24
Vaevaaenga o de gau haimeedabu
1 Aanei denga hagabuulinga i de aamuli o Aaron:
Dama daane a Aaron: go Nadab, ma Abihu, ma Eleazar, aama Ithamar. 2 Aagai Nadab ma Abihu ne maakau i mua o delaau damana, gai teai donu alaau dama daane; gai Eleazar ma Ithamar ne sui gilaau ga hai ai hegau a de gau haimeedabu.*Lev 10.1-2 3 Gai David ma Zadok, dahi aamuli o Eleazar, aama Ahimelek, dahi aamuli o Ithamar, ne hagadau bale ga vaevae ai de gau nei ga gaavange alaadeu hegau e hai. 4 Gai ne soa ange dagi ne gidee mai i magavaa o hagadiilinga o Eleazar, i dagi mai i hagadiilinga o Ithamar. Gai deenei de hai ne vaevae ai gilaadeu: e dinoangahulu ma dogoono dagi mai i denga huaabodu o Eleazar, gai e dogovalu dagi mai i denga huaabodu o Ithamar. 5 Gai gilaadeu ne vaevae i de dada; go hiidinga hanu gilaadeu ni dagi niio de hale dabu ma dagi ange gi de Maadua mai hagadiilinga o Eleazar aama Ithamar.
6 Gai tangada sisi go Shemaiah, tama daane a Nethanel, ia se hagadiilinga niio Levi, ia ne sisi ga daohi olaadeu ingoo i mada i mua o de hodooligi, ma dagi o de henua — tangada haimeedabu go Zadok, ma Ahimelek tama daane a Abiathar, aama dagi o denga huaabodu o de gau haimeedabu ma de aamuli o Levi — dahi mai i de hagadiilinga o Eleazar, gai e dahi mai de hagadiilinga o Ithamar.
7 Taane ne dada i mua go Jehoiarib,
togolua go Jedaiah,
8 togodolu go Harim,
togohaa go Seorim,
9 togolima go Malkijah,
togoono go Mijamin,
10 togohidu go Hakkoz,
togovalu go Abijah,
11 togosiva go Jeshua,
tinoangahulu go Shecaniah,
12 tinoangahulu ma dogodahi go Eliashib,
tinoangahulu ma dogolua go Jakim,
13 tinoangahulu ma dogodolu go Huppah,
tinoangahulu ma dogohaa go Jeshebeab,
14 tinoangahulu ma dogolima go Bilgah,
tinoangahulu ma dogoono go Immer,
15 tinoangahulu ma dogohidu go Hezir,
tinoangahulu ma dogovalu go Happizzez,
16 tinoangahulu ma dogosiva go Pethahiah,
tinolua go Jehezkel,
17 tinolua ma dogodahi go Jakin,
tinolua ma dogolua go Gamul,
18 tinolua ma dogodolu go Delaiah,
gai tinolua ma dogohaa go Maaziah.
19 Aanei olaadeu hagabuulinga hai hegau i de masavaa olaadeu e ulu ai i de hale o Tagi Maolunga, bei dagodo o denga hainga gu hagamodu ange ai gi gilaadeu i daho delaadeu dubuna go Aaron, bei de hai a Tagi Maolunga, de Maadua o Israel gu tala ange ai gi de ia.
Hanu hagadiilinga o Levi
20 Gai de gau e doe i de aamuli o Levi:
mai i dama a Amram: go Shebuel;
mai i dama a Shubael: go Jehdeiah.
21 Gai mai i hagadiilinga o Rehabiah: Isshiah go tama madua.
22 Mai i hagadiilinga o Izhar: go Shelomoth;
mai i dama daane a Shelomoth: go Jahath.
23 Mai i dama daane a Hebron: Jeriah go tama madua, togolua go Amariah, togodolu go Jahaziel, gai togohaa go Jekameam.
24 Mai i dama daane a Uzziel: go Micah;
mai i dama daane a Micah: go Shamir.
25 Gai taina daane o Micah: go Isshiah;
mai i dama daane a Isshiah: go Zechariah.
26 Dama daane a Merari: go Mahli ma Mushi;
mai i dama daane a Jaaziah, go Beno.
27 Mai i dama a Merari: go Jaaziah ma Beno, ma Shoham, ma Zaccur aama Ibri.
28 Mai i dama daane a Mahli: go Eleazar, gai teai donu ana dama.
29 Mai i de hagadiilinga o Kish: tama daane a Kish go Jerahmeel.
30 Dama daane a Mushi: go Mahli, ma Eder, aama Jerimoth.
Aanei hagadiilinga o Levi, ma olaadeu huaabodu. 31 Denga daane nei ne dada hogi olaadeu duuhanga hegau bei olaadeu daina go denga daane de aamuli o Aaron, i mada i mua o de hodooligi go David ma Zadok, ma Ahimelek, aama dagi o denga huaabodu o de gau haimeedabu ma dagi o de aamuli o Levi. Gai ne dagodo daudahi donu huu delaadeu hai ne hili ai dangada i de huaabodu o taina madua aama taina gauligi.