Mukanda ua Paulu kuli vaka
LOMA
Citsindikisi
Livulu lia Loma valisonekele kuli Kanganda Paulu ha miaka ya mukati ka makumi atanu na iuana nakutuala hamiaka makumi atanu na miaka itanu na itatu (54-58) hanima yakusemuka kua Kilistu. Te Paulu kanda aciye mukumeneka ku Loma kaha uatumine mukanda ou kuleka vaka Yesu mu Loma, kuli vaje Vayunda na vaje keti Vayunda. Ou mukanda uausonekele te acili munganda ya Kolintu omuo ha ntsimbu ije kukekuo kuakele nakukala. Paulu uasonekele linga mafuti oshe a tsiliele nakuononoka Yesu Kilistu (16-26). Livulu lia Loma liapua livulu lia seho ku vaka Yesu kuoshe na mu vintsimbu vioshe omuo ya muje mulialumbunuka muacili na muje mualitumbikilhamo Paulu mukulumbununa muacili kuovoka kuje kutuasa kukala naco kuhitila muli Yesu Kilistu. Paulu naua uanungakanene Muzimbu Uacili ua Yesu Kilistu ku Litavasano Lialaja. Vakakulilongesa vavengi vakaliluisa nguavo cinimbu ca seho mu livulu eli capua 1: 16 eci cihandeka nguaco, “Kunjivu shuamua ha muzimbu uacili, omuo ukeuo nzili ya Njambi ha kuovoka kuli uoshe uje atsiliela: hakulivanga kuli Vayunda, kuhumaho kuli vaje keti Vayunda.” Mbazuvuila yakulivanga ya Loma kuhuma (1-11) inahandeka cikuma via hali Njambi, kaha mbazuvuila ya mucivali kuhuma (12-15) ili naviavingi vishika ha vuyoye vua vaka Yesu.
Muvanautumbikilamo
Paulu, mu mukanda uendi aputuka kuliambulula ikeye vavenia na ku vantu vaje vausonekelele (1: 1; 15).
Cakuhatako asoneka vuyoye vua muntu na kuovoka kuhitila muli Yesu Kilistu (1: 16; 11:36)
Hanima yevi Paulu ahana cishika ca vuyoye vua Yesu (13: 1; 15: 13).
Uamanusuile Livulu lia Loma mukuhana vimeneka ku vantu va cikungulukilo ca Loma (16).
1
1 Yange Paulu, ndungo ya Yesu Kilistu na kanganda uje yahanguile nakunjisana kuli Njambi mukuambulula Muzimbu uendi Uacili.
2 Njambi uakulahesele laja Muzimbu Uacili kuhitila muli tunanguizi va Njambi vendi, nge muvanavisoneka mu Visoneka via Kulela. 3 Vinapu via Munendi, ngue ku vuyoye vuendi vua ha mavu, uasemukile ku ntanga ya Ndaviti, 4 kuhitila mu Cimbembesi Uakulela Yesu vamumuesele na nzili yakama kupua Muna Njambi omo vamusanguile ku vatsi. 5 Kuhitila muli Yesu tuatambuile kavumbi na vunganda linga tusane vaje keti Vayunda linga vononoke kulutsilielo omuo ya lizina liendi. 6 Kaha neni naua munapu vamo hhakati kavaje keti Vayunda vaje vavanasana linga vakundame kuli Yesu Kilistu.
7 Nankuma, njilinakusonekela kuli yeni voshe muli mu Loma vaje Njambi vazanga nakumisana linga mupue vantu vendi vakulela.
Njambi Tatetu na Muene Yesu Kilistu vamihane kavumbi na ciyulo.
Lilombelo lia Cikandelelo
8 Cakulivanga, njitsatsela kuli Njambi yange kuhitila muli Yesu Kilistu hali yeni voshe, omuo lutsilielo lueni lunatsimana ha mavu oshe. 9 Njambi ikeye mukaleho uange linga vije vioshe vinjihandeka vinapu via vusunga, Njambi uje injili nakupangela na mutima uange uoshe mukuambulula Muzimbu Uacili ua Munendi. Njambi natantekeya ngeci njikamianuka, 10 ntsimbu yoshe mu malombelo ange njikalombo nguange Njambi mu cizango cendi nga atava njije kuli yeni nakumimeneka. 11 Njishunguiya cikuma kumimona, linga njakumihaneko vuana vua mu Cimbembesi mukumitakamesa. 12 Hano njilumbununa ngeci yeni nange tuakulikolesa ha ntsimbu imolika, yeni ha lutsilielo luange kaha nange ha lutsilielo lueni.
13 Vavusamba vange, munapande kuvuluka ngueni vintsimbu viavingi njakele na vutumbe vuakuija oko nakumimeneka, vuno honi kuli cuma cimo cinanjivindika. Njitonda kukoka vantu hhakati keni ngue munjinalingi hhakati ka vaje keti Vayunda. 14 Njilina likongo lia vipangi hhakati ka vantu voshe, kuli Vangelengu na ava keti Vangelengu, na kuli vaka kunangula na vilema. 15 Nankuma, njitonda cikuma kuambulula Muzimbu Uacili nakuli yeni naua muakala mu Loma.
Nzili ya Muzimbu Uacili
16 Kunjesi na shuamua ya kuambulula muzimbu uacili, omuo unapu nzili ya Njambi ije ineha kuovoka kuli vaje voshe vatsiliela, hakulivanga kuli Vayunda, kaha naua na kuli Vangelengu. 17 Omuo muli likelio vusunga vua Njambi vanavusholola kuhitila mulutsilielo ngue muvihandeka visoneka nguavio, “Muntu uje ivanapuisa muka vusunga ku mesho a Njambi ha lutsilielo akayoya.”
Vantu voshe vali na mulonga ku mesho a Njambi
18 Vutenu vua Njambi vunasholoka kuhuma muilu nakuluisa vupi vuoshe na vilinga via kupihia via vantu vaje vilinga viavo viavipi vivindika vusunga linga keti vavutantekeye. 19 Omuo vije vineha nguavo linga vatantekeye Njambi vinasholoka, omuo Njambi navisholola kuli vakevo. 20 Hume haje Njambi hatangelele mavu, vifua viendi vije kutuasa kumona, nzili yendi ya yaye na cifua cendi ca Vunjambi vinasholoka muacili, vantu vasa kuvitantekeyela mu viuma vije vianalingi Njambi. Nankuma, vantu ava kuvasa kulisambuesa kuahi. 21 Cipue vene vatantekeyele Njambi, vuno honi kuvamusingimikile cipue kumuhana citsatsela. Vuno honi visinganieka viavo vinapu viangoco kaha na mitima yavo yamupulungua inashulu na milima. 22 Vakahandeka nguavo vanapu vaka mana, vuno honi vanapu vilema, 23 kaha vanalikela kulemesa uje kekutsa, nakulemesa viuma via vifua via vuntu vije kuviekuyoya miaka yoshe na vifua via tuzila cipue tusitu cipue viakulikoka.
24 Nankuma, Njambi navecelela linga valinge viuma via mazilo ngue ku mashungu a mitima yavo, kaha valinga viuma via shuamua kuli umo na mukuavo. 25 Vanaviana kutsiliela vusunga vua Njambi, kaha vanatsiliela makuli nakulemesa nakupangela vije vianatanga Njambi kuhona kulemesa vavenia uje uavitangele, uje ivanapande kushangazala miaka yoshe ya yaye! Ameni.
26 Omuo ha cuma eci, Njambi navecela linga valinge viuma via shuamua ngue ku mashungu avo. Cipue vampuevo vanatenguluka kulinga vilika na vamala mu ngila ya cisemua, vuno honi valinakuvilinga mu vingila vije kuviapandelemo. 27 Kaha mu ngila imo naua vamala vanatenguluka kulinga vilika na vampuevo mu ngila ya cisemua, vuno honi valinakulinga vukoyi na vakuavo vamala. Vamala vali nakulinga viuma via shuamua kuli umo na mukuavo, kaha ha cuma eci vanatambula fueto inavapande omuo ya vilinga viavo viavipi vije vivanalingi.
28 Omuo vantu ava vanaviana kuniunga vusunga vuakuivuisisa Njambi mu viyongola viavo, Njambi navecelela linga vakale na mana a api, linga valinge viuma vije kuvapandele kulinga. 29 Vanashulu na viuma vioshe via mazilo na vipi na lizangamena na cizindo, vanashulu na cipululu nakutsiha na luozi na makuli na lizangamena. Vakafueye, 30 nakuhandeka viavipi hali umo na mukuavo, vanapu vakakuzinda Njambi, vaka likamba, vaka kulihalesa, kaha vaka kulipamba, vayongola vingila viavingi viakupangelamo vupi, kuvekuononoka visemi vavo, 31 kuvekuvuisisa, kuvekuniunga vikulaheso viavo, kaha kuvekumuesa ngozi cipue kuvuila vakuavo cikeketima. 32 Cipuevene vatantekeya nguavo kusompa kua Njambi kuhandeka nguanguo vantu vaje vayoya mu ngila eyi vanapande kutsa, keti lika viuma evi valinakutualelelaho kulinga kuahi, vuno honi naua vacilitavasana na vaje vakakuvilinga.