Tɛ̀sàlɔ̀nɨkà
ɔ̌ Kànɨsà tɔ̀ Pɔlɔ̀ andí ɔyɔ rɨ́ kìsě nɨ̌ bhàrʉwà
Yàrɨ́ bhàrʉwà ɔ̀ ɨ̀ nòtù ádrɔ̀drɔ̌ dhu tɨ́ dhu
Uvitatálɛ Pɔlɔ̀ náandí ndɨ Tɛ̀sàlɔ̀nɨkà tɔ́ kɨgɔ̀ ɔ̌ kànɨsà tɔ̀ ka kandí ɔ́yɔ̌ bhàrʉwà. Kǎngbɛ ndɨ kànɨsà ɔyɔ rɨ́ Ídzì Màkʉ̌rʉ̀ t’ʉ́nɔta tɔ́ pbɨ̀ndà abhi ìsě abhi ɔ̌ (Kas 17.1-9).
Tɛ̀sàlɔ̀nɨkà tɔ́ kɨgɔ̀ ɔ̌ kànɨsà ɔ̌ ɨ’ɨ̀ nɨ́ Pbàyàhúdí mà ábhɔ̌ ɨ̀nzɨ̌ nɨ́ Pbàyàhúdí mànà. Pɔlɔ̀ andí dhu abádhí tɔ̀ mbɛ̀mbɛ̀ imbò kumì atɔ ʉ́dà Yěsù Krɨ́stɔ̀ ka kʉ́gʉ̀ dhu-dzidɔ̌ rɔ́rɔ̀.
Yàrɨ́ ɔyɔ rɨ́ kìsě bhàrʉwà ɔ̀ Pɔlɔ̀ àdu ndàndǐ dhu nɨ́ ɨwà ndɨ̀ ndɔ́vɔ̀ wɛmbɛrɛ̀ tɔ́ pbɨ̀ndà bhàrʉwà ɔ̀ dhu. Kàsʉmɨ̀ àdɨ ndàmbɛ ʉ̀da tɨ́ ʉ̀da dɔ̌ rɔ̀, pbàkrɨ́stɔ̀-tsì náava ndɨ̀ atdídɔ̌ ɨ̀nzɨ̌ Ádrʉ̀ngbǎlɛ Yěsù rǐngo dhu nɨ̌. Tɛ̀sàlɔ̀nɨkà ɔ̌ atdídhená alɛ nóowúnà àtɨ̀nà rɔ̌ ndɨ Ádrʉ̀ngbǎlɛ bhà ɨdhɔ rákǎ ɨwà (2.2). Ngʉ̌kpà alɛ nóowúnà dhu ɨ̀rɛ̀ rɔ̌ ’àtɨ ɨnzá dhu ràkǎ kɔnzɨ̀ kasʉ ɨnzá ɔ̀trɔ̀ ɨdhɔ ɔ̌ kà rǐngo nɨ́dhunɨ̌ (3.6-12). Nɨ́rɔ̀, Pɔlɔ̀ rɨ̌ ndɨ̀ ndúdhěna dhu àngǎ atdídɔ̌. Kà rɨ̌ dhu ɔ̀vɔ Kàgàwà rɔ̌ òmvǔ, Nzɛ́rɛ alɛ nyʉ́ tɨ́ ka kátɨna alɛ nàndà dhu dɔ̌. Ndɨ alɛ rɨ̌ ndɨ̀tɔ angyinǎ rɔ̀ Krɨ́stɔ̀ rǐngo dhu tɔ̀ (2.3-4). Ndɨrɔ̀, Pɔlɔ̀ rɨ̌ pbàkrɨ́stɔ̀-afí àbhʉ̌ ròtsì ɔbɨ ndàtɨ Ádrʉ̀ngbǎlɛ ràrɨ̌ ɨ̀nzɨ̌ arɨ́ ʉ̀nɔ ndɨ̀ ndʉ̀nɔ̀ dhu nʉ́bha ɨnzá ndɨ̀ ndɔ̀nzɨ̀ rɔ́rɔ̀ alɛ. Nɨ́ kà ràrɨ̌ abádhí àbhʉ̌ ròtsì ɔbɨ, ndàdʉ̀ abádhí ɔ̀dɔ̀ pfɔ̀mvɔ Sìtanɨ̀ rɔ̌ rɔ̀ (3.3).
Bhàrʉwà-nyɨ̀tɨ̀ ka kóhù tɨ́ dhu
- Pɔlɔ̀ rɨ̌ Tɛ̀sàlɔ̀nɨkà tɔ́ kɨgɔ̀ ɔ̌ pbàkrɨ́stɔ̀ nóvì dhu (1.1-2).
- Ndɨ̀ ndíngo rɔ̀ Ádrʉ̀ngbǎlɛ Yěsù nɔ́ɔtdɨ́ya ɨ̀ngbàtɨ́ ɨ́lɨ ndɨ̀ alɛ-ànyǎ obhónánga dɔ̌ dhu (1.3-12).
- Ɨnzá Ádrʉ̀ngbǎlɛ Yěsù àpɛ̀ ndàdǔ dhu mà, Kà rǐngo ɨwà Nzɛ́rɛ alɛ nyʉ́ tɨ́ ka kátɨna alɛ ɨ́tɔ̀ ndɨ̀ dhu-dzidɔ̌ dhu mànà (2.1-12).
- Pbàkrɨ́stɔ̀ àkǎ ìkò pɔ́tsɔ́ fɨ̀yɔ́ a’uta ɔ̌ dhu (2.13-17).
- Pbàkrɨ́stɔ̀ àkǎ ’àbhʉ ɨ̀ atdídɔ̌ ɨtsɔ̀ta tɔ̀ dhu mà, abádhí àkǎ ’ɔ̀nzɨ̀ kasʉ fɨ̀yɔ́ ípìrɔ̌nga nɔdɔ tɨ́ dhu mànà dhu (3.1-15).
- Pɔlɔ̀ rɨ̌ ndɨ̀tsɔ̀ Tɛ̀sàlɔ̀nɨkà ɔ̌ pbàkrɨ́stɔ̀ dɔ̌ ndàdʉ̀ abádhí nóvì dhu (3.16-18).
1
Pɔlɔ̀ rɨ̌ Tɛ̀sàlɔ̀nɨkà tɔ́ kɨgɔ̀ ɔ̌ Kànɨsà nóvì dhu
1 Ɨma Pɔlɔ̀, atdíkpá Sɨ̀lɨ̀vanʉ̀ mà Tìmɔ̀tɛwʉ̀ mànà, mǎ màndǐ yàrɨ́ bhàrʉwà fʉ̌kʉ̀ Tɛ̀sàlɔ̀nɨkà tɔ́ kɨgɔ̀ ɔ̌ Kànɨsà tɨ́rɔ̀. Nyɨ̌ nɨ́ àlɛ̌ t’Ábanà Kàgàwà mà, àlɛ̌ tɔ́ Ádrʉ̀ngbǎlɛ Yěsù Krɨ́stɔ̀ mànà bhà alɛ. 2 Ndɨ àlɛ̌ t’Ábanà Kàgàwà mà, àlɛ̌ tɔ́ Ádrʉ̀ngbǎlɛ Yěsù Krɨ́stɔ̀ mànà nákǎ ’àso nyɨ̌, ’àdʉ̀ nyǎbhʉ nyǒkò màrʉ̀ngà ɔ̌.
Pɔlɔ̀ rɨ̌ Tɛ̀sàlɔ̀nɨkà ɔ̌ kànɨsà nílè fɨ̀yɔ́ a’uta-okú dɔ̀ rɔ̀ dhu
(Màt 13.40-43; 25.31-45; Fìl 1.3-6,27-30; 1Tɛ̀ 1.3-7)
3 Adɔ́dǔ, mǎ màkǎ mǒngò ɔ̀tsɔ̀ àdu bìlǐnganà Kàgàwà tɔ̀ okúkʉ dɔ̀ rɔ̀. Nɨ́, dhu àkǎ àlɛ̌ rɔ̀nzɨ̀ ka ndɨ dhu bhěyi tɨ́, fʉ̀kʉ́ a’uta rɨ̌ ndìsě, nyɨ̌ nyózè nyɨ̌ nɨ̌ nzínzìkʉ ɔ̌ àzè ràdʉ̀ àmbɛ ndìse dɔ̌ nɨ́dhunɨ̌. 4 Ndɨ dhu-okú dɔ̀ rɔ̀ nɨ́ ndɨ mǎ márɨ́ mǐlè okúkʉ dɔ̀ rɔ̀ Kàgàwà bhà kànɨsà ɔ̌. Mǎ márɨ́ mǐlè átɔ̀, nyɨ̌ nyíkò pɔ́tsɔ́, nyǎmbɛ fʉ̀kʉ́ a’uta nɔ́dɔ̀ dɔ̌, àpbɛ̀ mà avuta mànà-dzi t’óndùta ɔ̌ nɨ́dhunɨ̌.
5 Wɔ̀ dhu bhěyi nyɨ̌ nyɔ́nzɨna dhu nɨ́ ndɨ rɨ́ dhu àvǐ, Kàgàwà rɨtdɨ̀ya kɔ́rɔ́ alɛ-ànyǎ obhónánga dɔ̌, ndàdʉ̀ nyɔ̌zʉ̀ ɨwà nyɨ̌ nyàkǎnà nyǒtsù yà nyɨ̌ nyárɨ́ àpbɛ̀ àbà okúna dɔ̀ rɔ̀ pbɨ̀ndà ádrʉ̀ngbǎnga tɔ́ idzi ɔ̀ alɛ tɨ́. 6 Obhó tɨ́, Kàgàwà nɨ́ obhónánga dɔ̌ arɨ́ ìndrǔ-ànyǎ nɨ́tdɨ̀ alɛ. Nɨ́, kǎvùya átɔ̀ yà rʉ̀kʉ́ arávu alɛ-rɔ̌. 7 Ndɨrɔ̀ nyɨ̌, yà rʉ̀kʉ́ ka karávu rɔ̀, àlɛ̌ kadʉ̀ya àbànà nyɨ̌ mànà atdíkpá nɨ́ àpbɛ̀ ɔ̌ rɔ̀ àlɛ̌ kɨ́ àlɛ̌ àsǒ dhu, yà Ádrʉ̀ngbǎlɛ Yěsù rɨ̌ ndɨ̀tɛ̀ ɔ̀rʉ̀-akpà ɔ̀ rɔ̀ ɨ̀ íwu pbɨ̀ndà ádrʉ̀ngbǎnga tɔ́ ɔbɨ tɔ́ màlàyíká mànà nɨ́nganɨ́. 8 Kɨ̌raya ádrʉ̀ngbǎ kàzʉ ɔ̌, ndàdʉ̀ yà ɨnzá Kàgàwà nʉ́nɨ alɛ-ànyǎ nɨ́tdɨ̀. Ndɨrɔ̀ kɨ̌tdɨ̀ya yà ɨnzá Ádrʉ̀ngbǎlɛ Yěsù bhà Ídzì Màkʉ̌rʉ̀ nɨ́fʉ alɛ-ànyǎ átɔ̀. 9 Fɨ̀yɔ́ nzɛ́rɛnga tɔ́ pɛrɛ̀ tɨ́, abádhí núuwíya dhòdhódhónganà, ɨ̀ ròkò ɨtsɛ nyʉ́ Ádrʉ̀ngbǎlɛ Yěsù rɔ̌ rɔ̀, ndɨrɔ̀ kàbhà ɔbɨ tɔ́ ádrʉ̀ngbǎnga tɔ́ awáwʉ̀ rɔ̌ rɔ̀ màtɨ́. 10 Ndɨ dhu ɔnzɨya ndɨ̀ Yěsù rǐngo ndɨ́nɨ̌ pbɨ̀ndà alɛ-tsí níilè tɨ́ ndɨ̀, ndɨ̀ ná’ù alɛ kɔ́rɔ́ ràdʉ̀ ndɨ̀fʉ nɨ́nganɨ́. Nyɨ̌ nyɨ’ɨya ɨ alɛ nzínzì ɔ̌ átɔ̀, ɨwà nyɨ̌ nya’u fʉ̌kʉ̀ mǎ mʉnɔ ɔtɛ nɨ́dhunɨ̌.
11 Ndɨ dhu-okú dɔ̀ rɔ̀ nɨ́ ndɨ, mǎ márɨ́ mɨ̌tsɔ̀ bìlǐnganà okúkʉ dɔ̀ rɔ̀, ndɨ́nɨ̌ àlɛ̌ tɔ́ Kàgàwà nɔ́ɔzʉ́ tɨ́ nyɨ̌ pbɨ̀ndà anzita nà àkǎ alɛ tɨ́. Ndɨrɔ̀ mǎ márɨ́ mɨ̌tsɔ̀ ndɨ́nɨ̌ pbɨ̀ndà ádrʉ̀ngbǎnga tɔ́ ɔbɨ nɨ̌ kǎbhʉ̀ tɨ́ nyɨ̌ nyárɨ́ atdyúna òho kɔ́rɔ́ ídzìnga mà, fʉ̀kʉ́ a’uta-kàsʉ̌ mànà ràkǎ. 12 Ndɨ dhu bhěyi nɨ́ ndɨ, àlɛ̌ tɔ́ Ádrʉ̀ngbǎlɛ Yěsù-ɔvɔ̀ rɨ̌ ndìlè okúkʉ dɔ̀ rɔ̀, ɔvɔ̀kʉ ràdʉ̀ ndìlè átɔ̀ kǒkú dɔ̀ rɔ̀. Ndɨ dhu ràdʉ̀ ndɔ̀nzɨ̀ àlɛ̌ tɔ́ Kàgàwà bhà ídzìnga mà, Ádrʉ̀ngbǎlɛ Yěsù Krɨ́stɔ̀ bhà ídzìnga mànà nóokú dɔ̀ rɔ̀.