Mukanda ua Paulu ua kulivanga kuli vaka
TESALONIKA
Citsindikisi
Mukanda uakulivanga ku vaka Tesalonika vausonekele kuli Kanganda Paulu. Uasa kupua mukanda uakulivanga uje Paulu uasonekele kupua mbazuvuila ya Mbimbiliya kaha uausonekele kusetekesa ha miaka makumi atanu naumo (51) hanima ya kusemuka kua Kilistu. Paulu uakele mu Kolinte mukemo muasonekelele mukanda uaku cikungulukilo caku Tesalonika, cikungulukilo caputukile ha vungenzi vuendi vua mucivali vua kutuala muzimbu uacili ua Njambi (Vilinga 17: 1-10). Mu Livulu lia Vilinga lihandeka ngualio mu cikungulukilo muakele Vayunda na Vangelengu. Paulu kasele kutumama ntsimbu ya ilaha mu Tesalonika, hanima ya kuputuka cikungulukilo, kaha uatumine ou mukanda mu kutakamesa vaka kutsiliela kuje. Mukanda ou uli na mitue yaingi hamo na vishika vije muvanapandele kuyoya vaka Yesu. Paulu alina kuhaka mana cikuma ha kuija kua Kilistu lua mucivali. Nankuma, vaka kutsiliela vaku Tesalonika vavuahelele ha mutue ou. Paulu ualikuasesele kuija kua Kilistu lua mucivali linga vayoye vuyoye vuje vuvuahelesa Njambi (5: 6-8)
Muvanautumbikilamo:
Paulu aputuka mu mukanda ou na kumeneka cikungulukilo na kutsantsela Njambi hali vakevo (1).
Kaha alumbununa ha vilinga na muzimbu uje uanehele Timateo (2-3).
Cakuhatako Paulu ahana vishika mu vanapandela kuyoyelamo vaka Yesu mu ceke hakuija kua Yesu lua mucivali (4: 1-5, 15).
Paulu amanusula mukumeneka cikungulukilo naua na kuvalomba linga voshe vautande mukanda (5: 16-28)
1
1 Mukanda ua kuhuma kuli Paulu na Siluvanasi na Timateo.
Ku vantu va cikungulukilo ca mu Tesalonika, vaje vanakundama kuli Njambi Tate na Muene Yesu Kilistu.
Kavumbi na ciyulo vikale neni.
Paulu Ahana Citsatselo kuli Njambi ha Muono na Lutsilielo lua vaka Tesalonika
2 Ntsimbu yoshe tukatsantsela kuli Njambi hali yeni voshe, kaha naua ntsimbu yoshe tukamilombelela. 3 Tukanuka ku mesho a Njambi yetu na Tatetu muje mumunahaka lutsilielo lueni mu vipangi, na muje cizango ceni cili nakumihundanganesa, na muje kutsiliela kueni mukukola ngo muli Muene yetu Yesu Kilistu. 4 Vamuanetu, tuatantekeya nguetu Njambi ua mizanga naua namihangula kupua mu vendi, 5 omuo tuaminehelele Muzimbu Uacili, keti na mezi lika, vuno honi na nzili na Cimbembesi Uakulela, kaha na lukakateya lua vusunga vuavio. Muatantekeya muje vati tuayoyele omo tuakele hamo neni, eci capuile ngeci omuo yeni. 6 Muatembunuisile yetu na Muene, kaha cipue vene muayandele cikuma, vuno honi muatambuile muzimbu na nzolela ije ikahumu kuli Cimbembesi Uakulela. 7 Nankuma, yeni muapuile cimueso kuli voshe vaka kutsiliela mu Masendoniya na mu Akaya. 8 Omuo keti lika nge lizi lia Muene liahumine kuli yeni mu Masendoniya na mu Akaya kuahi, vuno honi muzimbu ua lutsilielo lueni kuli Njambi unashandokela kuoshe. Nankuma, nacimo cahi cituasa kuhandeka. 9 Vantu va kucihela kuje vakele nakuhandeka muje vati yeni muatutambuile omo tuezile nakumimona, kaha naua na vati muje muatengulukile kuhuma ku tumponia nakuija kuli Njambi, nakupangela Njambi ua vusunga uakuyoya, 10 nakuvandamena Munendi omo akeja kuhuma muilu, Munendi Yesu, uje yasanguile ku vatsi, naua ikeye uje akatupatula ku vutenu vua Njambi vuje vulinakuija.