21
De dau o denga daane hebagi
(2 Sa 24.1-17)
1 Gai Satan ne hai baasi ange gi de gau Israel, ga hai David gi daulia de gau Israel. 2 Gai David ne hai ange gi Joab ma dagi o denga daane hebagi, “Goodou hulo daulia dangada alodahi o Israel mai i Dan ga dae ai gi Beersheba, gi iloo ai e au taelodo o dangada.”
3 Aagai a Joab ne hai ange gi de hodooligi, “Tagi Maolunga gi haia gi soa ange ono dangada i e lau hanonga. Dogu dangada aamua go de hodooligi, e aha, denga daane nei alodahi e dee nnoho i oo lalo? Gai gu aha gu lodo ai naa goe e hai de hegau nei e hagahaisala ai de gau Israel?”
4 Aagai gu kii muna a de hodooligi i muna a Joab, gai Joab ne hano ga hagadaga i Israel, muli mai gai ia ne aahe mai gi Jerusalem. 5 Gai Joab ne tala ange gi David taelodo o denga daane hebagi; gai se 1,100,000 daane o Israel e hebagi i de gadilaasa, madali e 470,000 daane o Judah.
6 Aagai a Joab tee dau denga daane i de aamuli o Levi ma Benjamin, go hiidinga ia tee buni ange gi muna a de hodooligi. 7 Gai de Maadua tee malangilangi i de mee laa; gai ia ne hagaduasala de gau Israel.
8 Gai David ne hai ange gi de Maadua, “Au gu haisala mmao i dagu hai de hegau nei. Aagai iainei, au e dangidangi adu, degi mai gi de au, doo dangada hai hegau; go hiidinga au ne lodo senga.”
9 Gai Tagi Maolunga ga hai ange gi Gad, taane hai hegau o David e daalaa mee e loomai, 10 “Hannoo hai ange gi David, ‘E hagadaba Tagi Maolunga: Au e gaavadu gi de goe e dolu mee; hilihilia dahi mee nei, gai au ga hagaduasala ai goe.’ ”
11 Gai Gad ne humai gi daho David, ga hai ange, “E hagadaba Tagi Maolunga, ‘Hilihilia dahi mee i mee e dolu nei: 12 go de onge i e dolu ngadau, be go de loomai o oo hagadaumee gi oohaa de henua, gai de gadilaasa a oo hagadaumee gi dolohia goe gi daea, aabe go de gaamai de gadilaasa a Tagi Maolunga i e dolu laangi — go dahi mee hagamaakau gi honga de henua, gai tangada de langi o Tagi Maolunga gi daa gi maakau dangada i mommee o Israel alodahi.’ Deenei ai, hilihilia be dee hee dagu hai e basa ange ai gi de ia ne haia nei au gi humai.”
13 Gai David ne hai ange gi a Gad, “Au gu duu ange gi dahi hai ngadaa laumalie. Au e dugu ange au gi Tagi Maolunga gi hagaduasala ina, go hiidinga dono lodo aloha e laumalie mmao; aagai au gi dee hagaduasala i daho dahi dangada.”
14 Gai Tagi Maolunga ga hai gi humai dahi mee hagamaakau gi Israel, gai se hidusemada dangada ne maakau i kilaa. 15 Gai de Maadua ne hai gi humai dahi dangada de langi gi daia gi maakau dangada i Jerusalem; aagai de masavaa a tangada de langi ne daamada ai de daa dangada, gai Tagi Maolunga gu gidee, gai ia gu sui dono lodo e hai de baubau laa, gai ia ga hai ange gi tangada de langi e daia laa dangada, “Gu lava, dugua iho doo lima!” De masavaa laa gai tangada de langi o Tagi Maolunga gu duu i gaogao de mommee hili huamanu o Araunah,*Araunah: de Beebaa Hebrew e hai ange bolo go Ornan, go dahi ingoo ange o Araunah; diiloo hogi denga gubu e 18-28. taane Jebus.
16 Gai David ne galo age ga gidee e ia tangada de langi o Tagi Maolunga e duu i lo te moana i lunga i magavaa de langi ma henua i lalo, gai ia e poo dana gadilaasa i lo tono lima ma e daohi ange gi honga o Jerusalem. Gai David ma denga dagi gu kahu laa i denga malo daladala ga ino gi lalo i honga de gelegele.
17 Gai David ga hai ange gi de Maadua, “E aha, e dee go au ne hai ange gi denga daane gi daulia dangada? Go au donu ne haisala i dagu hai de hegau dee heohi nei. Gai de gau nei e bei donu dagodo o denga ssiibi, ni aha alaadeu ne hai? Tagi Maolunga, dogu Maadua, au e dangidangi adu koe gi hagaduasala ina gimaadeu ma dogu huaabodu, gai koe aude gaamai de mee hagamaakau nei gi honga oo dangada.”
De hagaduu de mommee o ssigidaumaha
(2 Sa 24.18-25)
18 Gai tangada de langi o Tagi Maolunga ga hai a Gad gi hai ange gi David, ia gi hano gi hagaduulia dahi mommee o ssigidaumaha ange gi Tagi Maolunga, i de mommee hili huamanu o Araunah, taane Jebus. 19 Gai David ne hano ga hai gu bei muna a Gad gu tala i de ingoo o Tagi Maolunga.
20 De masavaa o Araunah e noho ai ma e hili ana grain, gai ia ne gidee tangada de langi laa; gai ana dama daane dogohaa gu hulo ga hulo ga mmuni. 21 Gai de masavaa o David ne humai ai, gai Araunah gu gidee adu ia, gai ia ga seesee adu i de mommee hili huamanu, ga ino luoono mada gi honga de gelegele i mada i mua o David.
22 Gai David ga hai ange gi de ia, “Gaamai gi de au doo mommee hili huamanu, gai au ga hagaduu ai dahi mommee o ssigidaumaha ange gi Tagi Maolunga, e hai ai gi tuu de mee hagamaakau i daho dangada. Hagao ina mai doo mommee hili huamanu i dono hagaoanga donu.”
23 Gai Araunah ga hai ange gi David, “Gaavee mee naa, ga hai ai be ni aha a de hodooligi e lodo ai. Tilo, au e gaavadu naa hogi denga kaau e hai ai denga sigidaumaha dudu, ma baabaa iai mee duuduu grain e hai ai de ahi, aama grain e hai ai ssigidaumaha o grain. Au e gaavadu mee nei alodahi.”
24 Aagai de hodooligi go David ne hai ange gi Araunah, “E deai, au e hagao donu gi odi ange de hagaoanga o de mommee nei; au e dee maua donu i de ngadi kave au mee e gaavange gi Tagi Maolunga, au e dee hai dagu ssigidaumaha dudu i mee oogu tee too ange aagena.”
25 Gai David ne hagao de mommee o Araunah i e onolau shekel†600 shekele bei se 15 pauni. goolo. 26 Gai David ga hagaduu dahi mommee o ssigidaumaha ange gi Tagi Maolunga i kilaa, ga hai ai denga sigidaumaha dudu ma sigidaumaha hagadanuaa magavaa. Gai ia ga dalodalo ange gi Tagi Maolunga, gai Tagi Maolunga ga basa ange gi dana dangidangi, ga hai gi hano iho de ahi mai i de langi gi duungia ssigidaumaha dudu laa.
27 Gai Tagi Maolunga ga basa ange gi tangada de langi laa, gai ia ga hagaahe ange dana gadilaasa gi lo tono hale. 28 De masavaa a David ne gidee ai bolo Tagi Maolunga ne basa ange gi de ia i de mommee hili huamanu o Araunah, taane Jebus, gai ia ga hai denga sigidaumaha i kilaa. 29 Gai de tabernacle o Tagi Maolunga a Moses ne hai laa i de vao, ma de mommee o ssigidaumaha dudu e daakodo i de mommee daumaha i Gibeon, i de masavaa laa. 30 Aagai David tee maua i de hano gi kilaa e dalodalo ange ai gi de Maadua, go hiidinga ia gu madagu i de gadilaasa a tangada de langi o Tagi Maolunga.