15
Taahili a Moses ma de gau Israel
1 Gai Moses ma de gau Israel alodahi ne daahili ange gi Tagi Maolunga i taahili nei, ga hai ange,*Rev 15.3
“Au e daahili ange gi Tagi Maolunga
i hiidinga ia gu kii i de hebagi.
Ia gu maga ange denga hoosa ma dangada e savini ai gi lo te vai.
2 Go Tagi Maolunga ogu mahi ma dagu daahili,
gai go ia dogu Ia Hagaola.*Psa 118.14; Isa 12.2
Go ia dogu Maadua, gai au e tuhi naa donu ia;
ia go de Maadua o dogu damana, gai au e daahili e tuhi ia.
3 Tagi Maolunga se daane dau i de hebagi,
gai dono ingoo go Iahweh.
4 Ia gu maga ange hada hebagi o Pharaoh
ma dono hagabuulinga hebagi gi lo te vai.
Denga daane dau o Pharaoh gu maalemo i lo te Dai Mmea.*Muna Hebrew go Yam shuf; e bei go Tai o denga Aalege (diiloo hogi de gubu e 22).
5 De vai gelo gu haoli gilaadeu;
gilaadeu gu aabulu gi tagelo bei de hadu.
6 Tagi Maolunga, doo lima madau e mmahi mmao;
Tagi Maolunga, doo lima madau gu hagabalaginagina de hagadaumee.
7 Doo mahamaha laumalie gu hagadee kii
gilaadeu e hai baasi adu gi de goe;
koe gu haula gilaadeu i doo bole
bei dagodo o denga lau grain mmasa.
8 Koe ne busi i luoo bongaa usu
gai denga vai gu hagabudubudu age.
Denga vai ne tuu gi lunga bei dagodo o de bae hadu,
gai vai i lo te vai gelo laa gu makaga.
9 De hagadaumee ne hagadaba,
‘Au e doolohi naa ga daea adu gilaadeu,
au e dae naa ogu lodo i de duha olaadeu goloa.
Au e dada naa dagu gadilaasa
ga daa ai gilaadeu gi maakau.’
10 Koe ne busi i de madangi o dau manava,
gai denga vai gu haoli gilaadeu;
gilaadeu ne aabulu i lodo beau nnui
bei dagodo o denga soodo daemaha.
11 Tagi Maolunga, goai e bei oo dagodo i magavaa o denga diinonga?
Goai e bei oo dagodo i de mahamaha gai e dabu?
Au hegau e hagamaatagu, gai au sauaa e hagalele mouli!
12 Koe ne haalo doo lima madau,
gai de gelegele ga holo gilaadeu.
13 Koe gu dagi de huaadangada aau gu hagaola i doo abodonu.
Koe gu dagi gilaadeu i doo sauaa mmahi
gi de mommee dabu oou e noho ai.
14 Denga huaadangada e maatagu naa i delaadeu langona mee nei;
dangada o Philistia gu kona de manavasaa olaadeu lodo.
15 Denga dagi o Edom e puni ange naa olaadeu lodo,
denga daane mmahi o Moab gu bolebole i delaadeu maatagu,
dangada alodahi i Canaan e llilo naa;
16 gilaadeu e maatagu naa ma de manavasaa mmao.
Tagi Maolunga, doo sauaa mmahi gu hai gilaadeu
ma gu dee vaa ngaalue bei dagodo o de hadu,
ga dae ai gi de odi doo huaadangada i de hulo ga ui,
ga dae ai gi de ui dangada aau ne hagaola.
17 Koe e kave naa gilaadeu ga hagannoho i honga doo mounga donu;
Tagi Maolunga, deenei de mommee gu hai ai doo mommee noho;
de Ia Aamua, deenei de hale dabu aau gu hagaduu.
18 Tagi Maolunga e dagi naa donu
ga hano ai e dee ngado mai.”
19 De masavaa o denga hoosa a Pharaoh ma hada hebagi aama denga daane e saavini ai ne loiho gi lo te vai, gai Tagi Maolunga ga hagaahe mai denga vai ga haoli ai gilaadeu. Gai de gau Israel ne seesee ga hulo i honga de gelegele mmasa i lo te ungaalodo o de vai. 20 Gai de pelaabisi go Miriam, taina hahine o Aaron, ne dagidagi dana tambourine i lo tono lima; gai denga haahine alodahi ga daudali ange i de ia ma alaadeu tambourine, gai gilaadeu ga hagadangidangi ma de aanu. 21 Gai Miriam ne daahili ga hagadaba:
“Daahili ange gi Tagi Maolunga,
go hiidinga ia gu kii i de hebagi.
Ia gu maga ange denga hoosa ma dangada e savini ai gi lo te vai.”
Vai mmala
22 Dua mee laa, gai Moses ga dagi de gau Israel mai i Tai Mmea ga hulo ai gi de vao go Shur; gai gilaadeu ne seesee i de vao laa e dolu laangi, gai teai alaadeu vai ne gide e unu ai. 23 Gai de masavaa huu olaadeu ne tae ai gi Marah,†Marah i muna Hebrew e bei e mmala. gai gilaadeu tee maua i de unu vai i Marah, go hiidinga e mmala vai iai; deelaa ai, de mommee laa gu hagaingoo ange go Marah. 24 Gai dangada ga nnanu i Moses, ga ssili ange, “Ni aha naa donu amaadeu e unu?”
25 Gai Moses ne dalodalo ange gi Tagi Maolunga, gai Tagi Maolunga ga hagaago ange gi de ia dahi bido laagau. Gai ia ga maga ange de laagau laa gi lo te vai, gai vai laa gu danuaa i de unu.
Gai Tagi Maolunga ne gaavange gi gilaadeu mee gu hagasauaa ma de hainga i kilaa, gai ia ga hagatale dagodo o olaadeu lodo. 26 Ia ne hai ange, “Noo goodou e kana ange e hagallongo muna a Tagi Maolunga doodou Maadua, ma de hai hegau i de mee heohi i mada luoono mada, noo goodou hagallongo ange gi ana hainga ma de daudali i ana hainga gu hagasauaa alodahi, gai au e dee gaamai naa gi goodou denga hagadaagangaa magi aagu ne gaavange laa gi de gau Egypt, i hiidinga go au donu go Iahweh e hagaieiangi ina goodou.”
27 Gai gilaadeu ga hulo gu tae gi Elim, go de mommee iai laa e madaangahulu ma lua vai geli ma e madahidu palm. Gai gilaadeu ga hagatuu olaadeu hale gaainga i gaogao de vai i kilaa.