5 Ia ne kave hogi hanu golee mai de henua laa ga doo i de mommee e ssomo danuaa ai denga manu. Gai ia ne kave ga doo i dahi mommee e lagolago vai iai, bei dagodo o de manu somo go de willow. 6 Gai de manu laa ne somo ga se grapevine baa i lalo ma de laumalie. Gai ono laa e hulo ga tae age gi de mommee iai de igele, ono aga e hulo gi lo te gelegele i ono lalo. Gai de grapevine laa e lagolago ono laa ma ono lau.

7 Aagai e dahi ange naa igele laumalie, gai e mmahi luoono bakau ma de maadolu ono hulu manu. Gai tilo, aga o de grapevine laa ne ssomo mai i de mommee ne doo ai laa, ga hulo gi de mommee iai de igele laa, gai ono laa ne ssomo ga hulo gi ono daha, gai ia ga hagamaluulu ai. 8 De grapevine laa ne doo i honga de gelegele danuaa iai vai lagolago, gi lagolago ai ono laa ma de hua lagolago, gai gi se grapevine danuaa.’

9 Gai koe hai ange, ‘E hagadaba de Ia Aamua go Iahweh: E maua naa gi somo de grapevine laa? E aha, e dee unusia age naa madali ono aga ga aau ono hua gi mmae ai? Ono uli alodahi e mmae naa. Gai e dee se dangada mmahi donu, aabe ni dangada soa e unusia age. 10 Gai tilo, e maua naa gi somo danuaa noo gu sigi? E aha, e dee mmae naa donu huu i de ssau mai o de madangi i dua ga hagaili, gai gu mmae i de mommee e somo ai laa?’ ”

11 Gai Tagi Maolunga ne hagaago mai ana muna gi de au, ga hai mai, 12 “Hai ange gi dangada e hai baasi mai laa gi de au, ‘Goodou tigi tonu ange naa donu gi de hagadoonunga o mee nei?’ Hai ange gi gilaadeu, ‘Tilo, de hodooligi o Babylon ne humai gi Jerusalem ga kave madali ia de hodooligi ma denga dagi gi Babylon.*2 Ki 24.15-20; 2 Ch 36.10-13 13 Ia ne hili hogi dahi dangada mai i de huaabodu o de hodooligi, ga hai dahi hagatoo donu hagaheloongoi madali ia, ma de hai taane laa gi hagatoo donu bolo ia e hagabuni ange gi de ia. Ia ne kave hogi denga dagi o de henua madali ia, 14 gai ia ga hagamaolalo ai de nohoanga hodooligi laa, gi dee ahe ange ai gi sula age, gai gilaadeu gi mouli donu huu i delaadeu daohi dana hagatoo donu hagaheloongoi. 15 Aagai de hodooligi ne hai baasi ange gi de ia, ga hai gi hulo ono dangada sui gi Egypt, gi gaamai ai hanu hoosa ma dahi hagabuulinga hebagi soa. E aha, dana hagatau e maua naa gi sula? Gai de ia ne haia mee nei e maua naa gi ola? Gai e maua naa e tangada e oohaa de hagatoo donu hagaheloongoi nei gi ola?

16 Au e hagatoo donu i dogu mouli, go de Ia Aamua go Iahweh e hagadaba: ia e magau naa donu i Babylon, go de mommee o de hodooligi ne hilia ia e noho ai, go de ia ne haia de hagatoo donu hagaheloongoi aana ne hagangadi mee laa ma de oha. 17 Gai Pharaoh ma dono hagabuulinga hebagi aama denga daane soa e dee maua naa donu i de bale ange ia i de hebagi, i de masavaa a de gau Babylon e loomai ai ga hagabudubudu age denga gelegele ma de hagatuu age denga mee e oha ai de buibui ma de daa dangada soa ga maakau. 18 Ia ne hagangadi mee de hagatoo donu i dana oha de hagatoo donu hagaheloongoi laa. Gai tilo, ia ne hagatoo donu aagai ia ne hai mee nei alodahi; deelaa ai, ia e dee ola naa donu.

19 Deenei ai, e hagadaba de Ia Aamua go Iahweh: Au e hagatoo donu i dogu mouli, au e sui ange naa gi de ia, dana hagangadi mee dagu hagatoo donu ma dana oha dagu hagatoo donu hagaheloongoi. 20 Gai au e maga ange naa dagu galauna gi ono elunga e buulou ai ia, ma de kave ia gi Babylon, gai au ga hagaduasala ai ia i kilaa, i hiidinga ia tee hai hegau mai gi de au i de mee abodonu. 21 Denga daane dau alodahi o ono hagabuulinga hebagi e daia naa ga maakau i de gadilaasa, gai dangada ne ola e mavaevae saele naa i henua i lalo alodahi. Gai gi iloo ai e goodou bolo go au donu go Iahweh ne hagadaba.

22 E hagadaba de Ia Aamua go Iahweh: Au e hhadi naa hogi dahi laa mai i de ulu o de manu somo go de cedar ga kave, au e hhadi naa dahi laa gauligi i de ulu, ga kave ga doo i de ulu o dahi mounga maolunga. 23 Gai au e kave naa ga doo i honga de mounga maolunga o Israel, gai e somo naa ga lagolago ono laa ma ono hua gai, gai e somo naa ga se cedar danuaa, gai denga hagadaagangaa manu llele alodahi e loomai naa ga hai olaadeu hoohanga i honga ono laa, ma de hagalilo i ono lalo. 24 Gai denga manu ssomo alodahi i lo te duu malaelae e iloo naa bolo go au go Iahweh; go au ne sele ina iho denga manu ssomo lloa, gai ne hai denga manu e paa i lalo gi ssomo gi lloa, ma de hai gi mmae denga manu lau kohu, gai ga hai denga manu gu mmae laa gi ssomo danuaa.

Go au donu go Iahweh ne daalaa muna nei, gai au e hagassula naa donu mee nei.’ ”