6
1 Gai Tagi Maolunga ga hai ange gi Moses, “Ailaa nei, gai koe e gidee naa dagu hai e hai ai Pharaoh; go hiidinga dogu lima mmahi e hai naa ia gi haia de gau Israel gi hulo, gai ia e hagammahi naa ga alualu gilaadeu gi hulo gee mai i de henua.”
2 Gai de Maadua ga hai ange hogi gi Moses, “Go au donu go Iahweh;*Gen 17.1; 28.3; 35.11; Exo 3.13-15 3 au ne hakide ange gi Abraham, ma Isaac aama Jacob, go de Maadua Mmahi Mmao laa, aagai au tee hagaago ange gi iloo e gilaadeu dogu ingoo go Iahweh. 4 Gai au ne hagamakaga dagu hagatoo donu hagaheloongoi ange gi gilaadeu, bolo au e gaavange gi gilaadeu de henua go Canaan, de henua olaadeu ne nnoho gaainga ai laa bei dagodo o de gau henua gee. 5 Gai au gu langona hogi de tangi o de gau Israel, i hiidinga delaadeu hagahai hegau ina i lalo o de gau Egypt; gai au gu manadua dagu hagatoo donu hagaheloongoi.
6 Deenei ai, daalaa ange gi de gau Israel, hai ange, ‘Go au donu go Iahweh, au e kave gee naa goodou mai i mee hagadaemaha a de gau Egypt e hai ange naa gi goodou, ma de hagaola gilaadeu mai i mee oodou hagaduasala ina ai. Gai au e hagaola naa goodou i dogu lima sauaa ma de hai denga hegau hagalele mouli e hagaduasala ai de gau Egypt. 7 Gai au ga hai naa goodou go ogu dangada, gai au go doodou Maadua, gi iloo ai e goodou bolo go au donu go Iahweh doodou Maadua, go au ne gaavee gee goodou mai i mee a de gau Egypt e hagadaemaha ai goodou. 8 Gai au ga kave ai goodou gi de henua aagu gu hagatoo donu ange gi Abraham, ma Isaac, aama Jacob, ga gaavadu e henua ai goodou. Go au donu go Iahweh.’ ”
9 Aanei muna a Moses ne tala ange gi de gau Israel, aagai gilaadeu tee llodo e hagallongo ana muna, go hiidinga gilaadeu gu mmade ange olaadeu aalanga i de kona delaadeu vaivai haia.
10 Gai Tagi Maolunga ga hai ange gi Moses, 11 “Hannoo hai ange gi Pharaoh, de hodooligi o Egypt, ia gi dugua de gau Israel gi hulo gee mai i dono henua.”
12 Aagai Moses ga hai ange gi Tagi Maolunga, “De gau Israel e dee hagallongo mai gi de au, gai dee hee naa de hai o Pharaoh e maua ai i de hagallongo agu muna? Au se dangada donu e dee maua i de basa gi danuaa i honga o dangada.” 13 Gai Tagi Maolunga ga basa ange gi Moses ma Aaron, ga tala ange gi gilaau alaau muna e tala ange gi de gau Israel aama Pharaoh, de hodooligi o Egypt, gai gilaau ga dagi ai dangada Israel ga kave gee mai i de henua go Egypt.
Maadua o Moses ma Aaron
14 Gai aanei dagi o denga aamuli o olaadeu dubuna:
Dama a Reuben, tama madua a Israel: go Hanok, ma Pallu, ma Hezron, aama Carmi. Aanei denga huaabodu o de aamuli o Reuben.
15 Dama a Simeon: go Jemuel, ma Jamin, ma Ohad, ma Jakin, go Zohar, aama Shaul, tama daane a Simeon ange gi dahi hahine Canaan. Aanei denga huaabodu o de aamuli o Simeon.
16 Gai aanei ingoo o dama a Levi ma olaadeu atangada: go Gershon, ma Kohath, aama Merari. Gai ngadau o Levi ne mouli ai se 137.*Num 3.17-20; 26.57-58; 1 Ch 6.16-19
17 Dama a Gershon: go Libni ma Shimei, ma olaau huaabodu.
18 Dama a Kohath: go Amram, ma Izhar, ma Hebron aama Uzziel. Gai ngadau o Kohath ne mouli ai se 133.
19 Dama a Merari: go Mahli ma Mushi. Aanei denga hagadiilinga o de aamuli o Levi ma olaadeu atangada.
20 Gai Amram ne hai bodu ange gi taina hahine o dono damana go Jochebed, gai ia ga haanau Aaron ma Moses. Gai ngadau o Amram ne mouli ai se 137.
21 Dama a Izhar: go Korah, ma Nepheg, aama Zicri.
22 Dama a Uzziel: go Mishael, ma Elzaphan, aama Sithri.
23 Gai Aaron ne hai bodu ange gi Elisheba, tamaa hine a Amminadab, gai se daina hahine niio Nahshon, gai ia ne haanau Nadab, ma Abihu, ma Eleazar aama Ithamar.
24 Dama a Korah: go Assir, ma Elkanah aama Abiasaph. Aanei denga huaabodu o de aamuli o Korah.
25 Gai Eleazar tama daane a Aaron ne hai bodu ange gi dahi damaa hine a Putiel; gai tamaa hine laa ne haanau Phinehas.
Aanei dagi o de aamuli o Levi ma olaadeu hagadiilinga.
26 Aanei Moses ma Aaron a Tagi Maolunga ne hai ange laa, “Gooluu dagina huaadangada o Israel i denga hagabuulinga hebagi mage gaavee gee mai i de henua go Egypt.” 27 Gai go gilaau ne hai ange laa gi Pharaoh, de hodooligi o Egypt, ga kave gee nei de gau Israel mai i Egypt, go Moses ma Aaron.
Aaron e sui Moses e basa ai
28 De laangi o Tagi Maolunga ne basa ange ai gi Moses i Egypt, 29 gai ia ne hai ange, “Go au donu go Iahweh! Gai koe daalaa ange gi Pharaoh, de hodooligi o Egypt agu muna alodahi e tala adu gi de goe.”
30 Aagai Moses ne hai ange gi Tagi Maolunga, “Tilo, au se dangada e dee maua i de basa i honga o dangada; gai dee hee naa de hai o Pharaoh e maua ai gi hagallongo mai gi agu muna?”