Mukanda ua Paulu ua mucivali kuli
TIMATEO
Citsindikisi
Livulu lia mucivali lia Timateo liapua mukanda uamucivali uakuhuma kuli kanganda Paulu kuli ndongisi uendi Timateo. Mukanda ua Timateo uamucivali vausonekele kuyehi nakuhua ca muono ua Paulu. Va muhakele mu kamenga mu Loma ha ntsimbu eyi (2 Tim 1:16). Paulu uakele na vusamba vuakukola na Timateo kaha vintsimbu viavingi uakele nakumutumbula nguendi muana (Fil 2:22, 1 Tim 1:2, 1:18).
Ou ukeuo umo ua mikanda iuana yakuhuma kuli Paulu ije yasonekelelele kuli muntu keti ku cikungulukilo. Ikuavo itatu ku mikanda eyi ikeyo ya 1 Timateo, na Tito na Filimoni. Ha ntsimbu ije mukanda ua 2 Timateo vakele naku usoneka, vaka Yesu vakele nakuvapakesa mu nganda ya Loma. Eci cikeco canehele linga Paulu vamuhake mu kamenga kaha uakele nakushika Timateo linga atualeleleho nalukakateya mukukaluua. Ngue kuya mu 1 Timateo, Paulu ahana Timateo vinangulo viavingi ha valongisi vamakuli (1 Tim 1:16-18). Kaha naua alekesa Timateo nguendi kukakala vintsimbu via kukaluua kulutue (3: 1).
Muvanavitumbikilamo:
1. Paulu aputuka nakuhinduisa Timateo (1: 1-2) kaha ambahoni amukolese (1: 3-18).
2. Ambahoni alekesa Timateo linga atualeleleho nalukakateya (2: 1-13).
3. Cakuhatako amuhana vinangulo vimo vije muasa kuyoyelamo (2: 14-26).
4. Ambahoni amunangula ha vije vikalingiua kulutue na ngila yacili muje vati akasa kuvitambula (3: 1-4; 8).
5. Paulu amanusula na mezi endi lika kuli Timateo (4: 9-24).
1
1 Yange Paulu, kanganda ua Kilistu Yesu ku cizango ca Njambi kuya ku cikulaheso ca muono uje uli muli Kilistu Yesu,
2 Njikusonekela yove Timateo, munange injazanga:
Kavumbi, cikeketima na ciyulo vije vihuminina kuli Njambi Tate na Kilistu Yesu Muene yetu.
Kutsatsela na Kulikolesa
3 Njitsantsela Njambi uje injikapangela na mana akutungukua, ngue muje muvalingile vakukuluila vange, omo njikamianuka vintsimbu vioshe mu malombelo ange. 4 Ngue muje njikanuka masozi eni, njikatondo cikuma vutsiki na mutania kumimona, linga njakushule nanzolela. 5 Njilinakuanuka lutsilielo luove lua vusunga, lutsilielo luje luakele hakulivanga muli kuku yove uampuevo Loisi na vanoko Yunisi nahano vene, cilivene nguange nove uli naluo. 6 Ha cuma eci njikuanukisa linga uhozelele vuana vua Njambi vuje vuli muli yove kuhitila muje munjakusalekele mavoko ange. 7 Omuo Njambi katuhanene Cimbembesi ua liova vuno honi Cimbembesi ua nzili na cizango na kulihilula yetu vavenia.
8 Keti uvue shuamua ya kuhana vukaleho vua Muene yetu, cipue vuange cinzinda cendi, vuno honi lipangele nange mukuyandela muzimbu uacili mu nzili ya Njambi. 9 Ikeye uatuovuele nakutusana nakusana ca kulela, keti ngue kuya ku vipangi vietu vuno honi ku vutumbe vuendi na kavumbi vije viatuhanene muli Kilistu Yesu tele kanda mavu va atange, 10 vuno honi vanacisolola kuhitila mukusoloka ca Muyoyesi uetu Kilistu Yesu, uje nanongesa kutsa nakuneha muono na kuhona kutsa ku ceke kuhitila mu muzimbu uacili. 11 Omuo ya muzimbu uacili ou, vanjihanguile kupua muka kuambulula na kanganda na mulongisi, 12 nankuma njilinakuyanda ngue muje munjili nakuyandelamo. Vuno honi kunjesi na shuamua, omuo njatantekeya uje njinatsiliela, kaha njatantekeya cilivene asa kuniunga muacili vije vinjinakundika kuli ikeye noho ha Litangua lije. 13 Kavangeya cimueso ca mezi a vusunga aje unevu kuli yange mu lutsilielo na cizango vije vili muli Kilistu Yesu. 14 Niunga muacili vusunga vuje vuvanakundika kuli yove na Cimbembesi Uakulela uje uakala muli yetu.
15 Uatantekeya nguove voshe vaje vali mu Asiya vananjitengulukila, kupandakana kumo na Fingeliase na Helemengenese. 16 Muene ahane cikeketima ku ntanga ya Onesifolase, omuo vintsimbu viavingi ikeye nakala nakunjilisa, kakele na shuama na malienge ange, 17 vuno honi omo uahetele mu Loma, uanjitondele cikuma nakunjiuana. 18 Muene amutavese linga auane cikeketima cije cikahumu kuli Muene ha Litangua lije! Uatantekeya muacili vipangi vije viakuasele mu Efeso.