24
De hodooligi o Joash i Judah
(2 Ki 12.1-16)
Gai Joash gu hidu ono ngadau i de masavaa oona ne dae ange ai ga hodooligi, gai ia ne hodooligi i e madahaa ngadau i Jerusalem. Gai de ingoo o dono dinana go Zibiah, se hine mai i Beersheba. Gai Joash ne hai hegau i de heohi i mada luu mada o Tagi Maolunga i taulooloa de mouli o tangada haimeedabu go Jehoiada. Gai Jehoiada ne hili e dogolua haahine e hai ai bodu o Joash, gai ia ne hagadili hanu dama daane ma hanu damaa hine.
Hanu masavaa gi muli mai gai Joash ne maanadu de hagaahe age de hale o Tagi Maolunga. Gai ia ga hagabuni de gau haimeedabu ma daane de aamuli o Levi, ga hai ange gi gilaadeu, “Goodou hulo gi denga aduhale o Judah hagabudulia ai denga sseene a de gau Israel alodahi e daohi age laa i ngadau alodahi, e hagaahe age ai de hale o doodou Maadua. Gai haia de hegau nei i de masavaa moolau.” Aagai denga daane de aamuli o Levi tee hai de hegau laa gi moolau.
Gai de hodooligi ne hagahi tangada haimeedabu maolunga go Jehoiada ga ssili ange gi de ia, “Gu aha goe tigi hai ai naa daane de aamuli o Levi gi hulo gi hagabudulia mai i Judah ma Jerusalem taagisese gu hagamodu i daho Moses, tangada hai hegau o Tagi Maolunga, ma de gau Israel e hai ai de hale malo o de tala hagadonu?” *Exo 30.11-16
Hanu masavaa gu hulo gai denga dama daane a de hine baubau go Athaliah ne hulo ga ulu gi lo te hale o de Maadua ga hai denga goloa dabu i lo te hale o Tagi Maolunga ga daumaha ange ai gi denga Baal.
Gai de hodooligi ga hagadaba bolo gi hagaduulia dahi ngavesi gi dugua i ma te hale o Tagi Maolunga i gaogao de haitoga. Gai gu adi ange gi dangada e nnoho i Judah ma Jerusalem bolo gilaadeu gi gaamai gi Tagi Maolunga taagisese a Moses, tangada hai hegau o de Maadua, gu hagamodu ange laa gi de gau Israel i de vao. 10 Gai denga dagi o de henua alodahi ma dangada alodahi ne malangilangi i de gaamai alaadeu sseene e daohi age ga hhao ai gu honu de ngavesi laa. 11 Gai masavaa alodahi o daane de aamuli o Levi e gaamai ai de ngavesi laa gi de gau hai hegau o de hodooligi, gai ga gidee naa huu e gilaadeu bolo gu laumalie donu de sseene i ono lodo, gai tangada sisi o de hodooligi ma tagi i lalo o tangada haimeedabu maolunga ga loomai ga aau sseene laa, gai ga hagaahe de ngavesi ga dugu i dono duulanga. Gilaadeu ne hai de hegau laa i laangi alodahi ga hagabudu ai dahi sseene laumalie mmao. 12 Gai de hodooligi ma Jehoiada ne gaavange sseene laa gi denga daane e haia hegau o de hale o Tagi Maolunga, gai gilaadeu ga hagao labagau o denga hadu ma laagau gai gilaadeu ga hai ai de hale o Tagi Maolunga. Gilaadeu ne hagao hogi hanu labagau o denga iron ma bronze gi balea e hagaahe age ai de hale o Tagi Maolunga.
13 Gai denga daane e haia de hegau ne hagammahi ga hai hegau, gai gu ssula hegau i delaadeu hai. Gai gilaadeu ga hagaahe age de hale o de Maadua bei dono hai ne hagaduu ai i taamada ma de hai ga makaga. 14 De masavaa huu ne lava ai de temple, gai denga sseene e doe gu gaavange gi de hodooligi ma Jehoiada, gai mee laa ne hai ai denga goloa o de hale o Tagi Maolunga: go goloa e hai ai hegau o taumaha ma de hai ai denga sigidaumaha dudu, ma denga gumedi ma denga goloa goolo aama goloa selevaa ange laa. Gai taulooloa de mouli o Jehoiada, gai dangada ne duudagi donu de hai denga sigidaumaha dudu i lo te hale o Tagi Maolunga.
15 Gai de masavaa huu o Jehoiada ne madumadua ai, gai ia gu magau; gai ia gu 130 ono ngadau i de masavaa oona ne magau ai. 16 Gai gilaadeu ga danu ia madali denga hodooligi i de aduhale o David, i hiidinga hegau danuaa aana ne hai ange gi de Maadua ma dono temple i Israel.
De huli gee o Joash i Tagi Maolunga
17 Dua huu de magau o Jehoiada, gai dagi o Judah ga loomai gi daho de hodooligi ga hagadubu ia, gai ia ga daudali i alaadeu muna. 18 Gai gilaadeu ne tili de hale o Tagi Maolunga, de Maadua o olaadeu dubuna madagidagi, gai ga daumaha ange gi duludulu laagau o Asherah ma denga diinonga. Gai de Maadua ga hagaduasala Judah ma Jerusalem i dono lili. 19 Gai e dee galemu donu Tagi Maolunga ne hai gi loomai denga pelaabisi gi haia dangada gi aahe mai gi de ia, gai e dee galemu donu gilaadeu ne hagakana ange gilaadeu, aagai gilaadeu tee llodo e hagallongo alaadeu muna.
20 Gai de Hagasaalunga o de Maadua ne hano iho gi honga o Zechariah tama daane a tangada haimeedabu go Jehoiada, gai ia ga duu age i magavaa o dangada, ga hai ange gi gilaadeu, “E hagadaba de Maadua, ‘Gu aha goodou gu hagahaisala ai naa hainga a Tagi Maolunga? Goodou e dee maua naa donu gi hagadagadaga age, go hiidinga goodou gu tili Tagi Maolunga, deelaa ai, ia gu tili hogi goodou.’ ” *Mat 23.35; Luke 11.51
21 Aagai gilaadeu ga hagasaele ange de daa ia gi magau. Gilaadeu ne daudali i muna a de hodooligi ga maga ia gu magau i denga hadu i lo te buibui o de hale o Tagi Maolunga. 22 Gai Joash ne ngalo donu e ia de abodonu ange o Jehoiada, tamana o Zechariah gi de ia, gai ia ne daa dana dama daane ga magau. De masavaa o Zechariah gu dai magau ai, gai ia ga hai ange, “Tagi Maolunga gi diiloo gi suuia adu au hegau!”
23 Gai de hagaodi huu o de ngadau laa, gai denga daane hebagi o Syria ne loomai ga hebagi ange gi Joash. Gilaadeu ne loomai gi Judah ma Jerusalem, ga daa dagi o dangada alodahi, gai ga kave goloa alaadeu ne mau i de hebagi gi daho delaadeu hodooligi i Damascus. 24 Gai e dee galemu donu ne sogoisi donu huu daane hebagi o Syria ne loomai, gai Tagi Maolunga ne dugu ange gilaadeu gi hagadee kii ina dahi hagabuulinga hebagi e soa ange laa gilaadeu, go hiidinga dangada o Judah gu tili Tagi Maolunga, de Maadua o olaadeu dubuna madagidagi; gai de hagaduasala nei ne hai ange gi Joash. 25 De masavaa o de gau Syria ne hulo gee ai, gai gilaadeu gu lava i de hagalagolagohia Joash. Gai ono daane gu buni bolo ga daa ia gi magau, go hiidinga ia ne daa ga magau tama daane a Jehoiada, tangada haimeedabu; gai gilaadeu ne daa ia ga magau i honga dono moenga. Gai ia gu magau, gai gilaadeu ga danu ia i de aduhale o David, gai tee danu ia i lodo daanunga o denga hodooligi.
26 Gai denga daane ne buni laa bolo e daa ia gi magau go Zabad,*Zabad, aabe go Jozabad. tama daane a Shimeath, se hine Ammon, ma Jehozabad, tama daane a Shimrith, se hine Moab. 27 Gai dagodo o ana dama daane, ma muna ne hagabaubau ai ia, ma de hagaduu age o de hale o de Maadua, e sisi i lo te beebaa e daohi ai laa hegau a denga hodooligi. Gai dana dama daane go Amaziah ga sui ia ga hodooligi ai.

*24:6 Exo 30.11-16

*24:20 Mat 23.35; Luke 11.51

*24:26 Zabad, aabe go Jozabad.