29
De hai e hagadabu ai de gau haimeedabu
(Lev 8.1-36)
1 “Gai deenei dau hai e hagadabu ai gilaadeu e haia hegau a de gau haimeedabu. Gaavee dahi kaau daane ma e lua ssiibi daane e deai mee baubau i olaadeu angaanga, 2 ma hanu pelaoaa dee hagahua, ma hanu keege dee hagahua e labu ma lolo, ma hanu besgede e dee hagahua ma de hulu ange lolo aagena. Gai koe haia mee nei i pelaoaa o denga grain gu mmili ma gu lligi. 3 Gai koe ga hhao ange mee nei gi dahi gede ga gaamai madali de kaau ma luu ssiibi daane laa. 4 Gai koe ga gaamai Aaron ma ana dama daane gi de haitoga o de hale malo hagabuni, ga hagagilimalali gilaadeu i vai. 5 Gai koe ga gaamai denga malo laa, ga hakahu ange Aaron i de malo belee, ma de malo laa daha, ma de ephod, ma de mee dau i hadahada, ga nnoa lo tono ungaalodo i de mee nnoa ne llanga hagalaagii; 6 gai koe ga dugu ange de goobai malo gi honga dono biho, aama de nnoa ange de hau dabu goolo laa gi de goobai malo. 7 Gai koe ga gaamai de lolo hagadabu ga llingi ange gi honga dono biho. 8 Gai koe ga gaamai hogi ana dama daane, ga hakahu ange gilaadeu i denga malo belee, 9 ga noonooa olaadeu ungaalodo i mee noonooa, ma de noonooa ange denga goobai gi honga olaadeu biho. Gai gilaadeu ga hai ai hegau a tangada haimeedabu ga hano ai. Deenei dau hai e hagadabu ai Aaron ma ana dama daane.
10 Gai koe ga gaamai de kaau laa gi ma te hale malo hagabuni, gai Aaron ma ana dama daane gi dugua ange olaadeu lima gi honga de biho o de manu laa, 11 gai koe ga velo gi magau de kaau laa i mada luu mada o Tagi Maolunga, i ma te haitoga o de hale malo hagabuni. 12 Gai koe ga kave hanu dodo o de kaau laa ga hulu ange gi honga denga hanga e haa o de mommee o ssigidaumaha i doo madannia, gai koe ga llingi ange denga dodo e doe gi tahido o de mommee o ssigidaumaha. 13 Gai koe ga kave denga mee moomuna alodahi e pigi ange gi denga dae, ma luu baasi o de ade, ma luu kidney madali denga mee moomuna iai, ga dudu i honga de mommee o ssigidaumaha. 14 Aagai denga kano o de kaau laa, ma ono gili, ma denga dae, gai koe ga kave ga dudu i de ahi i tua de mommee nnoho gaainga; de mee nei go ssigidaumaha o haisala.
15 Gai koe ga gaamai dahi luu ssiibi daane laa, gai Aaron ma ana dama daane gi dugu ange olaadeu lima gi honga dono biho, 16 gai koe ga daa ssiibi laa ga kave ono dodo ga dabudabui ange gi luu baasi o de mommee o ssigidaumaha. 17 Gai koe ga duuduu aalanga o ssiibi daane laa ga hhui ono lodo ma denga vae, ga dugu ange gi gaogao o duudanga ange laa aama de biho. 18 Gai koe ga dudu ssiibi daane laa alodahi i honga de mommee o ssigidaumaha; deenei ssigidaumaha dudu ange gi Tagi Maolunga; gai se sigidaumaha nnamu kala e hai i de ahi ange gi Tagi Maolunga.*Eph 5.2; Php 4.18
19 Gai koe ga gaamai ssiibi daane ange laa; gai Aaron ma ana dama daane gi dugua ange olaadeu lima gi honga de biho o ssiibi laa. 20 Gai koe ga daa gi magau ssiibi laa, ga kave hanu ono dodo laa ga hulu ange gi hiihii dalinga madau o Aaron ma ana dama daane, ma honga madannia maatua o olaadeu lima madau, aama honga dabuvae maatua o olaadeu vae madau. Gai koe ga dabudabui ange dodo e doe gi luu baasi o de mommee o ssigidaumaha. 21 Gai koe ga kave hanu dodo i honga de mommee o ssigidaumaha laa, ma hanu lolo hagadabu ga hagassii ange gi honga o Aaron ma ono malo, aama honga o ana dama daane ma olaadeu malo; gai gilaadeu ma ana dama daane ma olaadeu malo gu hagadabu mai gi de au.
22 Gai koe ga kave denga mee moomuna o ssiibi daane, ma de muli iai laa mee moomuna, ma denga mee moomuna e pigi ange laa gi denga dae, ma mee moomuna o de ade, ma luu kidney ma mee moomuna iai, ma de aalanga o de vae madau (i hiidinga go ssiibi gu hagadabu ai de gau haimeedabu). 23 Gai koe ga kave dahi duudangaa pelaoaa dee hagahua, ma dahi keege dee hagahua e labu ma lolo, aama dahi besgede, mai i lo te gede iai laa pelaoaa dee hagahua i mada luu mada o Tagi Maolunga; 24 gai koe ga dugu ange mee nei gi lodo luu lima o Aaron ma ana dama daane, gai gilaadeu gi daodaohia age mee nei i mada luu mada o Tagi Maolunga. 25 Gai koe ga ahe ange ga kave mee laa mai i lodo olaadeu lima, ga dudu madali ssigidaumaha dudu i honga de mommee o ssigidaumaha, e hai ai ssigidaumaha nnamu kala i mada luu mada o Tagi Maolunga. Mee nei se sigidaumaha e hai i de ahi ange gi Tagi Maolunga. 26 Gai koe ga kave hogi de aalanga o de aloalo ne hagadabu ai laa Aaron, ga daodaohi age i mada luu mada o Tagi Maolunga, e hai ai ssigidaumaha daodaohi age, gai de mee nei go doo duuhanga.
27 Gai koe ga hagadabu de aalanga o de aloalo ne hai ai laa ssigidaumaha daodaohi age, ma de aalanga o de vae ne hai ai laa tuuhanga o de gau haimeedabu, mai i ssiibi ne hai ai laa de hagadabu, i hiidinga deenei tuuhanga o Aaron ma ana dama. 28 Tuuhanga nei se mee mai i daho de gau Israel ange gi Aaron ma ana dama daane ga hano ai. Deenei tuuhanga o de gau haimeedabu a de gau Israel e gaavange mai i alaadeu sigidaumaha hagadanuaa magavaa; deenei delaadeu sigidaumaha ange gi Tagi Maolunga.
29 Gai denga malo dabu o Aaron ni mee ange hogi gi denga dama daane i dono aamuli i muli mai, gilaadeu gi kahu ai i de masavaa olaadeu e hagasulu ai ga hagadabu. 30 Gai tama e gaavee laa tuulanga o Aaron ga hai ai hegau a tangada haimeedabu gi gahu i malo nei i e hidu laangi, i de masavaa oona e ulu ai gi lo te hale malo hagabuni, ga hai ai ana hegau i lo te Aabi Dabu.
31 Gai koe ga kave ssiibi daane ne hai ai laa de hagadabu ga boale ono kano i dahi mommee dabu; 32 gai Aaron ma ana dama daane gi gaina kano o ssiibi laa madali denga pelaoaa i lo te gede laa, i gaogao de haitoga o de hale malo hagabuni. 33 Gilaadeu gi gaina mee ne hai ai ssigidaumaha e tala ai olaadeu haisala ma de hagadabu ai gilaadeu, aagai e deai ange donu dangada gee e maua i de gai denga mee nei, go hiidinga mee nei e dabu. 34 Gai noo e hanu kano o ssiibi o de hagadabu, be ni pelaoaa e doe i taiao age, gai koe ga dudu i de ahi; mee nei e dee gai donu, go hiidinga ni mee dabu.
35 Gai koe ga hai ange gi Aaron ma ana dama daane gi bei mee alodahi aagu gu tala adu gi de goe; gai e hidu laangi aau e hagadabu ai gilaadeu. 36 Laangi alodahi gai koe haia ssigidaumaha o haisala i dahi kaau daane. Gai koe hagagilimalali de mommee o ssigidaumaha, i de hai ssigidaumaha nei i ono elunga, ma de llingi ange lolo ga hagadabu ai. 37 E hidu laangi aau e hagagilimalali ai ma de hagadabu de mommee o ssigidaumaha. Gai de mommee o ssigidaumaha e hai naa ga dabu mmao. Gai be se aha naa huu e hagabaa ange gi de mommee o ssigidaumaha, gai gu dabu hogi.
Denga sigidaumaha i laangi alodahi
(Num 28.1-8)
38 “Gai aanei au manu e hai ai ssigidaumaha i honga de mommee o ssigidaumaha i laangi alodahi: e lua ssiibi gu dagidahi ngadau. 39 Gai dahi ssiibi nei e hai ai ssigidaumaha i taiao, gai ssiibi ange laa e hai ai ssigidaumaha i de ahiahi. 40 Gai ga hagahidi hogi e dahi diba i diba e madaangahulu o dahi ephah*⅒ ephahagu made se 3 pauni. pelaoaa lligi gu hilo ma dahi diba i diba e haa o dahi hin†¼ hinagu made se dahi koada. lolo ne tugi, aama dahi diba i diba e haa o dahi hin uvaini e hai ai ssigidaumaha o mee unu. 41 Gai koe ga daa ssiibi ange laa ga hai ai ssigidaumaha i de ahiahi, madali aama ssigidaumaha o grain ma ssigidaumaha o mee unu, bei de hai ne hai ai i taiao, ga hai ai dahi ssigidaumaha nnamu kala i de ahi ange gi Tagi Maolunga.
42 Ssigidaumaha dudu nei e hai i laangi alodahi i daho oodou atangada i muli mai, gai haia i ma te haitoga o de hale malo hagabuni i mada luu mada o Tagi Maolunga, go kilaa oogu e hedae adu ai gi goodou ma de basa adu ai gi goe. 43 Go kilaa hogi oogu e hedae adu ai gi goodou de gau Israel, gai au ga hai ai gi dabu de mommee laa i dogu mahamaha.
44 Gai au ga hagadabu ai de hale malo hagabuni ma de mommee o ssigidaumaha, ma de hagadabu ai Aaron ma ana dama daane gi ni dangada haimeedabu, gai gilaadeu ga hai hegau mai gi de au. 45 Gai au ga noho ai madali de gau Israel, gai go au delaadeu Maadua. 46 Gai gi iloo ai e gilaadeu bolo go au donu go Iahweh delaadeu Maadua, ne hagassao ina mai gilaadeu i de henua go Egypt, gai au ga noho ai i olaadeu daha. Go au Tagi Maolunga delaadeu Maadua.