40
De hagatau mee o de tabernacle
1 Gai Tagi Maolunga ga hai ange gi Moses, 2 “Tahi laangi naa huu o tahi malama gai koe ga hagaduu age de tabernacle, go de hale malo hagabuni. 3 Gai koe ga hhao de ngavesi o de tala hagadonu ga dugu ange gi dono mommee, ga dau age de malo buibui ga buibui ai. 4 Gai koe ga gaamai teebele ga hagatau ange mee gi ono elunga. Gai koe ga gaamai de mee dugu laama, ga dugu ange denga laama gi olaadeu duulanga. 5 Gai koe ga gaamai hogi de mommee o ssigidaumaha goolo o mee maanongi ga hagaduu i mada i mua o de ngavesi o de tala hagadonu, ma de dau age de malo buibui ga pono ai de haitoga o de tabernacle.
6 Hagaduulia de mommee o ssigidaumaha dudu i ma te haitoga o de tabernacle, go de hale malo hagabuni, 7 ga gaamai taaba hagagilimalali ga dugu i magavaa o de hale malo hagabuni ma de mommee o ssigidaumaha dudu ga hhao i vai. 8 Gai koe ga dau age denga malo buibui i luu baasi de buibui laa daha, ga dau age de malo buibui i ma te haitoga o de buibui laa daha.
9 Gai koe ga hai de lolo hagasulu ga hagasulu ai de tabernacle ma mee alodahi i ono lodo, ga hagadabu ai mee alodahi, gi dabu ai mee alodahi. 10 Gai koe ga hagasulu de mommee o ssigidaumaha dudu ma ono goloa alodahi ga hai gi dabu, gi dabu mmao ai de mommee o ssigidaumaha. 11 Hagasulu ina hogi taaba hagagilimalali ma dono dagelo, ga hai gi dabu.
12 Gai koe ga gaamai Aaron ma ana dama daane gi de haitoga o de hale malo hagabuni ga hagagilimalali ai gilaadeu i vai, 13 gai koe ga hakahu ange Aaron i denga malo dabu, ga hagasulu ma de hagadabu ia, gi se dangada haimeedabu e hai hegau mai ai gi de au. 14 Gai koe ga gaamai hogi ana dama daane ga hakahu ange gilaadeu i malo belee, 15 ga hagadabu gilaadeu i de lolo bei dau hai ne hagadabu ai delaadeu damana, e hai hegau mai gi de au i hegau a de gau haimeedabu. Gai delaadeu hagadabu i de lolo ange gi hegau o tangada haimeedabu e duudagi naa donu huu i denga atangada alodahi e hano ai.”
16 Gai Moses ne hai ga bei muna alodahi a Tagi Maolunga ne tala ange gi de ia.
17 Gai tahi laangi huu o tahi malama, i de lua ngadau, gai de tabernacle gu duu age. 18 De masavaa a Moses ne hagaduu age ai de tabernacle, gai ia ne hagatau denga dagelo i olaadeu mommee, ga velo ange denga laagau gi lodo dagelo laa, gai ia ga hangaabo ange denga laagau hagamakaga, ma de hagatuu age denga duludulu. 19 Gai ia ga doha denga malo ga odo ai honga de tabernacle, bei de hai a Tagi Maolunga gu tala ange ai gi de ia.
20 Gai ia ga kave luu duu hadu o de tala hagadonu ga hhao ange gi lo te ngavesi, ga velo ange luu laagau o de ngavesi, aama de gaavange de pono o de tala haisala gi honga de ngavesi laa, 21 gai ia ga kave de ngavesi ga hhao gi lo te tabernacle, ga dau age de malo buibui ga buibui ai de ngavesi o de tala hagadonu, bei de hai a Tagi Maolunga ne tala ange ai gi de ia.
22 Gai ia ne hagaduu teebele i lo te hale malo hagabuni, i de baasi gi ngaiho i lo te tabernacle, i tua de malo buibui, 23 gai ia ga hagatau ange denga pelaoaa i mada i mua o Tagi Maolunga gi ono elunga, bei de hai a Tagi Maolunga gu tala ange ai gi de ia.
24 Gai ia ne hagaduu de mee dugu laama i de baasi gee o teebele i lo te hale malo hagabuni, i de baasi gi ngaage o de tabernacle, 25 gai ia ga haula denga laama i mada luu mada o Tagi Maolunga, bei de hai a Tagi Maolunga gu tala ange ai gi de ia.
26 Gai ia ne gaamai de mommee o ssigidaumaha goolo gi lo te hale malo hagabuni, i tua de malo buibui, 27 ga dudu ssigidaumaha o mee maanongi i ono elunga, bei de hai a Tagi Maolunga gu tala ange ai gi de ia. 28 Gai ia ne dau age de malo ga buibui ai de haitoga o de tabernacle.
29 Gai ia ga hagaduu de mommee o ssigidaumaha dudu i gaogao de haitoga o de tabernacle, go de hale malo hagabuni; gai ia ga hai sigidaumaha dudu ma ssigidaumaha o grain, bei de hai a Tagi Maolunga gu tala ange ai gi de ia.
30 Gai Moses ga hagaduu taaba hagagilimalali i magavaa de hale malo hagabuni ma de mommee o ssigidaumaha dudu, ga hhao i vai e hagagilimalali ai, 31 go vai o Moses ma Aaron, aama dama daane a Aaron e hagagilimalali ai olaadeu lima ma vae. 32 De masavaa naa huu olaadeu e hulo ai e ulu gi lo te hale malo hagabuni, ma de masavaa olaadeu e hulo ai ga hagapaa ange gi de mommee o ssigidaumaha dudu, gai gilaadeu gi hagagilimalali ina gilaadeu, bei de hai a Tagi Maolunga gu tala ange ai gi Moses.
33 Gai Moses ga hagaduu age de buibui laa daha i luu baasi de tabernacle ma de mommee o ssigidaumaha dudu, gai ia ga dau age de malo buibui o de haitoga o de buibui laa daha. Gai Moses ne hai ga lava hegau laa alodahi.
De mahamaha o Tagi Maolunga
(Num 9.15-23)
34 Gai de hagausinga gu hano iho ga haoli de hale malo hagabuni, gai de mahamaha o Tagi Maolunga gu hhao lo te tabernacle.*1 Ki 8.10-11; Isa 6.4; Ezk 43.4-5; Rev 15.8 35 Gai Moses gu dee maua i de ulu gi lo te hale malo hagabuni, go hiidinga de hagausinga gu haoli ono elunga, gai de mahamaha o Tagi Maolunga gu hhao lo te tabernacle.
36 De masavaa olaadeu e hulo saele ai i lodo henua, gai de masavaa naa huu o tuludulu hagausinga laa e hagangalue gee ai i honga tabernacle, gai de gau Israel alodahi ga ngaalue hogi ga hulo, 37 aagai noo de hagausinga laa e dee hagangalue, gai gilaadeu e dee ngaalue donu, ga dae ai gi de laangi e hagangalue ai. 38 Gai de hagausinga a Tagi Maolunga e duu i honga tabernacle i de laangi, gai de boo e bei de ahi i mada i mua o dangada o Israel alodahi, i taulooloa delaadeu hagadaga saele.