MUKANDA UA PAULU KULI TITO
TITO
Citsindikisi
Livulu lia Tito linapu limo lia mikanda yakuhuma kuli Paulu lije liasonekelele ku muntu keti ku cikungulukilo. Ikuavo mikanda itatu yapua 1 Timateo, 2 Timateo, na Filimoni. Paulu uasonekelele Tito, kaha naua mu mukanda uendi uausonekele linga vautande ku civunga coshe. Tuasa kulinga eci omuo ali nakulumbununa omo muanapuila mu Kanganda, cuma cimo oco Tito napandele kutantakeye laja. Paulu uasonekele ou mukanda ha ntsimbu ya mukati ka miaka makumi atanu na imo na miaka itatu na makumi atanu 63-65 hanima ya kusemuka kua Yesu. Paulu uashikile Tito linga atuamenene vikungulukilo vije viakele ha munkinda ua Kelete. Paulu uasonekele ou mukanda linga ashike Tito hakuhangula na kulongesa vakuluntu va vikungulukilo. Uahanene vishika viakulifua mu mukanda uendi kuli Timateo. Mu mukanda uendi ali nakulumbununa omo vakuluntu va vikungulukilo vanapande kuyoyelamo. Vikungulukilo na vakuluntu va vikungulukilo vanapande kuvuilila cikuma kuviuma vije vitondeka muvuntuama.
Muvanautumbikilamo 1. Paulu ashika Tito kuhangula vantuama va Njambi (1: 1-16). 2. Kaha naua, amushika linga avalongese vuyoye vua Njambi (2: 1-3: 11). 3. Mukumanesa, Paulu avalekesako via matumbe endi kaha atuma vimeneka viendi (3: 15.)
1
1 Yange Paulu njinasoneka ou mukanda, yange ndungo ya Njambi na kanganda ua Yesu Kilistu.
Vanjihanguile nakunjituma mukukolesa lutsilielo lua vantu vaje vanahangula Njambi nakuvatuamenena ku vusunga vua mana vuje vuvalongesele kufutisi yetu yakulemesa Njambi, 2 vusunga vuje vunemana hakutsiliela kua muono uje ua miaka yoshe ya yaye. Njambi uje kekukuisa, uatukulahesele muono ou ntsimbu te kanda vatange mavu, 3 uasholuele lizi liendi kuli yange ha ntsimbu yendi ya cili. Eci vanjikundikileco yange linga njicambulula hakushika ca Njambi Muyoyesi uetu.
4 Njilinakusonekela kuli Tito, munange ua vusunga mulutsilielo luje tulinalo yetu voshe.
Njambi tatetu na Kilistu Yesu Muyoyesi uetu vakuhane kavumbi na ciyulo.
Vipangi via Tito mu Kelete
5 Evi vikevio njakusezelele mu Kelete linga uvuahese viuma viasaleleko, nakuimika va kuluntu vavikungulukilo ku nganda na nganda, ngue muje njakulongesele. 6 Mukuluntu ua cikungulukilo napande uakuhona mulonga, napande kupua yala ua mpuvo umo lika, kaha vana vendi vanapande kupua vakakutsiliela, keti vipapoke cipue vakakuhona kuononoka kuahi. 7 Omuo ntuama ua cikungulukilo uapua kaniungi ka vipangi via Njambi, napande kupua uahona mulonga. Kapandele kupua mukakulihalesa cipue muka kuniengua vuasi, cipue mukakupenda, cipue mukaluozi, cipue mukacipululu ca vimbongo. 8 Vuno honi apue mukakujumbula vangenzi na cizango cije cacili. Napande kupua mukakulihilula ikeye vavenia, uakusungama, uakulela, namu kakalemeso. 9 Napande kupua mukalukakatela mu vilongesa via lutsilielo, vije vivasa kutsiliela. Mu ngila eyi vene asa kutakamesa vakuavo na vilongesa via vusunga, nakusholola naua milonga ya vaje vaka kuluisa lizi.
10 Omuo kuvali vavengi vaka kutengulukila na vakakuluisa vakuavo na viuma viavo viangoco cikuma, vaje vakafutisi ya Vayunda. 11 Cafuila kuvavindika vihandeka viavo, omuo vakevo vakanienguesa ntanga yoshe mukuvalongesa vije kuvapandele kulinga muafua ya vilinga via shuamua, linga vauane vimbongo. 12 Kaha umo uavo, umo ua tunanguizi va Njambi tuavo, uje uahandekele vusunga mukuhandeka nguendi, “Vaka Kelete ntsimbu yoshe vapua vakamakuli, vapua tusitu vamu musenge, vilenda vakujujuka.” 13 Vije viahandekele viapuile via vusunga. Nankuma, vahandekele na mezi akuvambuka ngue mpoko, linga vakale nalutsilielo luamutuntu, 14 linga keti vovuilile ku visimo via Vayunda na ku mashiko akuhuma kuli vantu vaje vanaviana vusunga. 15 Viuma vioshe vinalele kuli vaje vanalele, vuno honi kukuesi cuma cakulela kuli vaje va nalijualesa, na kuli vaje vakuhona kutsiliela, omuo mana na vilinga viavo vinapu via kujuala. 16 Vahandeka nguavo vatantekeya Njambi, vuno honi vilinga viavo kuvavikavangeya. Vapua vaka kuzinda na kuhona kuononoka, kaha kuvapandele kulinga viuma viacili.