20
De hagadee kii o Moab ma Ammon
1 Dua mee laa, gai de gau Moab, ma de gau Ammon aama hanu dangada Meun*dangada Meun: muna nei go lo te Beebaa Greek iai. De Beebaa Hebrew e hai ange de gau Ammon. ne loomai e hebagi ange gi Jehoshaphat.
2 Gai hanu daane ne loomai ga hai ange gi Jehoshaphat, “Dahi hagabuulinga hebagi soa mmao gu loomai i Edom, i de baasi laa o Tai Soolo, e hebagi adu gi de goe. Gai gilaadeu gu tae mai gi Hazazon Tamar (e bei go En Gedi).” 3 Gai Jehoshaphat gu madagu, gai ia gu maanadu de ssili gi iloo i daho Tagi Maolunga, gai ia ga hagailoo ai de hai de hagahiikai i Judah alodahi. 4 Gai dangada o Judah ga hagabuni ga dangidangi ange gi Tagi Maolunga i de bale; gai gilaadeu ne loomai i denga aduhale alodahi o Judah e dalodalo ange gi Tagi Maolunga.
5 Gai Jehoshaphat ga duu age i magavaa o dangada o Judah ma Jerusalem gu hagabuni laa i de hale o Tagi Maolunga, i gaogao de buibui hoou, 6 ga dalodalo ga hai ange, “Tagi Maolunga, de Maadua o omaadeu dubuna madagidagi. E aha, e dee go koe de Maadua o de langi? Go koe Tagi o nohoanga hodooligi alodahi o denga huaahenua. Ssauaa ma de mmahi ni mee niiau, gai e deai donu se dangada e maua i de hai baasi adu gi de goe. 7 Demaadeu Maadua, e aha, e dee go koe ne aaua gee dangada nogo nnoho i de henua nei i mada i mua o oo dangada, go de gau Israel, gai ga gaavange de henua gi hagadiilinga o doo soa go Abraham gi henua ai ga hano ai?*Isa 41.8; Jms 2.23 8 Gai gilaadeu ne loomai ga nnoho ai, ma de hagaduu age dahi hale dabu e hagadubu ai doo ingoo; gilaadeu ne hagataba, 9 ‘Noo gu baa mai de hai ngadaa gi gimaadeu — e dee hilihili be se hebagi, be se mee hagamaakau, aabe go de onge — gai gimaadeu gi loomai gi tuu i oo mada i mua i ma te hale nei, go de hale e hagadubu ai doo ingoo, gai gimaadeu e dangidangi adu gi de goe i demaadeu hai ngadaa, gai koe e hagalaangona amaadeu dalodalo ga hagaola gimaadeu.’
10 Aagai aanei denga daane mai Ammon ma Moab aama de mounga go Seir, go de mommee aau tee dugu ange de gau Israel gi hebagi ange aagena, i de masavaa olaadeu ne loomai ai i Egypt; gai gilaadeu ne hulo ga hagaui gee, tee daa gilaadeu gi maakau.*Deut 2.4-19 11 Tilo, gilaadeu gu sui mai amaadeu hegau i delaadeu loomai e hai gimaadeu gi hulo gee i de henua aau gu gaamai gi gimaadeu gi henua ai. 12 Demaadeu Maadua, koe gi hagaduasala ina gilaadeu. Go hiidinga gimaadeu e dee pau ange gi de hagabuulinga hebagi soa gu loomai nei e hebagi mai gi gimaadeu. Gimaadeu e dee iloo be ni aha amaadeu ga hai, aagai gimaadeu e tali de bale mai i oo daha.”
13 De masavaa laa gai denga daane alodahi o Judah madali olaadeu bodu ma alaadeu dama gu tuu i mada luu mada o Tagi Maolunga.
14 Gai de Hagasaalunga o Tagi Maolunga gu hano iho gi honga o Jahaziel, tama daane a Zechariah, tama daane a Benaiah, tama daane a Jeiel, tama daane a Mattaniah, se hagadiilinga niio Asaph mai i de aamuli o Levi, i de masavaa oona e duu ai i magavaa o dangada.
15 Gai ia ga hai ange, “Dangada alodahi o Judah ma dangada e nnoho i Jerusalem, aama de hodooligi go Jehoshaphat, goodou hagalaangona muna a Tagi Maolunga adu gi goodou: ‘Goodou aude maatagu, gai gi dee manavasaa oodou lodo i denga daane hebagi soa nei, go hiidinga e dee go goodou e hebagi aagai go de Maadua.*Deut 20.1-4 16 Daiao gai goodou loiho mage hebagi ange gi gilaadeu. Gai gilaadeu e loomai naa ga kage age i de madadaagodo o Ziz, gai goodou e gidee naa gilaadeu i de bido laa o de geelonga, i baasi dua o de vao go Jeruel. 17 E dee go goodou e hebagi i de hebagi nei. Gai goodou hagatau, ma de tuu ga tilo de hagaola a Tagi Maolunga goodou.’ Judah ma Jerusalem, goodou aude maatagu, aabe gi manavasaa oodou lodo. Gai goodou hulo hebagi ange gi gilaadeu daiao, gai Tagi Maolunga e hano donu madali goodou.” *Exo 14.13-14
18 Gai Jehoshaphat ne ino gi lalo ga hagabaa luoono mada gi honga de gelegele, gai dangada o Judah ma Jerusalem alodahi ne ino hogi i mada luu mada o Tagi Maolunga ga daumaha ange gi de ia. 19 Gai denga daane de aamuli o Levi, mai i de hagadiilinga o Kohath, ma Korah, ga tuu age ga hevaalogi ga tuhi Tagi Maolunga, de Maadua o Israel.
20 Gai gilaadeu ne oho age i taiao ga hulo gi de vao o Tekoa. De masavaa olaadeu ne daamada ai de seesee e hulo, gai Jehoshaphat ne duu age ga hai ange, “Denga daane o Judah ma Jerusalem, goodou hagalaangona agu muna! Goodou hagadonusia Tagi Maolunga doodou Maadua, gi tuu ai goodou gi makaga. Gai hagadonusia ono pelaabisi gi hagadagadaga age ai goodou.” 21 Dua de hai a Jehoshaphat de hagasaele madali dangada, gai ia ga hili ange hanu daane gi kahu i olaadeu malo dabu ma gi daahili ange gi Tagi Maolunga, ma de tuhi ia ga hulo ai i mada i mua o denga daane hebagi, gai gilaadeu gi hagataba,
“Hagaahea ange de abodonu gi Tagi Maolunga,
dono abodonu e dagodo ga hano ai.” *Psa 118.1-4, 29
22 Gai de masavaa huu olaadeu ne daahili ai ga tuhi, gai Tagi Maolunga ga daamada de hebagi ange gi denga daane Ammon, ma denga daane Moab, aama denga daane mai i de mounga go Seir, gu loomai laa e hebagi ange gi Judah, ga hagadee kii gilaadeu. 23 Denga daane Ammon ma denga daane Moab ne huuhuli ange ga hebagi ange gi denga daane mai de mounga go Seir, ga daa gilaadeu gu odi i de maakau. Gai dua huu delaadeu daa ga odi denga daane mai i Seir, gai gilaadeu ga hagadau daa donu huu gilaadeu.
24 De masavaa huu o denga daane o Judah ne tae mai ai gi de hale dagitilo e duu laa i de vao, ga kalo adu gi de mommee iai denga daane hebagi soa laa, gai gilaadeu gu gidee bolo dangada gu odi i de maakau ma e daakodo saele i honga de gelegele, teai donu se gilaadeu ne ola. 25 Gai Jehoshaphat ma ono daane ne loomai e kave goloa o olaadeu hagadaumee, gai gilaadeu ne gidee denga manu haangai lagolago mmao, ma goloa, ma malo, aama goloa hagamogomogo, gai gilaadeu tee maua i de kave gi odi i hiidinga de lagolago mmao goloa laa. Gai ne dolu laangi olaadeu ne aahe mai ai e kave gu odi goloa laa. 26 Gai de hagahaa laangi huu gai gilaadeu ga hagabuni i de geelonga go Beracah, ga tuhi Tagi Maolunga. Gai de ingoo o de mommee laa gu hagaingoo ange go de geelonga o Beracah†Beracah i muna Hebrew e bei go de tuhi. ga dae mai ai gi anailaa nei.
27 Gai Jehoshaphat ga dagi denga daane alodahi o Judah ma Jerusalem ga aahe ai gi Jerusalem i de malangilangi, go hiidinga Tagi Maolunga gu hai gi malangilangi gilaadeu i dana hagadee kii olaadeu hagadaumee. 28 Gai gilaadeu ne hulo gi lo te hale o Tagi Maolunga i Jerusalem ga hagadangidangi ai i denga harp ma lyre aama trumpet.
29 Gai dangada i denga nohoanga hodooligi o denga huaahenua alodahi gu maatagu i de Maadua, i de masavaa alaadeu ne langona ai bolo Tagi Maolunga ne hebagi ange gi denga hagadaumee o de gau Israel. 30 Gai de nohoanga hodooligi o Jehoshaphat gu nnoho paba, go hiidinga de Maadua gu gaavange gi gilaadeu de nnoho paba.
De hagaodi de hodooligi o Jehoshaphat
(1 Ki 22.41-50)
31 Gai Jehoshaphat ne dae ange ga hodooligi i Judah i de masavaa ne matolu ma lima ai ono ngadau, gai ia ne hodooligi i e madalua ma lima ngadau i Jerusalem. Gai de ingoo o dono dinana go Azubah, tamaa hine a Shilhi. 32 Gai ia ne ago ange i hegau a dono damana go Asa, ia tee hano gee ai donu; ia ne hai hegau i de heohi i mada luu mada o Tagi Maolunga. 33 Aagai denga mommee daumaha tee oha; gai dangada tee dugu ange hogi olaadeu lodo gi de Maadua o olaadeu dubuna madagidagi.
34 Gai hegau a Jehoshaphat ange laa, mai i taamada ga dae ai gi de hagaodi, gu daohi madali mee a Jehu tama daane a Hanani ne sisi, ga sisi i lo te beebaa o denga hodooligi o Israel.
35 Dua mee nei gai Jehoshaphat ne hagabuni ange gi Ahaziah de hodooligi o Israel, taane ne haia denga hegau baubau. 36 Ia ne hagatuu hanu vaga hagao mee madali Ahaziah. Gai vaga laa ne hagatuu i Ezion Geber. 37 Gai Eliezer tama daane a Dodavahu mai i Mareshah ne tala pelaabisi dagodo o Jehoshaphat, ga hagadaba, “Go hiidinga koe ne hagabuni ange gi Ahaziah, deelaa ai, Tagi Maolunga e oha naa au mee ne hai.” Gai denga vaga laa ne maoha donu huu, tee maua i de maalanga e hulo e hagao mee.