yî wvù me n'yɛne wase le kɛ. 28 Nonɛn, me ɛ mum ɛ no nshieele naa baay lɛ me enciinse wvú, wvu lɛ ben ebvuu eyɛn wvú le eyuuke njoŋ, ɛ́ fitele fiem tɛn elɛɛtene. 29 1Kol 16:16, 18Ben efiisɛn wvú diɛwɛ bonyii bo Tata le bô njoŋ. Bonyii diɛwɛ wvú le nu bò ɛ̀ nulo ɛ́ ben ewvumte. 30 Me njemyi nɛn njefo ɛ̀ to shɛke caan tu wvú to kpwe nje lemme di Jisos Klistu le no wvú to nyaɛ ɛkolɛ kew keetaale fô me le yî bvudvuu bvunɛn e.
2:2 Jon 13:34; 1Kol 1:10-11; Gal 6:10; Ɛfɛ 5:2; 1Jon 4:12
2:3 Lum 12:10; Gal 5:26
2:4 1Kol 10:24
2:5 Jon 13:15; Lum 13:14; 15:5
2:6 Jon 1:1-2; 17:5; Ibu 1:3
2:7 Jon 1:14; Lum 8:3; 2Kol 8:9; Ibu 2:14, 17
2:8 Jon 10:17; Ibu 5:8; 12:2
2:9 Lem 2:33; Ɛfɛ 1:21; Ibu 1:4
2:10 Yɛsa 45:23; Jon 5:23; Lum 10:9; Mwm 5:13
2:13 1:6; Jon 15:5; Lum 7:18; 15:18; 1Kol 12:6; 15:10; 2Kol 3:5
2:15 1:10; Dito 32:5; Dan 12:3; Mat 5:14; 10:16; 1Kol 1:31; 2Kol 1:14; Gal 2:1-2; Ɛfɛ 5:8; 1Tɛs 2:19
*2:16 Kɛnɛɛ lɛ, “… no ben fewci.”
2:17 Lum 15:16; 2Tim 4:6; 1Jon 3:16
2:18 3:1; 4:4
2:19 1:1
2:20 Lem 16:2
2:21 2Tim 4:10
2:25 4:18
2:29 1Kol 16:16, 18