Mukanda ua Paulu ua mucivali kuli vaka
TESALONIKA
Citsindikisi
Mukanda uamucivali ua Tesalonika vausonekele kuli Kanganda Paulu (1: 1). Uasonekele ou mukanda munima ya Tesalonika uakulivanga, kusetekesa ha miaka yakupua makumi atanu naumo (51) munima ya kusemuka kua Kilistu. Paulu uakele mu Kolintu omo uasonekele ou mukanda ku cikungulukilo camu Tesalonika, cikungulukilo cije caputukile mu vungezi vuendi vua mu civali vua kutuala muzimbu uacili ua Njambi (Vilinga 17:1-10). Livulu lia Vilinga lihandeka ngualio, cikungulukilo vacipangelele Vayunda na Vangelengu vavengi. Cikungulukilo camu Tesalonika cahakele mana cikuma ha vintsimbu ya mamanusuililo na kuija kua Kilistu kua mucivali, omuo Paulu uasonekele viavingi mu mikanda yendi yoshe ku Tesalonika. Mbazuvuila ya mukanda ua Tesalonika ua mucivali ya kundamba kuvintsimbu via mamanusuililo. Paulu naua uananguile hakuluisa vilenda. Muntu uoshe napande kupanga cikuma ha via kulia viendi (3: 6-10).
Muvanautumbikilamo
. Paulu uaputukile mu mukanda kulitumbula ikeye vavenia na vaje vanakele nakupanga navo (1: 1-2).
. Kaha uatsantselele kuli Njambi ha cikungulukilo mu Tesalonika na kuvalombelela (1: 3-12).
. Mu capita ya mucivali, Paulu ahandeka ha vintsimbu via mamanusuililo.
. Kaha ahandeka hakuluisa vulenda na seho yakupanga cikuma (3: 1-15).
. Paulu naua amanesa nakumeneka cikungulukilo (3: 16-18).
1
1 Kuhuminina kuli Paulu na Siluvanasi na Timateo. Kuli vantu vaku cikungulukilo ca mu Tesalonika, vaje vanakundama kuli Njambi Tatetu na Muene Yesu Kilistu.
2 Kaha Njambi Tatetu na Muene Yesu Kilistu vamihane kavumbi na ciyulo.
Kusompa hakuija kua Yesu Kilistu
3 Vavusamba vetu tupande kutsantsela kuli Njambi ntsimbu yoshe omuo yeni. Eci cinapu cacili kuli yetu kulinga ngacije, omuo lutsilielo lueni luli nakukola cikuma na cizango cije muli naco kuli umo na mukuavo cili na kupua cakama cikuma. 4 Kaha omu mukemuo tulinakulihalesa hali yeni mu vikungulukilo via Njambi. Tulinakulihalesela ha lukakateya lueni nakutsiliela kueni mu mapakeso oshe aua na tuyando otu muli nakumona.
5 Kaha eci cinapu vukaleho ngeci kusompa ca Njambi cikeco ca vusunga, kaha mukapua vaka seho mu vumuene vuendi vuje vumulinakuyandela. 6 Njambi uapua uavusunga, kaha akaneha tuyando hali vaje valinakumiyandesa. 7 Kaha akamihuimisa yeni mulina kuyanda, kaha na kuli yetu naua. Akalinga evi omo Muene Yesu akasholoka kuhuma muilu na tungelo vendi va nzili, 8 hamo na milengi ya tuhia, nakuzangamesa vaje kuvatantekeya Njambi, na vaje kuvekuononoka Muzimbu Uacili ua Muene yetu. 9 Kaha vakayanda mukuva zangamesa kua miaka yoshe, nakuvahangununa ku mesho a Muene naku vumpau vuendi vuakama, 10 kaha omo akeja ha litangua lije nakutambula vumpau kuli vantu vendi voshe vakulela nakalemeso kuli voshe vaje vanatsiliela. Neni naua mukakala hhakati kavo, omuo neni naua munatsiliela lizi lije tuamilekele.
11 Kaha omu mukemuo tukamilombelela ntsimbu yoshe. Tulinakulomba kuli Njambi yetu linga amipuise vaka seho ku muono uje uamisanene ngeci muyoyemo. Na nzili yendi yoshe ashulise vutumbe vueni vuoshe vuacili nakumanesa vipangi vieni via lutsilielo. 12 Mu ngila eyi vene lizina lia Muene yetu Yesu likatambula vumpau kuli yeni, neni naua kuli ikeye, ha kavumbi ka Njambi yetu na Muene Yesu Kilistu.