Tangada Agoago
(Ecclesiastes)
Hanu dagodo o de beebaa nei
E dee iloo danuaa be goai ne siia de beebaa nei. Gai de mada e 1.1 e tala bolo “Ni muna nii Tangada Agoago, go tama daane a David, de hodooligi o Jerusalem,” gai teai se ingoo o tangada ne siia. Hanu e tala bolo go Solomon ne siia de beebaa nei i daha de ngadau e 935 b.c., i de hagaodi o dono mouli. De beebaa go Ecclesiastes e sisi ai maanadu a dahi “Dangada Agoago,” ia se daane e kona dana maanadu dagodo de bodobodo ma de hai ngadaa o de mouli nei, gai e dee heohi ma de hagadee paba mee e hai ai. Ia e donu ange bolo “Mee alodahi e deai donu haigamaiana” (1.2). Ia tee donu ange gi de hai a de Maadua, ne hagatau ai mouli o dangada. Aagai ia ne agoago ange dangada, gilaadeu gi hagammahi gi hai hegau, ma de malangilangi i mee a de Maadua gu ngadi gaavange gi gilaadeu, i taulooloa olaadeu mouli.
Maanadu lagolago a taane agoago nei e dee hagamalangilangi, gai e hagadaemaha. Aagai de beebaa nei ne dau madali beebaa o de Beebaa Dabu, e hagaago mai ai bolo de gai e haigamaiana ange gi maanadu ma lodo lagolago o de mouli nei. E soa dangada gu maamaane olaadeu lodo, i delaadeu gidee ada o olaadeu mouli i lo te beebaa go Ecclesiastes. Gai de Beebaa Dabu e hai gi dahi tali hagalodolodo a tangada ange gi de Maadua, go de ia e haia gi hanu haigamaiana o de mouli o tangada.
Dahi gubu hagamogomogo: “Gidaadeu gu langona mee alodahi; gai aanei muna hagaodi: koe gi madagu i de Maadua ma de daohi ana hainga; deenei donu de hegau laumalie a tangada e hai” (12.13).
Denga vaevaaenga
E hanu haigamaiana o de mouli? (1.1—2.26)
Hanu muna i dagodo o de mouli (3.1—11.8)
Agoago hagaodi (11.9—12.8)
Muna hagaodi (12.9-14)
1
Mee alodahi e deai donu haigamaiana
1 Muna a Tangada Agoago,*Tangada Agoago, aabe go tangada e dagina i de hagabuni o dangada. go tama daane a David, de hodooligi o Jerusalem.
2 E hagadaba Tangada Agoago,
“E deai haigamaiana! E deai haigamaiana!
Mee alodahi e deai donu haigamaiana.”
3 Ni aha a tangada e mau i hegau alodahi
aana e hagaduu ngae ma e hai i lalo de laa?
4 Dahi atangada e humai, gai dahi atangada gu hano,
aagai henua i lalo e dagodo ga hano ai.
5 De laa e sobo age ga lava ga danu,
gai e hagamoolau ga ahe gi dono mommee ne sobo age ai.
6 De madangi e ssau ga hano gi ngaage,
ga lava ga dahuli ga hano gi ngaiho;
gai de madangi e dahulihuli saele,
ga lava ga ahe ange i dono haiava mau.
7 Denga saalingaa vai alodahi e ssali ga hulo gi tai,
aagai tai e dee maua donu gi honu.
De mommee o denga saalingaa vai e loomai laa,
gai go kilaa hogi olaadeu e aahe ga hulo aagena.
8 Mee alodahi e kona donu de hagadaalea,
e hai ngadaa i de tala ono dagodo.
Luu ganomada e dee maua gi lava alaau mee e tilo,
luu dalinga e dee maua hogi gi lava alaau mee e hagallongo.
9 Mee alodahi e duudagi naa donu huu bei de hai ne daamada ai,
mee gu lava i de hai e aahe ange naa ga hai;
e deai donu mee hoou i lalo de laa.
10 E aha, e dahi laa mee a tangada e maua i de tala ga hagataba,
“Galo ange diiloo! De mee nei se mee hoou”?
De mee laa gu dagodo mai huu madagidagi;
gai gu dagodo huu i mua taadeu masavaa.
11 Gai dangada e dee manadua donu mee gu hai madagidagi,
gai dangada e loomai i muli mai e dee manadua naa hogi
e dangada e loomai i olaadeu dua.
De heiangi e deai ono haigamaiana
12 Au, Tangada Agoago, nogo noho i Jerusalem ma e hodooligi ai i Israel. 13 Au ne hagaduu ngae e ssala, gi donu ange au gi mee alodahi gu hai i lalo de langi. Gai se hegau hai ngadaa a de Maadua gu gaavange gi dangada gi haia. 14 Au gu gidee mee alodahi gu hai i lalo de laa; tilo, mee alodahi e deai donu olaadeu haigamaiana, gai e bei de ngadi doolohi a tangada de madangi.
15 De mee gu bigo laa e dee maua i de hagasoe,
gai e dee maua i de dau mee e deai.
16 Au ne hagadaba i ogu lodo, “Tilo, au gu heiangi ange i gilaadeu ne dagi i Jerusalem i ogu mua; gai gu laumalie dogu heiangi ma dogu iloo mee.” *1 Ki 4.29-31 17 Gai au ne hai gi donu ange au gi dagodo o de heiangi ma de senga aama de lodo senga; aagai au gu iloo hogi, bolo de mee nei e bei de ngadi doolohi a dahi de madangi.
18 Gai de heiangi laumalie e hai hogi ga kona de manavasaa lodo o tangada;
gai de iloo mee laumalie e hai ga kii ange de daemaha ono lodo.