Mukanda ua Paulu kuli vaka
FILIPU
Citsindikisi
Paulu uasonekelele ou mukanda kuli vaka kutsiliela va mu Filipu mu miaka makumi atanu na limo na muaka umo hanima ya kutsa ca Yesu (61 AD). Uausonekele oku tele acili mu kamenga (1: 13), capuile mu Loma. Ou mukanda uausonekelele ku cikungulukilo cije cakele mu nganda ya Filipu. Tuasa kulilongesaho viavindende ha via Filipu mu livulu lia Vilinga. Filipu yapuile nganda yakama ya mbonge mu Masendonia. Kaha naua yapuile cikungulukilo cakulivanga cije civatungile mu Masendonia. Paulu na Silasi vaputukile eci cikungulukilo hamolika kaha naua vavahakele na mu kamenga ha vutsiki vumo oku tele vacili kuje (Vilinga 16).
Paulu hamo uakele na matumbe amengi mukusoneka ou mukanda. Ualikuasesele vintsimbu vimo mukutsatsela cikungulukilo ha vuana vuje vuvatumine omo vevuile nguavo ali mu kamenga (4: 10-19). Kaha naua uavalumbunuine tumamesi yendi muje vati uakelelelemo mu kamenga kaha uahandekele viacili hali Timateo na Epafolonditusi ku cikungulukilo (2: 19-30) linga vavatambule muacili nakusingimika vuntuama vuavo.
Muvanavitumbikilamo:
1. Paulu aputuka mukanda mukuhinduisa cikungulukilo ca mu Filipu (1: 1-2).
2. Cakuhatako Paulu ahandeka vimpande vimo via katumamesi kendi na visinganieka vije viakala navio (1: 3; 2:30).
3. Ambahoni ahane vishika viavingi via katumamesi muje muvanapande kuyoyelamo vaka Yesu (3: 1; 4:9).
4. Paulu amanusula nakutsantsela vantu va mu cikungulukilo ca mu Filipu ha vuana vuavo kaha nakuvatuma vihindu (4: 10-23).
1
1 Kuhuminina kuli yange Paulu na Timateo, vangamba va Kilistu Yesu,
Ku voshe vantu va Njambi muli Kilistu Yesu vaje vali ku Filipu, hamo na vantuama na vakuasi va cikungulukilo:
2 Kavumbi na ciyulo vikale kuli yeni vije vihuminina kuli Njambi Tatetu na Muene Yesu Kilistu.
Lilombelo lia Paulu ku Vantuama vendi
3 Njikatsantsela Njambi yange mu vintsimbu vioshe vije njikamianuka. 4 Mu malombelo ange oshe hali yeni voshe, njikalombela na nzolela, 5 kutsatsela muje mutunapangela hamo mu vipangi via muzimbu uacili kuhuma ha litangua lia kulivanga nakuheta kulelo. 6 Cilivene njatantekeya nguange uje uaputukile cipangi cacili muli yeni akacitualelelaho nakukufua ha litangua lia Yesu Kilistu. 7 Canjipande yange kuvua ngacije hali yeni voshe, omuo njamihaka ku mutima uange, omuo yeni voshe muli hamo nange mu kavumbi, mu vioshe, cipue njili mu kamenga, cipue mukuamena na mukukolesa muzimbu uacili ngoo. 8 Omuo Njambi ikeye mukaleho uange uje atantekeya muje vati njimitonda yeni voshe na cizango cije cihuminina kuli Kilistu Yesu.
9 Kaha eli likelio lilombelo liange nguange cizango ceni citualeleleho mukukola cikuma, na mana nakumona ca vusunga, 10 linga muase kumona viacili nakupua vakulela nakuhona kapayo ha litangua lia Kilistu, 11 mukashula na vushuka vuacili vuje vukeja kuhitila muli Yesu Kilistu ku vumpau nakushangazala ca Njambi.
Kuyoya cinapu Kilistu
12 Njitonda yeni vavusamba vange mutantekeye ngeci vije vinalingiua kuli yange vinakuasa kutuala muzimbu uacili kulutue. 13 Ha cuma eci linga vaka kuniunga lipela na voshe vatantekeye ngeci njili mu kamenga omuo ya Kilistu. 14 Kaha vaka kutsiliela vavengi vanakolesa muli Muene omuo ya kukala kuange mu kamenga, kaha vanasimpi cikuma mukuambulula lizi lia Njambi kuakuhona liova.
15 Vamo cilivene vambulula Kilistu na lifuua na vimpata, vuno honi vamo na cizango cacili. 16 Ava vakukotokela vacilinga omuo ya cizango, vatantekeya ngeci yange vananjihaka mu kamenga omuo yakuamena muzimbu uacili. 17 Ava vakulivanga vambuluile Kilistu na cimbembesi ca kulihalesa, keti mu vusunga vuno honi valinakuyongola ngeci vavuezeleleko ku tuyando tuange omuo njili mu kamenga. 18 Kaha vatihoni? Muli ili yoshe ngila, cipue mu kulikuisa cipue mu vusunga vumbanda lika valinakuambulula Kilistu, kaha ha cuma eci njivuahelela. 19 Cilivene, kaha njikavuahelela. Omuo njatantekeya nguange kuhitila mu malombelo eni nakukuasa ca Cimbembesi ca Yesu Kilistu vikanjipatula. 20 Cizango cange cakama na kutsiliela cange ngeci kunjikevu shuama vuno honi nakusimpa coshe hano na vintsimbu vioshe Kilistu vakamuhana kasingimiko mu muvila uange, cipue mu kuyoa cange cipue mu kutsa cange. 21 Omuo kuli yange kuyoya cinapu Kilistu, kaha kutsa cinapu nganio. 22 Nga muono hanga ucikala mu muvila, kaha eci cilumbununa vipangi viacili hali yange. Kaha tahi kunjasa kuhandeka cuma muka njapande kuhangula. 23 Vananjipalakana ku viuma evi vivali. Cizango cange cinapu kuya nakukala na Kilistu, eci cikeco cinahiana cikuma. 24 Vuno honi cakama cikuma omuo yeni, nga kunjaciyoya tahi. 25 Njatantekeya muacili cuma eci, nankuma njatantekeya nguange njikakala nakutualelelaho neni voshe, omuo yakuvuezelela ceni nakuvuahelela mu lutsilielo, 26 ngeci muli yange mukase kulihalesa kuje kuneha vumpau muli Kilistu Yesu omuo yakuija cange naua kuli yeni.
27 Kaha katumamesi keni mu vuyoye kapue lika kaseho ya muzimbu uacili ua Kilistu linga hamo njikeja nakumimona cipue hamo njiuahiko, njikevue nguavo muakolesa mu cimbembesi cimo lika, na mana amo aje atsiliela noku noku omuo ya lutsilielo lua muzimbu uacili, 28 keti mukale na liova lia vitozi veni. Eci cikeco cimueso kuli vakevo ngeci mukavahiana, vuno honi ya kuovoka ceni cije cihuminina kuli Njambi. 29 Omuo vanamitumbuilaco nguavo omuo ya Kilistu, kumukatsiliela lika vuno honi naua mukayanda omuo yendi, 30 neni muakundama ku nzita ije muamuene njakele nayo, naua hangavene ikeyo ije muli nakuivua injicili nayo.