De Lua Beebaa a Moses go
Exodus
Hanu dagodo o de beebaa nei
Exodus e bei go “de hulo gee.” Deenei de mee hagamogomogo hugadoo i taalanga o de gau Israel, e tala i lo te beebaa nei — go de hulo gee o de gau Israel mai i Egypt, deenei de henua olaadeu nogo hai hegau hagaduasala ai. Taane ne siia de beebaa nei go Moses, i daha de 1450-1410 b.c. E haa vaevaaenga nnui i lo te beebaa nei:
1. De ola mai o de gau Israel i de hai hegau hagaduasala.
2. De hulo ga tae gi de mounga go Sinai.
3. De hagatoo donu hagaheloongoi a de Maadua ange gi ono dangada i Sinai; ma hainga ne gaavange e dagi ai delaadeu hai e dahulinga, ma hainga ange gi dangada, aama hainga ange gi delaadeu hai e daumaha ai.
4. De hagaduu age o de mommee daumaha o de gau Israel ma goloa e hhao ai, ma hainga ange gi de gau haimeedabu, aama ange gi de daumaha ange gi de Maadua.
De mee laumalie e tala i de beebaa nei, go dagodo hegau a de Maadua ne hai, i dana hagaola ono dangada nogo hai hegau hagaduasala ina laa, ga hai gilaadeu gi se huaahenua e dahi alaadeu tali.
Taane e tala ono dagodo i de beebaa nei go Moses, deenei taane a de Maadua ne hili gi dagina de gau Israel, gi gaavee gee mai i Egypt. De mee a dangada soa e iloo i lo te beebaa nei, go de Madaangahulu Hainga i de mada e 20.
Dahi gubu hagamogomogo: “Gai Tagi Maolunga ga hai ange gi de ia, ‘Au gu gidee donu de duasala o ogu dangada i Egypt, au gu langona hogi delaadeu tangi i hiidinga de hai a olaadeu dagi e hagaduasala ai gilaadeu; au gu iloo donu dagodo o delaadeu duasala’ ” (3.7).
Denga vaevaaenga
De hagaola o de gau Israel mai i Egypt (1.1—15.21)
a. De hai hegau hagaduasala i Egypt (1.1-22)
b. De haanau o Moses ma taamada o dono mouli (2.1—4.31)
c. Moses ma Aaron i mada i mua o de hodooligi o Egypt (5.1—11.10)
d. Taonga Hagasili ma de hulo gee mai i Egypt (12.1—15.21)
Tai Mmea ga hano ai gi de mounga go Sinai (15.22—18.27)
De hainga ma de hagatoo donu hagaheloongoi (19.1—24.18)
De tabernacle ma hainga o de hai e daumaha ai (25.1—40.38)
1
De vaivai haia o de gau Israel
1 Aanei ingoo o dama a Israel ma olaadeu huaabodu ne hulo madali Jacob gi Egypt: 2 go Reuben, ma Simeon, ma Levi, ma Judah, 3 ma Issachar, ma Zebulun, ma Benjamin, 4 ma Dan, ma Naphtali, ma Gad aama Asher. 5 Gai dangada alodahi i de huaabodu o Jacob i de masavaa laa se dinohidu, gai Joseph gu hano huu i mua ma gu noho i Egypt.
6 Muli mai gai Joseph ma ono daina daane aama de atangada laa alodahi gu odi i de maakau. 7 Aagai de aamuli o Israel gu hagadili ga soa mmao; gilaadeu gu hagadaga ange donu de soa ma de mmahi, gai gu soa donu gilaadeu e nnoho i honga de henua alodahi.*Acts 7.17
8 Gai gu dae ange dahi hodooligi hoou ga dagi Egypt, gai ia e dee iloo Joseph.*Acts 7.18 9 Gai ia ga hai ange gi ono dangada, “De gau Israel gu kii ange donu de soa aama de mmahi ange i gidaadeu. 10 Gidaadeu ga hai gi dee maua e gilaadeu i de hagadili gi soa, gilaadeu kana hagabuni ange gi odaadeu hagadaumee i de masavaa o de hebagi, ga hebagi mai ai gi gidaadeu ma de hulo gee mai i de henua.” *Acts 7.19
11 Deelaa ai, de gau Egypt ne hili hanu dagi gi hagaduasala ina de gau Israel i denga hegau hai ngadaa, ga hai gilaadeu gi hagatuulia luu aduhale e doange ai goloa o Pharaoh, go Pithom ma Raamses. 12 Aagai ga kii ange huu de vaivai hai a de gau Egypt gilaadeu, gai de gau Israel gu kii ange hogi de hagadili ga soa i honga de henua laa. Gai de gau Egypt gu maatagu i gilaadeu, 13 ga hai de gau Israel gi hai hegau kona, 14 ma de hai gilaadeu gi kona iho i de hilo denga bela pigi ga hai ai denga duudangaa hadu, aama de hagahai hegau gilaadeu i lodo veelenga; de gau Egypt ne hai gi kona hegau a de gau Israel e hai.
15 Gai de hodooligi o Egypt ga hai ange gi luu haahine hagahaanau o de gau Hebrew, go Shiphrah ma Pua, 16 “De masavaa naa huu ooluu e hagahaanau ai denga haahine Hebrew, gai gooluu dagidiiloo de masavaa olaadeu e nnoho ai e haanau i honga de mommee haanau. Gai noo se gauligi daane, gai gooluu daia gi magau, gai noo se gauligi hahine, gai gooluu dugua gi mouli.” 17 Gai luu haahine hagahaanau laa ne maatagu i de Maadua. Deelaa ai, gilaau tee daudali i muna a de hodooligi, aagai ne hagaola hogi denga gauligi daane. 18 Gai de hodooligi o Egypt ga aalu luu haahine laa ga ssili ange gi gilaau, “Se hegau bee hee ooluu gu hai naa? Gai gu aha gooluu gu hagaola ai laa hogi denga gauligi daane?”
19 Gai luu haahine laa ga hai ange gi Pharaoh, “Go hiidinga denga haahine Hebrew e dee bei dagodo o denga haahine Egypt, gilaadeu e mmahi, gai gilaadeu e haanau i mua demaau tae adu gi olaadeu daha.”
20 Deelaa ai, de Maadua ne hagamanuuia luu haahine hagahaanau laa, gai de gau Israel gu kii ange donu de soa aama de mmahi. 21 Go hiidinga luu haahine hagahaanau laa ne maatagu i de Maadua, gai ia ga abodonu ange gi gilaau, ga hai gi hanu dama i lodo olaau huaabodu.
22 Gai Pharaoh ga hagailoo ange gi dangada alodahi, ga hai ange, “Goodou diiloo mage gaavee denga gauligi daane alodahi e haanau i daho de gau Hebrew, mage dilia ange gi lo te saalingaa vai go Nile, gai hagaola ina alaadeu gauligi haahine.” *Acts 7.19