De masavaa laa gai gu kona de onge i Samaria. 3 Gai Ahab ne hagahi Obadiah, taane e diiloo ange dono hale. (Gai Obadiah se daane e madagu mmao i Tagi Maolunga, 4 gai de masavaa a Jezebel ne daa ai ga maakau denga pelaabisi o Tagi Maolunga, gai Obadiah ne kave e lau pelaabisi ga hagammuni, i lodo e lua haonga i gaogao de mounga, e dagidinolima i de haonga, gai ia ne gaamai denga gai ma vai ga haangai ai gilaadeu.) 5 Gai Ahab ne hai ange gi Obadiah, “Hannoo hagadaga i denga vai alodahi i honga de henua aama lodo geelonga alodahi, ga tilo ai be hanu helii e haangai ai denga hoosa ma donkey gi mouli ai gilaadeu, gai gi dee daa ai hanu adaadeu manu.” 6 Gai Ahab ma Obadiah ne vvae lua de henua i olaau magavaa, gai gilaau ga hulo e hagadaga e tilo; Ahab ne hano ga hagadaga i dahi bido, gai Obadiah ne hano ga hagadaga i de bido ange laa.

7 De masavaa o Obadiah e seesee ai ma e hano, gai ia gu hedae ange gi Elijah. Gai Obadiah gu madea ia, gai ia ga ino gi lalo i ono mada i mua, ga ssili ange, “Elijah, dogu dangada aamua, go koe deenaa?”

8 Elijah ne hai ange, “Uaa, go au donu deenei. Hannoo daalaa ange gi doo dangada aamua, bolo au i kinei.”

9 Gai Obadiah ga ssili ange, “Se baubau aha aagu gu hai laa, gai koe ga dugu ange ai naa au gi Ahab gi daia gi magau? 10 Au e hagatoo donu i de mouli o Tagi Maolunga, doo Maadua, bolo e deai donu se huaahenua, aabe se nohoanga hodooligi daudahi a dogu dangada aamua tigi kave hanu dangada gi saalaa ai goe. Gai de masavaa naa huu a dahi huaahenua, aabe se nohoanga hodooligi e tala ai bolo koe e dee maleva i kilaa, gai Ahab ga hai gilaadeu gi hagatoo donu ange, bolo gilaadeu tigi gidee donu goe. 11 Gai iainei koe e hai mai bolo au gi hano gi daalaa ange gi dogu dangada aamua, bolo koe i kinei? 12 Gai de masavaa naa donu huu oogu e hano gee mai ai i kinei, gai de Hagasaalunga o Tagi Maolunga ga kave goe gi dahi mommee aagu e dee iloo. Gai noo au e hano e tala ange au muna gi Ahab, gai ia tee gidee goe, gai ia e daa naa donu au gi magau. Gai au, doo dangada hai hegau e madagu i Tagi Maolunga, mai i dogu gauligi. 13 Dogu dangada aamua, tigi ai naa donu dangada ne daalaa adu gi de goe, bolo de masavaa a Jezebel ne daa ai ga maakau denga pelaabisi o Tagi Maolunga, gai au ne kave e lau pelaabisi o Tagi Maolunga ga hagammuni i lodo e lua haonga, e dinolima i dahi haonga, gai au ne kave hogi hanu gai ma vai ga haangai ai gilaadeu? 14 Gai koe e hai mai, bolo au gi hano gi daalaa ange gi dogu dangada aamua bolo koe i kinei? Ia ga daa au gi magau.”

15 Gai Elijah ga hai ange, “Au e hagatoo donu i de mouli o Tagi o denga hagabuulinga hebagi, go de ia oogu e hai hegau ange nei aagena, bolo au e hedae ange naa donu gi Ahab ailaa nei.”

16 Deelaa ai, Obadiah ne hano ga hedae ange gi Ahab, ga tala ange muna laa gi de ia, gai Ahab ga humai e hedae ange gi Elijah. 17 De masavaa a Ahab ne gidee ai Elijah, gai Ahab ga hai ange gi de ia, “E aha, deenaa goe, tangada e haia ga hai ngadaa de gau Israel?”

18 Elijah ne hai ange, “E dee go au e hagahai ngadaa ina de gau Israel, gai go koe, ma de huaabodu o doo damana, go hiidinga goodou gu tili hainga a Tagi Maolunga, gai gu daudali ange i denga Baal. 19 Iainei gai koe hagahia dangada o Israel alodahi gi hagabuni i honga de mounga go Carmel. Gai gaamai hogi denga pelaabisi o Baal e 450 laa, aama de pelaabisi e haalau o Asherah, go dangada e gaimee i teebele o Jezebel.”

20 Gai Ahab ne aalu dangada i Israel alodahi, ma denga pelaabisi gi hagabuni i honga de mounga go Carmel. 21 Gai Elijah ne humai ga duu i mada i mua o dangada alodahi, ga hai ange, “Dee hee maa taulooloa doodou lodo lagolago? Noo Iahweh go de Maadua, gai goodou daudali ange i de ia; aagai noo Baal go de Maadua, gai goodou daudali ange i de ia.”

Gai dangada gu dee mmuu.

22 Gai Elijah ga hai ange gi gilaadeu, “Go au donu huu e doe i denga pelaabisi o Tagi Maolunga, aagai Baal se 450 ono pelaabisi. 23 Goodou gaamai e lua kaau daane gi kinei. Gai gilaadeu gi hilihilia dahi kaau maalaadeu, ga duuduu ono aalanga, ga hagatau ange gi honga lahhie, gai gilaadeu e dee gaavange de ahi e dudu ai. Gai au e hagadabena naa hogi de kaau ange laa ga dugu ange gi honga denga lahhie, gai au e dee gaavange hogi de ahi e dudu ai. 24 Gai goodou ga dalodalo ange gi doodou diinonga, gai au ga dalodalo ange hogi gi Tagi Maolunga, gai be goai naa huu de gilaau e basa mai i de ahi, gai go ia de Maadua abodonu.”

Gai dangada alodahi ga hai ange, “E danuaa au muna.”

25 Gai Elijah ga hai ange gi denga pelaabisi o Baal, “Go goodou i mua e hilihilia dahi kaau daane ga hagadabena, go hiidinga goodou e soa. Gai goodou ga dalodalo ange gi doodou diinonga, aagai goodou e dee gaavange de ahi e dudu ai doodou sigidaumaha.” 26 Gai gilaadeu ne kave de kaau daane gu gaavange laa gi gilaadeu ga hagadabena.

Gai gilaadeu ga dalodalo ange gi Baal, mai i taiao ga dae ai gi de hualaangi, ga hai ange, “Baal, basa mai gi amaadeu dalodalo!” Aagai e deai donu se leo aabe se dangada e basa ange gi alaadeu dalodalo. Gai gilaadeu ga aanu saele laa luu baasi delaadeu mommee o ssigidaumaha gu hagaduu laa.

27 Gai ga hualaangi huu de mee, gai Elijah ga hagammae manava gilaadeu, ga hai ange, “Goodou hevaalogi, go hiidinga ia se maadua! Agu made ia e noho ma e hagasaele hanu mee, be ia gu hano gi de hale i honga tai, be gu hano ma e hagadaga saele, aabe ia gu seni gai tigi alahage.” 28 Gai gilaadeu ga kii ange de hevaalogi, ga selesele olaadeu angaanga i denga gadilaasa ma dao, bei delaadeu dahulinga i de laa tubua, gai gu sali mai todo i olaadeu angaanga. 29 Gai gilaadeu ne hevaalogi ma de hai mee nei, ga dae ai gi de masavaa o ssigidaumaha i de ahiahi, gai teai donu se leo be se dangada ne basa ange aabe ne anga ange gi alaadeu dalodalo.

30 Gai Elijah ga hai ange gi dangada alodahi, “Goodou loomai gi paa mai goodou gi ogu daha.” Gai dangada alodahi ne loomai ga hagapaa ange gi de ia. Gai ia ga ahe ange ga hagaduu age de mommee o ssigidaumaha a Tagi Maolunga gu maoha laa ma e dagodo ai. 31 Gai Elijah ga kave e madaangahulu ma lua hadu, go taelodo o denga aamuli o dama daane a Jacob, go taane a Tagi Maolunga ne hai ange laa gi de ia, “Koe e hagaingoo ange naa go Israel.” *Gen 32.28; 35.10 32 Gai Elijah ga hai denga hadu ga hagaduu ai dahi mommee o ssigidaumaha i de ingoo o Tagi Maolunga, gai ia ga geli dahi valavala i luu baasi de mommee o ssigidaumaha laa, gai ia ne hai gi oo ange aagena e lua seah*2 seahagu made se haa gaalene. golee. 33 Gai ia ga hagatau ange denga lahhie gi honga de mommee o ssigidaumaha, ma de duuduu aalanga o de kaau daane laa ga dugu ange gi honga denga lahhie. Gai ia ga hai ange gi dangada, “Goodou asua mai e haa ssaa vai ma gi liingia ange gi honga ssigidaumaha dudu aama honga denga lahhie.”

34 Gai ia ne hai ange hogi, “Goodou aahe ange haia.” Gai gilaadeu ga aahe ange ga hai bei ana muna.

Gai ia ga hai ange, “Goodou aahe ange haia i tolu hanonga.” Gai gilaadeu ga aahe ange ga hai i tolu hanonga. 35 Gai denga vai laa ne hai ga kona de ssui honga de mommee o ssigidaumaha laa, gai ne hhao hogi ga honu age lo te valavala laa.

36 Gai ga dae mai huu de masavaa e hai ai ssigidaumaha i de ahiahi, gai de pelaabisi go Elijah ga duu i gaogao de mommee o ssigidaumaha ga dalodalo, ga hai ange, “Tagi Maolunga, de Maadua o Abraham, ma Isaac, aama Israel, ailaa nei gai koe haia gi iloo e dangada bolo go koe de Maadua i Israel, gai go au doo dangada hai hegau, gai go koe donu ne hai mai au gi haia hegau nei. 37 Tagi Maolunga, basa mai gi dagu dalodalo, gi iloo ai e de huaadangada nei bolo go koe donu go Iahweh, de Maadua abodonu, gai koe gu ahe ange e hagadaahuli mai olaadeu lodo.”

38 De masavaa laa donu huu, gai Tagi Maolunga ga hai de ahi gi hano iho, gi duungia ssigidaumaha laa, ma denga lahhie laa, ma denga hadu ma gelegele laa, aama de hai gi masa vai i lo te valavala laa.

39 Gai ga gidee huu e dangada mee laa, gai gilaadeu ga ino gi lalo ga hagapaa olaadeu mada gi honga de gelegele, ga hagataba, “Iahweh go de Maadua abodonu! Iahweh go de Maadua abodonu!”

40 Gai Elijah ga hai ange gi gilaadeu, “Goodou booboogia denga pelaabisi o Baal; goodou aude dugua donu dahi dangada daudahi gi ola.” Gai dangada ga booboo denga pelaabisi laa, gai Elijah ga kave gilaadeu gi de geelonga go Kishon ga daa ai gu maakau.

43 Gai ia ga hai ange gi dono dangada hai hegau, “Hannoo diiloo adu honga tai.” Gai ia ne hano ga tilo.

Gai ia ga hai ange, “E deai donu agu mee e gidee adu.”

Ne hidu hanonga a Elijah ne hai ange ai ia gi ahe gi diiloo.

44 Gai de hidu hanonga huu gai ia ga hai ange, “Tilo, dahi damaa hagausinga bei de lima o tangada gu hanage i honga tai.”

Gai Elijah ga hai ange gi de ia, “Hannoo hai ange gi Ahab, ‘Hagadabena ina doo hada mage hano iho gi lalo, kana dee maua e goe i de hano i hiidinga de langi pala.’ ”

45 Gai tee mmule donu gai gu daamada de hagauliuli age lo te langi, gai gu ssau mai hogi de madangi, gai dahi langi maadolu gu pala iho gi honga o Ahab, i de masavaa oona e savini ai e hano gi Jezreel. 46 Gai mahi o Tagi Maolunga gu gaavange gi Elijah, gai ia ga hagabigibigi age dono malo laa daha gi dono daogubu, gai ia ga savini ga hano gu dae gi Jezreel i mua o Ahab.