34
De hodooligi o Josiah i Judah
(2 Ki 22.1-2)
1 Gai Josiah gu valu ono ngadau i de masavaa oona ne dae ange ai ga hodooligi, gai ia ne hodooligi i e matolu ma dahi ngadau i Jerusalem. 2 Gai ia ne hai hegau i de heohi i mada luu mada o Tagi Maolunga, ma de ago ange i hegau a dono dubuna go David, ia tee hagahaisala donu dahi mee daudahi.
De oha a Josiah mommee daumaha o denga diinonga
3 Gai de valu ngadau huu oona ne hodooligi ai, i de masavaa oona goi dama daane ai, gai ia ga daamada de ssala de Maadua o dono dubuna go David. Gai de madaangahulu ma lua ngadau huu, gai ia ga daamada de hagagilimalali Judah ma Jerusalem. Ia ne aau denga mommee daumaha, ma duludulu laagau o Asherah, ma denga diinonga laagau aama diinonga baalanga. 4 Gai ia ne hai hogi dangada gi oohaa ina mommee o ssigidaumaha o Baal i ono mada i mua, ma de duuduu iho denga mommee o ssigidaumaha o mee maanongi e tuu laa i kilaa, ma de hadihadi denga duludulu laagau o Asherah aama diinonga baalanga ma laagau. Gai ia ne mmili ga lligi mee laa ga doha saele i honga daanunga o dangada ne sigidaumaha ange gi denga diinonga laa. 5 Ia ne dudu hogi ivi o de gau haimeedabu i honga olaadeu mommee o ssigidaumaha, ga hagagilimalali ai Judah ma Jerusalem. 6 Ia ne hai hogi mee nei i denga aduhale o Manasseh, ma Ephraim aama Simeon, ga dae ai loo gi Naphtali, ma mommee maoha i luu baasi o denga mommee nei; 7 ia ne oha iho hogi denga mommee o ssigidaumaha ma duludulu laagau o Asherah, ga mmili gu ni gelegele lligi, ma de duuduu iho denga mommee e dudu ai mee maanongi i honga de henua o Israel alodahi. Dua mee nei gai ia ne ahe gi Jerusalem.
De gidee o de beebaa o de hainga
(2 Ki 22.3-20)
8 Gai de madaangahulu ma valu ngadau huu o Josiah ne hodooligi ai, i dua dana hagagilimalali de henua ma de temple, gai ia ne hai gi hulo Shaphan tama daane a Azaliah, ma Maaseiah tagi o de aduhale, madali Joah tama daane a Joahaz, tangada daohi, gi hagaahea age de hale o Tagi Maolunga dono Maadua.
9 Gai gilaadeu ne hulo gi daho tangada haimeedabu maolunga go Hilkiah ga gaavange gi de ia denga sseene gu gaamai laa gi de hale o de Maadua, gai de gau hagaloosi haitoga mai i de aamuli o Levi ne hagabudu sseene laa i daho de aamuli o Manasseh, ma de aamuli o Ephraim aama dangada e doe i Israel, ma dangada alodahi o Judah ma Benjamin aama dangada e nnoho i Jerusalem. 10 Gai gilaadeu ne gaavange sseene laa gi denga daane e dagina hegau o de hale o Tagi Maolunga. Gai denga daane laa ga hagao ange ai de gau hai hegau e haia ange laa aama de hagaahe age de hale daumaha. 11 Gilaadeu ne gaavange hogi sseene gi denga labagau o laagau ma de gau hagaduu hale, gai gilaadeu ga hagao ai denga hadu gu hagamalali, ma laagau e hai ai dogai ma ssanga o de hale daumaha a denga hodooligi o Judah gu tili ma gu baubau.
12 Gai denga daane laa ne kana ange ga hai de hegau laa. Gai denga daane ne dagina gilaadeu go Jahath, ma Obadiah, luu daane de aamuli o Levi mai i de hagadiilinga o Merari, aama Zechariah ma Meshullam, mai i de hagadiilinga o Kohath. Gai denga daane alodahi i de aamuli o Levi e mmau i de hagadangidangi i denga mee hagadangidangi 13 ne dagi de gau molimoli mee, ma denga hagadaagangaa hegau alodahi; e hanu hogi i de aamuli o Levi ni dangada sisi, ma dagi o de henua, aama daane hagaloosi.
14 De masavaa alaadeu ne hagassao mai ai denga sseene gu lava laa i de hhao gi lo te hale o Tagi Maolunga, gai tangada haimeedabu go Hilkiah gu gidee e ia de beebaa o de hainga a Tagi Maolunga ne gaavange laa gi Moses. 15 Gai Hilkiah ga hai ange gi tangada sisi go Shaphan, “Au gu gidee de beebaa o de hainga i lo te hale o Tagi Maolunga.” Gai ia ga gaavange de beebaa laa gi Shaphan.
16 Gai a Shaphan ne gaamai de beebaa laa ga gaavange gi de hodooligi, ma de tala ange gi de ia, ga hai ange, “Mee alodahi aau ne tala mai gi gimaadeu oo dangada hai hegau gu lava i de hai. 17 Gimaadeu gu kave sseene nogo i lo te hale o Tagi Maolunga laa ma gu gaavange gi denga daane e hagaseesee ina de hegau ma de gau hai hegau.” 18 Gai tangada sisi go Shaphan ne hai ange hogi gi de hodooligi, “Tangada haimeedabu go Hilkiah ne gaamai dahi beebaa gi de au.” Gai a Shaphan ga dau ange de beebaa laa gi de hodooligi.
19 De masavaa a de hodooligi ne langona ai muna o de hainga, gai ia ga ssae ono malo. 20 Gai de hodooligi ga tala ange gi Hilkiah, ma Ahikam tama daane a Shaphan, ma Abdon tama daane a Micah,*Abdon tama daane a Micah e hagaingoo ange hogi go Acbor tama daane a Micaiah. ma tangada sisi go Shaphan, aama taane hai hegau o de hodooligi go Asaiah, ga hai ange, 21 “Goodou suuia gimaadeu ma dangada e doe i Israel ma Judah, mage siilia ai i daho Tagi Maolunga, gi iloo dagodo mee gu sisi i lo te beebaa gu gidee nei. Tagi Maolunga gu kona mmao dono lili i gidaadeu, go hiidinga odaadeu dubuna madagidagi tee daohi ana muna; gilaadeu tee hai gi bei dagodo muna alodahi gu sisi i de beebaa nei.”
22 Gai Hilkiah ma denga daane a de hodooligi ne hai gi hulo, ne hulo gi pasa ange gi de pelaabisi go Huldah, de bodu o Shallum, tama daane a Tokhath, tama daane a Hasrah, go taane e doange ina denga malo o de temple. Gai de hine laa e noho i de lua vaaenga i Jerusalem.
23 Gai de hine laa ne hai ange gi gilaadeu, “E hagadaba Tagi Maolunga, de Maadua o Israel: Goodou hai ange gi taane ne haia naa goodou gi loomai gi ogu daha, 24 ‘E hagadaba Tagi Maolunga: Tilo, au e hai naa gi humai de hai ngadaa gi honga de mommee nei ma ono dangada — go denga hagamalaia alodahi gu sisi i lo te beebaa, ne dau laa i mada i mua o de hodooligi o Judah. 25 Gilaadeu gu tili au gai gu sigidaumaha ange mee maanongi gi denga diinonga, ga hagadaemaha ogu lodo i alaadeu hegau alodahi gu hai. Deenei ai, au e hai baasi ange gi de mommee nei i dogu lili, gai e dee maua donu i de haganoho.’ 26 Aagai goodou hai ange gi de hodooligi o Judah, ne haia naa goodou gi loomai gi siilia i daho Tagi Maolunga, ‘E hagadaba Tagi Maolunga, de Maadua o Israel, i dagodo o muna aau gu langona naa: 27 Go hiidinga koe ne dahuli oo lodo ga hagamaolalo i mada luu mada o de Maadua, i dau masavaa aau ne langona ai ana muna, e hai baasi ange ai gi de mommee nei ma ono dangada, ma hiidinga doo hagamaolalo i mada luoogu mada, ga ssae oo malo ma de dangi i ogu mada i mua — deenei ai, e hagadaba Tagi Maolunga: Au gu langona au muna. 28 Tilo, au e dugu adu naa goe gi magau bei dagodo oo dubuna madagidagi, ga danu i de masavaa o de nnoho paba. Koe e dee gidee naa denga mee hai ngadaa aagu e hai gi loomai gi de mommee nei ma dangada iai.’ ”
Gai denga daane laa ne aahe ga tala ange muna laa gi de hodooligi.
De hagahoou o de hagatoo donu hagaheloongoi
(2 Ki 23.1-20)
29 Gai de hodooligi ne aalu ga hagabuni mai denga daane maatua alodahi o Judah ma Jerusalem gi ono daha. 30 Gai ia ga hanage gi de hale o Tagi Maolunga, madali denga daane alodahi o Judah ma dangada alodahi o Jerusalem, ma de gau haimeedabu ma daane de aamuli o Levi, ma denga gauligi ma de gau maatua alodahi. Gai ia ga dau ange gi gilaadeu muna alodahi i lo te beebaa o de hagatoo donu hagaheloongoi, ne gidee mai laa i lo te hale o Tagi Maolunga. 31 Gai de hodooligi ne duu i dono duulanga ga hai ai dahi hagatoo donu hagaheloongoi i mada luu mada o Tagi Maolunga, bolo ia e daudali ange i Tagi Maolunga ma de daohi ana hainga, ma ana muna gu tala hagadonu ma gu hagasauaa, i ono lodo alodahi ma dono hagasaalunga alodahi, ma de hai gi bei muna o de hagatoo donu hagaheloongoi gu sisi laa i lo te beebaa laa.
32 Gai ia ne hai dangada alodahi i Jerusalem ma de vaaenga o Benjamin gi daohia de hagatoo donu hagaheloongoi laa. Gai dangada e nnoho i Jerusalem ne hai donu ga bei muna i lo te hagatoo donu hagaheloongoi a de Maadua, go de Maadua o olaadeu dubuna madagidagi.
33 Gai Josiah ne aau gee denga mee hakino gee alodahi mai i de henua o de gau Israel, ga hai dangada alodahi e nnoho i Israel gi daumaha ange gi Tagi Maolunga delaadeu Maadua. Gai taulooloa dono mouli gai dangada tee tili donu Tagi Maolunga, de Maadua o olaadeu dubuna madagidagi.