2 Gai dahi hanonga o de gau Syria ne hulo ai ga hebagi, gai gilaadeu ne kave dahi gauligi hahine mai i de henua o Israel, gai ia ne hai hegau ange gi de bodu o Naaman. 3 Gai de gauligi hahine laa ne hai ange gi dono hahine aamua, “Maingaa ange nei loo gi maua e dogu dangada aamua i de hano gi daho de pelaabisi i Samaria! Ia e maua i de hagaieiangi ono lebelaa.”

4 Gai Naaman ga hano gi daho dono dangada aamua, ga tala ange muna a de gauligi hahine mai i de henua go Israel ne tala ange laa. 5 Gai de hodooligi o Syria ga hai ange, “Hannoo, gai au ga sisi adu dahi leda e kave madali goe e gaavange gi de hodooligi o Israel.” Gai Naaman ne hano ga kave madali ia e madaangahulu talent*10 talente bei se 750 pauni. selevaa, ma e onomano shekel†6,000 shekele bei se 150 pauni. goolo ma e madaangahulu malo. 6 Gai ia ne kave hogi de leda laa ga gaavange gi de hodooligi o Israel, gai de leda laa e sisi ma e hai ange, “Au ne gaavadu de leda nei madali dogu dangada hai hegau go Naaman, gai koe ga hagaieiangi ai ono lebelaa.”

7 De masavaa a de hodooligi o Israel ne dau ai de leda laa, gai ia ga ssae ono malo, ga hai ange, “Go au go de Maadua? E maua e au i de daa gi maakau aabe go de hagamouli age tangada? Gai gu aha taane nei gu aalu mai ai nei au gi hagaieiangi ina ono lebelaa? Goodou gi iloo, ia e lodo e hai gi dee heloongoi omaau magavaa!”

8 Aagai de masavaa huu a Elisha, taane o de Maadua, ne langona ai bolo de hodooligi o Israel gu ssae ono malo, gai ia ga aalu ga hai ange gi de hodooligi, “Gu aha gu ssae ai naa oo malo? Haia taane naa gi humai gi ogu daha, gi iloo ai e ia bolo e dahi pelaabisi i Israel.” 9 Gai Naaman ne savini ga hano i denga hoosa ma denga hada ga hagannoho i ma te haitoga o de hale o Elisha. 10 Gai Elisha ne hai dahi dangada gi hano, gi hai ange gi de ia, “Hannoo sulu gi lo te vai o Jordan i e hidu hanonga, gai maanuga i doo angaanga e ieiangi naa, gai koe e gilimalali naa.”

11 Aagai Naaman ga hano gee i kilaa gu kona donu dono lili, ga hagadaba, “Tilo, au ne maanadu bolo ia e sao mai naa gi ogu daha, ga duu ga hagahi Iahweh dono Maadua, ma de daodaohi age luoono lima gi honga ogu maanuga ga hagaieiangi ai ogu lebelaa. 12 E aha, Abana ma Pharpar, luu saalingaa vai i Damascus, e dee danuaa ange laa i denga vai alodahi i Israel? Gai e aha, tee maua e au i de hano e gaugau i kilaa gi gilimalali ai au?” Gai ia ne huli ga hano gee mai i kilaa, ia gu lili mmao.

13 Aagai ono daane hai hegau ne loomai ga hai ange gi de ia, “Demaadeu damana, noo de pelaabisi ne hai adu koe gi hano gi haia dahi hegau hai ngadaa, gai koe ne hai donu ga bei. Gai ia tee hai adu laa donu huu, ‘Hannoo gaugau gi ieiangi ai goe’?” 14 Deelaa ai, Naaman ne hano ga sulu ma de ea age i lo te vai o Jordan i e hidu hanonga, bei de hai a taane o de Maadua gu tala ange laa. Gai dono angaanga gu ieiangi, gai gu gilimalali bei de angaanga o tamaa gauligi.

15 Gai ia ga ahe gi daho taane o de Maadua madali dangada alodahi ne loomai laa madali ia, ga duu i mada i mua o taane laa ga hai ange, “Tilo, au e iloo bolo e deai ange donu se Maadua abodonu i henua i lalo, go Israel donu huu. Aude haihaia gaavee denga mee ngadi gaavange nei mai i daho doo dangada hai hegau.”

16 Aagai Elisha ne hai ange, “Au e hagatoo donu i de mouli o Tagi Maolunga, de ia oogu e hai hegau ange nei aagena, bolo au e dee kave donu dahi mee ngadi gaavange daudahi naa.” Gai Naaman ne hagammahi ange ia gi gaavee mee laa, aagai ia tee kave.

17 Gai Naaman ga hai ange, “Noo koe e dee kave, gai au e dangidangi adu koe gi dugua mai au gi hagauda ina hanu gelegele mai i kinei i honga e lua donkey e hagaahe gi dogu henua madali au, go hiidinga au e dee ahe ange naa donu e hai dahi sigidaumaha dudu, aabe go de sigidaumaha ange gi dahi maadua gee, go Tagi Maolunga donu huu. 18 Gai Tagi Maolunga gi degi mai gi de au i de mee nei: de masavaa naa huu o de hodooligi e ulu ai i de hale daumaha o Rimmon e daumaha ai i kilaa, gai go au e dagina ia, gai au e ino naa hogi madali ia — de masavaa naa huu oogu e ino ai gi lalo i lo te hale daumaha o Rimmon, gai Tagi Maolunga gi degi mai gi de au i de mee nei.”

19 Elisha ne hai ange gi de ia, “Hannoo i de baba.”

Aagai de masavaa o Naaman ne hano gee ai, gai tigi kona ai loo dono mmao gee, 20 gai Gehazi, tangada hai hegau o Elisha, taane o de Maadua, ne hagadaba i ono lodo, “Tilo, dogu dangada aamua ne dugu Naaman, taane Syria gi hano; ia tee kave goloa aana ne gaamai. Au e hagatoo donu i de mouli o Tagi Maolunga, bolo au e savini naa e hano e kave hanu goloa laa mai i ono daha.”

21 Gai Gehazi ne hano ga doolohi Naaman. De masavaa a Naaman ne gidee ai dahi dangada e savini mai gi ono daha, gai ia ga iho mai i honga dono hada ga hedae ange gi de ia, ga ssili ange, “E danuaa naa huu mee alodahi?”

22 Gehazi ga hai ange, “Mee alodahi e odi i tanuaa! Gai dogu dangada aamua ne hai au gi humai gi hai adu, ‘E dogolua daane de hagabuulinga o denga pelaabisi gu loomai i de mommee iai mounga o Ephraim gi ono daha. Aude haihaia, gaamai e lua talent‡dahi talente bei se 75 pauni. selevaa ma e lua malo danuaa moolaau.’ ”

23 Gai Naaman ga hai ange, “E danuaa, gaavee donu e lua talent.” Gai ia ne hagammahi ange hogi Gehazi ma de hhao ange e lua talent selevaa laa gi lodo e lua beagi madali e lua malo ga gaavange gi de ia. Gai Naaman ne gaavange mee laa gi e dogolua ono dangada hai hegau gi sabaia gi hulo ai i mada i mua o Gehazi. 24 Gai de masavaa huu olaadeu ne tae ai gi de mommee iai mounga, gai Gehazi ga kave mee laa mai i daho luu daane laa ga hhao gi lo te hale. Gai ia ga hai luu daane laa gi aahe. 25 Gai ia ga hano ga ulu gi lo te hale, ga duu i mada i mua o dono dangada aamua.

Gai Elisha ga ssili ange gi de ia, “Gehazi, go hee oou ne humai ai naa?”

Gai ia ga hai ange, “Au tigi hano donu gi dahi mommee.”

26 Aagai Elisha ne hai ange gi de ia, “Dogu hagasaalunga ne hano madali goe, i de masavaa o taane laa ne iho mai ai i honga dono hada ga hedae adu gi de goe. E aha, deenei de masavaa e kave ai sseene, ma malo, ma veelengaa olive ma veelengaa grape, ma ssiibi, ma kaau aama daane ma haahine hai hegau? 27 Deenei ai, magi lebelaa o Naaman e llele adu donu gi goodou ma doo aamuli ga hano ai.” Gai Gehazi ne sao ga hano gee mai i daho Elisha, ia gu magi lebelaa, gai ia gu tea hogi bei dagodo o denga snow.