13
Denga pelaabisi hadu muna
1 Gai Tagi Maolunga ne hagaago mai ana muna gi de au, ga hai mai, 2 “Tama a tangada, basa pelaabisi hai baasi ange gi denga pelaabisi o Israel e pasa pelaabisi laa iainei. Gai hai ange gi gilaadeu e pasa pelaabisi laa donu huu i alaadeu maanadu: ‘Goodou hagalaangona muna a Tagi Maolunga! 3 E hagadaba de Ia Aamua go Iahweh: E vakaa naa denga pelaabisi llodo ssenga e haia laa donu huu olaadeu lodo, gai au tigi hakide ange donu gi gilaadeu i midi hagaago ange! 4 Israel, oo pelaabisi e bei denga gaaduu de vao e nnoho laa i denga mommee maoha. 5 Goodou tee hulo e hagaahe age mommee gu maoha i de buibui, aabe go hagaduu age de buibui o dangada o Israel, gi duu ai gi makaga de masavaa o de hebagi, i de laangi o Tagi Maolunga. 6 Gilaadeu ne hai denga midi hagaago ange e dee ni muna abodonu, ma de hadu muna i de tala mee tigi loomai. Gilaadeu e hagataba, “Go Tagi Maolunga e hagadaba,” gai e dee go Tagi Maolunga donu ne haia gilaadeu gi loomai, aagai gilaadeu e nnoho bolo ia e hagassula alaadeu muna. 7 E aha, goodou tee hai laa denga midi hagaago ange e dee ni muna abodonu, ma de hadu muna i de masavaa oodou ne tala ai mee tigi loomai, i doodou hagataba, “Go Tagi Maolunga e hagadaba,” gai au tigi basa adu donu?
8 Deenei ai, e hagadaba de Ia Aamua go Iahweh: Go hiidinga o oodou muna hhadu ma oodou midi hagaago ange hhadu, deenei ai, au e hai baasi adu donu gi goodou, go de Ia Aamua go Iahweh e hagadaba. 9 Gai dogu lima sauaa e hai baasi ange gi denga pelaabisi e gidee laa denga midi hagaago ange hhadu, ma de tala mee tigi loomai i de hadu muna. Gilaadeu e dee dau madali de gau hagasaele o ogu dangada, be sisi olaadeu ingoo madali de gau Israel, aabe hulo gi de henua o Israel. Gai gi iloo ai e goodou bolo go au donu go de Ia Aamua go Iahweh.
10 Go hiidinga gilaadeu ne hagasenga ogu dangada, ga hai ange, “Nnoho paba,” gai e deai donu se nnoho paba, go hiidinga de masavaa alaadeu ne hagaduu ai dahi buibui, gai gilaadeu ne lebu gu tea,*Jer 6.14; 8.11 11 deenei ai, daalaa ange gi dangada ne lebu tea ina de buibui laa, bolo de buibui laa e baguu naa donu. De langi maadolu e pala iho naa, gai denga dibaa haisi e too iho naa, gai de madangi mmahi e ssau mai naa. 12 Gai de masavaa naa huu e baguu ai de buibui laa, gai dangada e ssili adu naa gi goodou, “I hee denga mee oodou ne lebu ai de buibui laa?”
13 Deenei ai, e hagadaba de Ia Aamua go Iahweh: Au e hai naa gi ssau mai de madangi mmahi i dogu bole, ma de hai gi pala iho de langi maadolu madali denga duudangaa haisi ga oha ai de buibui laa. 14 Au e oha naa de buibui oodou ne lebu naa i mee tea, ga hagabaguu gi honga de gelegele, ma de hai gi sula age dono dagelo. Gai de masavaa naa huu e baguu ai, gai goodou e maakau naa hogi i kilaa; gai goodou e iloo naa bolo go au donu go Iahweh. 15 Deenei dagu hai e hai ai de buibui i dogu bole, ma dangada ne lebu ina laa ga tea. Gai au e hai adu naa gi goodou, “De buibui ma gilaadeu ne lebu ina ga tea gu dee maaleva, 16 go denga pelaabisi o Israel ne daalaa laa i dagodo o Jerusalem, ma de gidee denga midi hagaago ange i dagodo o de nnoho baba o de aduhale, i de masavaa e deai ai se nnoho paba i kilaa, go de Ia Aamua go Iahweh e hagadaba.” ’
17 Gai koe, tama a tangada, hai baasi ange gi denga haahine i daho oo dangada e pasa pelaabisi laa donu huu i alaadeu maanadu. Basa pelaabisi hai baasi ange gi gilaadeu, 18 hai ange, ‘E hagadaba de Ia Aamua go Iahweh: E vakaa naa denga haahine e duuia laa mee e dau i olaadeu gubu lima, ma hagadaagangaa mee e haoli ai olaadeu biho, gai gilaadeu ga vaivai hai ai ogu dangada. E aha, goodou e vaivai hai mouli o ogu dangada, gai ga hagaola donu huu oodou mouli? 19 Goodou ne hagangadi mee au i magavaa o dogu huaadangada i hiidinga o hanu momo barley ma hanu amuamu pelaoaa. Goodou ne daa dangada e dee heohi de daa gi maakau, aagai ne hagaola dangada e dee heohi de dugu gi mouli, i doodou hadu muna ange gi ogu dangada e hagalaangona oodou muna hhadu.
20 Deenei ai, e hagadaba de Ia Aamua go Iahweh: Tilo, au e hai baasi ange gi denga mee gubu lima, oodou gu noonoa ai naa ogu dangada bei dagodo o denga manu llele, gai au e aau gee naa gilaadeu mai i oodou lima; au e hagaola naa ogu dangada oodou gu noonooa naa bei denga manu llele. 21 Au e kave gee naa hogi oodou mee haoli ga hagaola ogu dangada mai i oodou sauaa. Gai gi iloo ai e goodou bolo go au donu go Iahweh. 22 Goodou gu hai ma gu llodo baageaa gilaadeu e heohi i oodou muna hhadu, gai e dee go au donu ne hagadaemaha ina gilaadeu; gai goodou ne hagammahi ange de gau baubau gi dee daahuli gee ai gilaadeu i alaadeu hegau baubau gi mouli ai gilaadeu. 23 Deenei ai, goodou e dee aahe ange naa donu e hai hanu midi hhadu, aabe daahanga dangada i doodou tala mee tigi loomai. Gai au e hagaola naa ogu dangada mai i oodou sauaa. Gai gi iloo ai e goodou bolo go au donu go Iahweh.’ ”