19
Taahili hagahinangalosaa o dagi o Israel
1 “Gai koe, huudia ange taahili o de magau gi denga dagi o Israel, 2 ga hai ange,
‘Doo dinana se aha? Ia se laiono mmahi
i magavaa o denga laiono!
Ia ne dogoduli i magavaa o denga laiono mmahi,
ma e haele ai ana dama.
3 Ia ne haele dahi ana dama,
gai ia gu sula ga se laiono mmahi.
Gai tama laa ne ago de hai e gai ai denga manu
aama de gai dangada.
4 Denga huaahenua ne langona ono longo,
gai ia ne boogia ga hhao gi lo te laadeu geelinga.
Gilaadeu ne hagalau ia i denga maadau
ga kave gi de henua o Egypt.
5 Gai ga gidee huu e ia bolo teai haigamaiana o dana tali,
gai gu deai sana tali hagalodolodo,
gai ia ga kave ange hogi dahi ana laiono gauligi
ga haele age gi se laiono mmahi.
6 Ia ne haganngolo i magavaa o denga laiono,
go hiidinga ia gu se laiono mmahi.
Ia ne ago de hai e daa ai denga manu,
gai ia gu laiono gai dangada.
7 Ia ne oha olaadeu mommee buibui makaga,
ma de oha ga odi olaadeu aduhale.
De henua ma dangada alodahi e nnoho ai,
gu maatagu i dono haganngolo.
8 Gai denga huaahenua ne hagadabena e hebagi ange gi de ia,
ma gilaadeu i denga mommee i ono gaogao.
Gilaadeu ne buulou ia i delaadeu galauna,
gai ia gu haaoa gi lo te laadeu geelinga.
9 Gai gilaadeu ne hagalau ia ga dada ange gi lo te buibui manu,
ga kave ai gi de hodooligi o Babylon.
Gilaadeu ne hhao ia gi lo te hale pono,
gai dee langona ange ai dono haganngolo
i honga denga mounga o Israel.
10 Doo dinana e bei dagodo o dahi grapevine,
ne doo laa i gaogao de vai,
gai e lagolago ono hua ma de laalaa ina
i hiidinga de lagolago vai.
11 Ono laa ne ssomo ga makaga,
gai e danuaa i de hai ai denga laagau hodooligi.
Gai ne somo ga looloa
ange i denga manu ssomo alodahi,
gai dangada e gidee dono looloa
ma ono laa lagolago.
12 Gai hanu ne llili ga unusi age de grapevine laa,
ga hagabaguu iho gi honga de gelegele,
gai de madangi mai i dua ne ili ga mmae,
ono hua gu malili,
gai ono laa makaga laa gu mmae,
gai de ahi ne dudu de manu laa alodahi.
13 Iainei gai de manu laa gu doo i de vao,
se mommee mmasa ma teai vai iai.
14 De ahi ne daamada de dudu dahi ono laa,
gai ne dudu ga vvela ono laa alodahi ma ono hua.
Gu deai donu laa makaga o de manu laa e doe
e danuaa ange laa gi de hai ai denga laagau hodooligi.’
De mee nei se daahili hagahinangalosaa, gai se daahili e hua i denga maakau.”