De Lua Beebaa o denga
Hodooligi
(2 Kings)
Hanu dagodo o de beebaa nei
De Lua Beebaa o denga Hodooligi e duudagi de tala taalanga o luu nohoanga hodooligi o de gau Israel, mai i de mommee o Tahi Beebaa o denga Hodooligi ne odi ai. De beebaa nei e maua i de vvae lua:
1. Taalanga o e lua nohoanga hodooligi mai i de madohi lua o ssiva centuryb.c. ga dae ai gi de hagadee kii o Samaria, ma de hagaodi o de nohoanga hodooligi i de bido gi ngaiho go Israel, i 722 b.c.
2. Taalanga o de nohoanga hodooligi o Judah, mai i de hagadee kii ina o de nohoanga hodooligi o Israel, ga dae ai gi de oha a Nebuchadnezzar, de hodooligi o Babylon Jerusalem, i 586 b.c.
De hagaodi o de beebaa nei e tala dagodo o Gedaliah, go taane a de gau Babylon ne hai laa gi goobenaa i Judah, aama dagodo o de hagasao mai o Jehoiachin, de hodooligi o Judah, i lo te hale pono i Babylon.
Mee hai ngadaa nei ne hai ange gi luu nohoanga hodooligi laa, i hiidinga tee hai hegau o denga hodooligi ma dangada o Israel ma Judah i de mee abodonu. De oha o Jerusalem ma de gaavee gee o dangada soa i de henua, go dahi hegau laumalie ne hai i daalanga o de gau Israel.
Dahi pelaabisi i de masavaa o De Lua Beebaa o denga Hodooligi go Elisha, taane ne suuia Elijah.
Dahi gubu hagamogomogo: “Aude madagu, go hiidinga de hagabuulinga madali gidaadeu e kii ange de soa i gilaadeu” (6.16).
Denga vaevaaenga
Luu nohoanga hodooligi (1.1—17.41)
a. De pelaabisi go Elisha (1.1—8.15)
b. Denga hodooligi o Judah ma Israel (8.16—17.4)
c. De hagadee kii ina o Samaria (17.5-41)
De nohoanga hodooligi o Judah (18.1—25.30)
a. Mai i Hezekiah ga dae ai gi Josiah (18.1—21.26)
b. De hodooligi o Josiah (22.1—23.30)
c. Denga hodooligi hagaodi o Judah (23.31—24.20)
d. De hagadee kii ina o Jerusalem (25.1-30)
1
Elijah ma de hodooligi go Ahaziah
1 Dua huu de magau o Ahab, gai Moab ga hai baasi ange gi Israel. 2 De masavaa laa gai Ahaziah ne doo iho laa magavaa denga laagau i de aabi e mua gi lunga i dono hale i Samaria ga magi ga dagodo ai; gai ia ne kave hanu dangada gi hulo gi siilia gi iloo i daho Baal-Zebub, tiinonga o Ekron, be ia e ieiangi mai naa i dono magi be deai.
3 Gai tangada de langi o Tagi Maolunga ga hai ange gi Elijah, taane Tishbe, “Hannoo hedae ange gi denga daane o de hodooligi o Samaria siilia ange, ‘E aha, gu deai laa donu se Maadua o Israel, gai goodou ga hulo ai laa e ssili hanu mee i daho Baal-Zebub, tiinonga o Ekron? 4 Deenei ai, e hagadaba Tagi Maolunga: koe e dee hidi age naa donu i de moenga oou e dagodo ai naa, aagai koe e magau naa donu!’ ” Gai Elijah ga hano ai loo.
5 Gai ga aahe huu denga daane laa gi daho de hodooligi, gai ia ga ssili ange gi gilaadeu, “Gu aha gu aahe mai ai naa goodou?”
6 Gilaadeu ne hai ange gi de ia, “Dahi daane ne hedae mai gi gimaadeu, ga hai mai, ‘Goodou aahe gi daho de hodooligi, ne haia naa goodou gi loomai, ga hai ange gi de ia, “E hagadaba Tagi Maolunga: E aha, gu deai laa donu se Maadua o Israel, gai koe ga hai ai naa hanu dangada gi hulo, gi siilia hanu mee i daho Baal-Zebub, tiinonga o Ekron? Deenei ai, koe e dee hidi age naa donu i de moenga oou e dagodo ai naa, aagai koe e magau donu!” ’ ”
7 Gai de hodooligi ne ssili ange gi gilaadeu, “E dagodo bee hee taane ne humai naa ga hedae adu ga tala adu muna naa gi goodou?”
8 Gilaadeu ne hai ange, “Ono malo e hai i huluhulu o denga manu, gai de beele e nnoa ai laa dono ungaalodo ni gili manu.” *Mat 3.4; Mark 1.6
Gai ia ga hai ange, “Taane naa go Elijah, taane Tishbe.”
9 Gai de hodooligi ne hai ange hogi dahi dagi o tinolima ma ono daane gi hulo gi daho Elijah. Gai tagi laa ne hanage gi daho Elijah, i de masavaa oona e noho ai i honga de mounga, ga hai ange gi de ia, “Taane o de Maadua, e hagadaba de hodooligi, ‘Ahe iho gi lalo!’ ”
10 Gai Elijah ga hai ange gi tagi o tinolima laa, “Noo au go taane o de Maadua, gai de ahi gi hano iho i de langi gi daia goe gi magau ma tinolima daane madali goe.” Gai de ahi ga hano iho i de langi ga daa gu magau tagi laa ma ono daane.*Luke 9.54
11 Aagai de hodooligi ne hai ange hogi gi hano dahi dagi o tinolima ma ono daane. Gai ia ne hano ga hai ange gi Elijah, “Taane o de Maadua, e hagadaba de hodooligi, ‘Hagamoolau ahe iho gi lalo!’ ”
12 Gai Elijah ne hai ange, “Noo au go taane o de Maadua, gai de ahi gi hano iho i de langi gi daia goe gi magau ma tinolima daane madali goe.” Gai de ahi a de Maadua gu hano iho i de langi ga daa gu magau tagi laa ma tinolima daane madali ia.
13 Aagai de hodooligi ga hai ange hogi dahi dagi o tinolima ma ono daane gi hulo i tolu hanonga. Gai togodolu dagi o tinolima ne hanage ga duuduli i mada i mua o Elijah, ga dangidangi ange, ga hai ange, “Taane o de Maadua, au e dangidangi adu, koe gi hagamogomogo ina dogu mouli, ma mouli o tinolima daane nei, gimaadeu nii dangada hai hegau niiou. 14 Tilo, de ahi gu hano iho i de langi ma gu daa ma gu maakau luu dagi o tinolima ange laa ma olaau daane. Aagai koe gi hagamogomogo ina dogu mouli!”
15 Gai tangada de langi o Tagi Maolunga ga hai ange gi Elijah, “Ahe iho gi lalo madali ia; aude madagu i de ia.” Gai Elijah ga hidi age ga ahe iho gi lalo madali tagi laa gi daho de hodooligi.
16 Gai ia ga hai ange gi de hodooligi, “E hagadaba Tagi Maolunga, ‘Koe ne hai hanu gi hulo gi siilia hanu mee i daho Baal-Zebub, tiinonga o Ekron. E aha, gu deai laa donu se Maadua o Israel e ssili ange aagena au muna? Deenei ai, koe e dee hidi age naa donu i de moenga oou e dagodo ai naa, aagai koe e magau naa donu!’ ” 17 Gai Ahaziah ne magau bei dagodo muna a Tagi Maolunga ne tala laa i daho Elijah.
Gai Joram, dono daina daane,*dono daina daane e dee sisi i hanu beebaa duai ange laa. ga sui ia ga hodooligi ai, i de lua ngadau o Jehoram, tama daane a Jehoshaphat ne hodooligi ai i Judah, i hiidinga Ahaziah teai donu sana dama daane. 18 Gai hegau a Ahaziah ange laa gu sisi i lodo beebaa e daohi ai laa hegau a denga hodooligi o Israel.