12
Denga daane hebagi dau o David
1 Gai aanei denga daane ne loomai gi daho David i Ziklag, i de masavaa oona nogo mmuni saele ai i a Saul, tama a Kish. (Gilaadeu nei ni daane madali denga daane hebagi dau ne balea ange ia i de hebagi. 2 Gilaadeu ni daane e hagauda ina mee hholu, gai e maua i de tili de mee hholu ma de maga de buada i de madau ma de masui; gilaadeu ni dangada niio Saul mai i de aamuli o Benjamin.)
3 Delaadeu dagi go Ahiezer madali Joash tama daane a Shemaah, taane Gibeah; ma Jeziel ma Pelet luu dama daane a Azmaveth; ma Beracah, ma Jehu taane Anathoth, 4 ma Ishmaiah taane Gibeon, go dahi daane dau i magavaa o denga daane dinodolu laa, gai se dagi niiolaadeu; ma Jeremiah, ma Jahaziel, ma Johanan, ma Jozabad taane Gederah, 5 ma Eluzai, ma Jerimoth, ma Bealiah, ma Shemariah, ma Shephatiah taane Haruph, 6 ma Elkanah, ma Isshiah, ma Azarel, ma Joezer, ma Jashobeam, ni hagadiilinga niio Korah, 7 ma Joelah ma Zebadiah, luu dama daane a Jeroham mai i Gedor.
8 Hanu daane Gad ne loomai ga dau ange gi David i de mommee buibui makaga i lodo henua. Gai gilaadeu ni daane mmahi ma de dau i de hebagi, gai e aabo i de hebagi i de mee hungihungi ma tao. Olaadeu mada e hagamaatagu bei mada o denga laiono, gai e kemo bei denga gazelle i ulu mounga. 9 Tagi go Ezer, togolua go Obadiah, togodolu go Eliab, 10 togohaa go Mishmannah, togolima go Jeremiah, 11 togoono go Attai, togohidu go Eliel, 12 togovalu go Johanan, togosiva go Elzabad, 13 tinoangahulu go Jeremiah, gai tinoangahulu ma dogodahi go Macbannai.
14 Gai aanei dagi o denga daane hebagi i de aamuli o Gad; taane baageaa hugadoo e maua i de hebagi ange gi e lau daane, gai taane mmahi hugadoo e maua i de hebagi ange gi e mano daane. 15 Aanei denga daane ne kau laa lo te vai o Jordan gi de baasi gee i tahi malama, go de masavaa e honu ai de vai, gai dangada alodahi e nnoho i lodo geelonga i de baasi i dua ma de baasi i dai o de vai gu maatagu ga saavini ga hulo gee.
16 E hanu hogi daane de aamuli o Benjamin ma de aamuli o Judah ne hulo gi daho David i dono mommee buibui makaga. 17 Gai David ne humai ga hedae ange gi gilaadeu, ga hai ange, “Noo goodou se loomai e hagaheloongoi mai gi de au ma de bale mai au, gai au e hagabuni adu gi goodou; gai noo goodou e kave denga longo gi ogu hagadaumee, gai tigi ai donu agu mee dee heohi ne hai, gai de Maadua o odaadeu dubuna madagidagi gi hagaduasala ina goodou.”
18 Gai de Hagasaalunga o de Maadua gu hano iho gi honga o Amasai, tagi o tinodolu, gai ia ne hai ange:
“David, gimaadeu e dau adu gi de goe!
Tama a Jesse, gimaadeu madali goe!
Koe gi noho baba, koe gi noho baba,
gai gi nnoho paba dangada e balea adu goe,
gai doo Maadua gu balea adu goe.”
Gai David ga abodonu ange gi gilaadeu, ga hai gilaadeu gi dagina denga hagabuulinga hebagi.
19 E hanu hogi daane de aamuli o Manasseh ne hulo ga dau ange gi David, i de masavaa oona ne humai ai madali de gau Philistia e hebagi ange gi a Saul. (Gai David tee bale ange de gau Philistia, go hiidinga dagi o denga daane Philistia ne buni bolo e hai ia gi hano gee; gilaadeu ne hagataba, “E hagamanavasaa mai gi gidaadeu noo ia e tili gidaadeu gai ga hagabuni ange gi dono dangada aamua go Saul.”) 20 De masavaa o David ne hano ai gi Ziklag, gai hanu hagadiilinga o Manasseh ne loomai ga dau ange gi de ia: go Adnah, ma Jozabad, ma Jediael, ma Michael, ma Jozabad, ma Elihu, aama Zillethai, gilaadeu ni dagi o denga mano i de vaaenga o Manasseh. 21 Gilaadeu ne bale ange David ga hebagi ange ai gi de gau gaiaa ma de daa dangada; gilaadeu ni daane mmahi i de hebagi, gai gilaadeu ni dagi niio denga daane hebagi o David. 22 Laangi alodahi gai e hanu dangada ne loomai e balea ange David, deelaa ai, gu soa mmao denga daane hebagi i ono daha, bei de hagabuulinga hebagi o de Maadua.
23 Gai aanei denga hagabuulinga hebagi ne loomai gi daho David i Hebron, ga gaavange ai de nohoanga hodooligi o Saul gi David, bei de hai a Tagi Maolunga gu hagadaba ai laa:
24 denga daane o Judah e hagauda ina de mee hungihungi ma dao — se 6,800;
25 denga daane dau i de aamuli Simeon e paba ange gi de hebagi — se 7,100;
26 denga daane o Levi — se 4,600; 27 gai daane madali Jehoiada, tagi o de huaabodu o Aaron — se 3,700, 28 ma Zadok, dahi dama daane mmahi i de hebagi, madali e dinolua ma dogolua dagi o de hebagi mai i dono huaabodu;
29 gai denga daane o Benjamin, go dangada o Saul — gilaadeu se dolumano, de baasi soa i gilaadeu ne daudali ange i a Saul ga dae mai ai gi de masavaa laa;
30 denga daane o Ephraim, ni daane mmahi ma de dau i delaadeu aamuli — se 20,800;
31 denga daane dahi luu baasi de aamuli o Manasseh, ne hili laa i olaadeu ingoo, gi loomai gi hagasula ina David gi hodooligi — se 18,000;
32 denga daane o Issachar, ni daane e tonu ange gi dagodo o de masavaa, ma de iloo de mee a de gau Israel e heohi i de hai — e lualau dagi madali olaadeu daane alodahi;
33 denga daane o Zebulun, ni daane gu paba ange gi de hebagi, madali denga hagadaagangaa goloa hebagi alodahi, gai ne buni bolo gilaadeu tee lua lodo donu i de bale ange David — se limasemada;
34 denga daane o Naphtali — se mano olaadeu dagi, madali e 37,000 daane hebagi e hagauda ina mee hungihungi ma dao;
35 denga daane o Dan gu paba ange gi de hebagi — se 28,600;
36 denga daane de aamuli o Asher, gilaadeu gu aabo ange ma de paba ange gi de hebagi — se haasemada;
37 denga daane de aamuli o Reuben ma Gad aama dahi luu baasi de aamuli o Manasseh, i baasi dua o Jordan, gu dau denga hagadaagangaa goloa hebagi — se 120,000.
38 Denga daane hebagi nei alodahi ne hagatau ga loomai ai madali olaadeu hagabuulinga gi Hebron, e hagasula ai David gi hodooligi i Israel alodahi. Gai de gau Israel ange laa ne buni ange hogi bolo e hai David gi hodooligi. 39 Gai gilaadeu ne nnoho i daho David i kilaa i e dolu laangi, ga gaimee ai ma de unu, go hiidinga olaadeu huaabodu ne hagadabena alaadeu gai e gaimee ai. 40 Gai dangada e paa ange gi gilaadeu mai loo i Issachar, ma Zebulun aama Naphtali, ne hagauda mai hanu gai i honga denga donkey, ma gamelo, ma donkey aama honga denga kaau ga loomai ai. Gai ne lagolago pelaoaa lligi, ma duudangaa fig, ma duudangaa raisin, ma uvaini ma lolo, ma kaau aama ssiibi, go hiidinga de henua o Israel gu honu i de malangilangi.