15
Jerusalem se grapevine e deai ono haigamaiana
1 Gai Tagi Maolunga ne hagaago mai ana muna gi de au, ga hai mai, 2 “Tama a tangada, dee hee de hai o de laa o de grape e danuaa ange ai i de laa o dahi manu somo i lodo henua? 3 E aha, dangada e kave laa ono laa e hagatuu ai hanu mee haigamaiana? Gai dangada e hai laa dahi laa o de manu nei e hagalau ange ai mee? 4 Gai noo gu maga ange gi lo te ahi bei de lahhie, gai de ahi ga dudu luu bido gai lo te ungaalodo gu vela, gai e hanu ai laa ono haigamaiana? 5 Tilo, de masavaa tigi vela ai, gai e deai donu ono haigamaiana; gai e kii ange naa donu teai ono haigamaiana i dua de dudu ga vela i de ahi!
6 Deenei ai, e hagadaba de Ia Aamua go Iahweh: Au e hai naa dangada o Jerusalem gi bei dagodo o de laagau o de grape i magavaa o denga manu ssomo i lodo henua, e hai ai lahhie o de ahi. 7 Au e hai baasi ange naa donu gi gilaadeu. Gai ga ssao mai naa donu gilaadeu i de ahi, gai de ahi e ahe ange naa donu ga dudu gilaadeu. Gai gi iloo ai e goodou bolo go au donu go Iahweh, i de masavaa aagu e hai baasi ange ai gi gilaadeu. 8 Gai au e hai naa de henua gi ngadi dagodo, go hiidinga gilaadeu tee hai hegau mai gi de au i de mee abodonu, go de Ia Aamua go Iahweh e hagadaba.”