25
Sigidaumaha ange gi de hale malo
(Exo 35.4-9)
1 Gai Tagi Maolunga ne basa ange gi Moses, ga hai ange, 2 “Daalaa ange gi de gau Israel gilaadeu gi daohia age hanu mee e hai ai ssigidaumaha mai gi de au. Gai koe ga kave mee alodahi a dangada e malangilangi i de daohi age. 3 Gai aanei denga hagadaagangaa goloa alaadeu e daohi age e gaavadu gi de goe, go goolo, ma selevaa, ma bronze, 4 ma huga malo buluu, ma de purple, ma de mmea, ma linen danuaa, ma huluhulu guudi, 5 ma gili ssiibi gu tao ma gu mmea, ma gili kaau lausedi,*kaau lausedi, aabe ni dolphin. Hanu e maanadu bolo ni guudi. ma laagau acacia, 6 ma lolo olive e haula ai laama, ma mee hagamanongi e hai ai de lolo hagasulu aama ssigidaumaha o mee maanongi, 7 ma hadu hagamogomogo go de onyx, ma hadu hagamogomogo ange laa e hagabigibigi ange gi de ephod, ma de mee dau i hadahada.
8 Gai gilaadeu gi hagaduulia dahi hale dabu†De hale dabu nei se hale malo. moogu, e noho ai au i olaadeu daha. 9 Gai haia de tabernacle nei ma ono goloa alodahi gi bei de hagatau aagu gu hagaago adu gi de goe.
De ngavesi o de hagatoo donu hagaheloongoi
(Exo 37.1-9)
10 “Haia gilaadeu gi hagaduulia dahi ngavesi i laagau acacia — e lua sugilima ma de bido de looloa, e dahi ma de baasi sugilima de lahalaha, gai e dahi ma de baasi sugilima tuuduu. 11 Gai koe haolia tua ma lodo i goolo danuaa, ga hagadagodo dahi dolodolo goolo ga holiage ai. 12 Gai koe ga hagadaakodo e haa buulei goolo ga hagabigibigi ange gi denga vae e haa, e lua buulei i dahi baasi gai e lua buulei i de baasi ange laa. 13 Gai koe ga hai e lua dogo acacia ga haoli i goolo, 14 ga velo ange gi lodo buulei i luu baasi de ngavesi e saabai ai. 15 Gai luu dogo naa e dugu donu huu i lodo buulei o de ngavesi nei, e dee aau mai donu. 16 Gai koe ga hhao ange gi lo te ngavesi naa de mee Tala Hagadonu aagu e gaavadu gi de goe.
17 Gai haia hogi de pono o de tala haisala i goolo danuaa. Haia gi lua ma de bido sugilima de looloa, gai e dahi ma de baasi sugilima de lahalaha.*Heb 9.5 18 Gai koe dugidugi hanu goolo i de haamaa haia ai e lua cherubim i luu bido o de pono o de tala haisala. 19 Haia dahi cherub i dahi bido gai dahi i de bido ange laa; gai haia luu cherubim i luu bido laa gi buni donu huu ma de pono. 20 Gai luu cherubim laa gi hagadau huuhuli ange, gai olaau bakau e doha i honga de pono o de tala haisala. Gai olaau mada gi huuhuli iho gi honga de pono. 21 Gai koe ga dugu ange de pono laa gi honga de ngavesi, ga hhao ange de tala hagadonu aagu e gaavadu gi de goe. 22 Go kilaa, go honga e pono i magavaa luu cherubim i honga de ngavesi o de tala hagadonu, oogu e hedae adu ai gi de goe, gai au ga tala adu ai gi de goe agu muna alodahi ange gi de gau Israel.
Teebele o pelaoaa dabu
(Exo 37.10-16)
23 “Gai koe ga hai hogi dahi deebele i laagau acacia. Haia gi lua sugilima de looloa, e dahi sugilima de lahalaha, gai e dahi ma de baasi sugilima tuuduu. 24 Gai koe ga haoli teebele i goolo danuaa ga hagadagodo dahi dolodolo goolo ga holiage ai luu baasi. 25 Gai haia tolodolo i luu baasi gi dolu inisi‡3 inisi: de Beebaa Hebrew e hai ange bolo go de lahalaha o lo te lima. de lahalaha, gai haolia tolodolo laa i goolo. 26 Gai koe ga hai e haa buulei goolo ga hagabigibigi ange gi denga dege e haa i honga vae e haa o teebele. 27 Gai denga buulei nei e hai gi paa ange gi de hiihii e velo ange aagena denga dogo e saabai ai laa teebele. 28 Gai koe ga hai e lua dogo i laagau acacia ga haoli i goolo, e saabai ai teebele. 29 Gai haia ono beleidi ma ono gumedi, ma ono ubu, aama boolo e llingia ai denga sigidaumaha o mee unu i goolo danuaa. 30 Gai dugua pelaoaa i Mada Luoono Mada i honga teebele laa i mada luoogu mada i masavaa alodahi.*Lev 24.5-8
De mee dugu laama
(Exo 37.17-24)
31 “Gai koe haia dahi mee dugu laama i goolo danuaa. Haia de haamaa dugidugia ai mee e hai ai de mee dugu laama. Dono dahido, ma de angaanga, ma ono ubu, ma ono gau, ma ono huaala e hai gi buni ma de angaanga. 32 Gai haia e ono laa gi tuu mai i luu baasi de angaanga; e dolu laa i dahi baasi, gai e dolu laa i de baasi ange laa. 33 Gai e dolu hogi ubu bei huaala o de almond, madali denga gau ma huaala i dahi laa, gai e dolu hogi ubu i de baasi ange laa. Denga laa e ono e tuu mai laa i luu baasi de mee dugu laama e hai gi dagodo daudahi. 34 Gai honga de mee dugu laama e haa ubu bei huaala o de almond iai madali olaadeu gau ma huaala. 35 Haia e dagidahi gau i daahido o denga laa o de mee dugu laama; e dahi gau i lalo luu laa e mmua gi lunga, e dahi i lalo luu laa i lo te ungaalodo, gai e dahi i lalo luu laa e mmua gi lalo — e ono alodahi laa o de mee dugu laama. 36 Gai denga gau ma denga laa e hai gi buni ma de angaanga, gai de laama alodahi e hai goolo danuaa ne tugi i de haamaa.
37 Gai koe ga hai e hidu laama moo de mee dugu laama ga dugu age gi ulu ono laa, e hagamaalama ai de mommee i ono mada i mua. 38 Gai ono mee diinei laama ma mee e hhao ai lehu e hai hogi i goolo danuaa. 39 Gai haia de mee dugu laama ma ono goloa alodahi i e dahi talent§dahi talente bei se 75 pauni. goolo danuaa. 40 Gai koe diiloo haia gi bei de hagatau aagu ne hagaago adu gi de goe i honga de mounga.*Acts 7.44; Heb 8.5