21
De gadilaasa a Tagi Maolunga
Gai Tagi Maolunga ne hagaago mai ana muna gi de au, ga hai mai, “Tama a tangada, huli ange gi Jerusalem, ma gi basa pelaabisi hai baasi ange gi denga mommee dabu. Gai koe basa pelaabisi ange gi de henua go Israel, hai ange gi de henua laa, ‘E hagadaba Tagi Maolunga: Tilo, au e hai baasi adu donu gi de goe. Au e dada mai naa dagu gadilaasa i lo tono hale e daa ai gi maakau dangada heohi ma de gau baubau alodahi i oo daha. Go hiidinga au e daa naa gi odi dangada heohi ma de gau baubau, gai dagu gadilaasa e dada mai naa e daa ai dangada alodahi, mai i de bido i ngaage ga dae ai gi de bido i ngaiho. Gai gi iloo ai e dangada alodahi bolo go au donu go Iahweh, au gu aau mai dagu gadilaasa i lo tono hale; gai e dee hagaahe ange naa donu.’
Deenei ai, tama a dangada, koe gi gonogono i de mmae oo lodo ma doo hinangalosaa gi gidee e gilaadeu. Gai ga siilia adu naa huu e gilaadeu, ga hai adu, ‘Gu aha gu gonogono ai naa goe?’ gai koe hai ange, ‘Go hiidinga o denga longo gu dai loomai. Dangada alodahi e maatagu naa gai olaadeu lima alodahi e deai naa mahi iai; dangada alodahi e manavasaa naa olaadeu lodo gai olaadeu duli e pole naa.’ Tilo, mee nei e tae mai donu! Gai e hagassula naa donu, go de Ia Aamua go Iahweh e hagadaba.”
Gai Tagi Maolunga ne hagaago mai ange ana muna, ga hai mai: “Tama a tangada, basa pelaabisi ma gi hai ange, ‘E hagadaba de Ia Aamua:
Dahi gadilaasa, dahi gadilaasa
gu hakaa ma gu hagamalamalama,
10 gai ne hakaa e daa ai dangada gi maakau,
ma de hai gi malamalama bei de dabadaba o de uila!
E aha, ga malangilangi gidaadeu i togo hodooligi o dagu dama ⌊go Judah⌋? De gadilaasa e hagangadi mee de laagau bee nei alodahi.
11 De gadilaasa gu hagamodu e hakaa,
ma de poo i de lima;
gai gu hakaa ma gu hagamalamalama,
gu baba ange e poo i de lima o de ia daa dangada.
12 Tama a tangada, dangi ma de dangi see,
go hiidinga de mee nei e hai baasi ange gi ogu dangada,
gai e hai baasi ange gi dagi alodahi o Israel.
Gilaadeu e dugu ange naa gi de gadilaasa
madali ogu dangada alodahi.
Deenei ai, hagailiilia oo hadahada.
13 De mee nei se mee e hagatale ai dagodo o ogu dangada; ni haigamaiana aha o mee nei noo koe e hagangadi mee de laagau e haele ai laa goe? Go de Ia Aamua go Iahweh e hagadaba.’
14 Deenei ai, tama a tangada, basa pelaabisi,
ma de baabaa luoo lima.
Gai de gadilaasa gi daia i e lua hanonga,
aabe e dolu hanonga.
De gadilaasa se mee e daia gi maakau dangada,
se gadilaasa e daa ai dangada soa,
ma de duuli gilaadeu i denga baasi alodahi.
15 Gai dangada e maatagu naa,
gai e soa naa donu e maakau.
Au e gaamai naa de gadilaasa
gi olaadeu aduhale.
Tilo, de gadilaasa laa e dabadaba bei de uila,
gai gu poo i de lima o de ia daa dangada.
16 De gadilaasa, duudia gi de baasi madau,
ga lava go de baasi masui,
ma mommee alodahi o doo mada e lui ange aagena.
17 Au e baabaa naa hogi luoogu lima,
gai dogu bole e ui naa;
go au donu go Iahweh ne hagadaba.”
18 Gai Tagi Maolunga ne hagaago mai ange ana muna gi de au, ga hai mai, 19 “Tama a tangada, hagailonga ina e lua haiava moo de gadilaasa a de hodooligi o Babylon e humai ai, gai gi daamada mai ngaadahi i de henua daudahi. Gai koe ga hai dahi hagailonga ga hagaduu i de biigonga o de haiava e hhagi ai laa e hano gi de aduhale. 20 Gai koe ga maaga dahi haiava gi hano gi Rabbah o de gau Ammon, gai dahi gi humai gi de aduhale buibui go Jerusalem, i Judah. 21 De hodooligi o Babylon e humai naa ga duu i de hesilihaginga o luu haiava laa, ga hai ai de buubuu; ia e luuluu naa denga dao o de mee hholu gi too gi lalo, ma de ssili gi iloo i daho ono diinonga, aama de galo ange ga tilo de ade. 22 Gai dono lima madau e hagassula naa mee gu hagamodu ange gi Jerusalem, gai ia e hagatuu age naa mee e oha ai de buibui, ma de hagailoo taamada o de hebagi, ma de hagatuu mee e oha ai denga haitoga o de aduhale, ma de hagabudubudu age gelegele e oha ai de buibui, ma de hagatuu mee e oha ai de buibui. 23 Aagai dangada ne haia hanu hagatoo donu madali ia e dee hagadonusia naa de hai mee nei. Gai ia e hagamaanadu ange naa olaadeu haisala ga noonooa gilaadeu ga kave gi dahi henua gee.
24 Deenei ai, e hagadaba de Ia Aamua go Iahweh: ‘Go hiidinga goodou gu hagamaanadu mai oodou haisala i doodou hagamaanege, ma de hagaago danuaa mai oodou baubau i mee alodahi oodou gu hai — go hiidinga goodou gu hai de mee nei, goodou e gaavee naa gi dahi henua gee.
25 Goodou denga dagi baubau ma de hakino gee o Israel, gu dae mai doodou laangi, go de masavaa e gaavadu ai doodou hagaduasala. 26 Gai e hagadaba de Ia Aamua go Iahweh: Daalaa de goobai malo, gai hagauia de hau hodooligi. Mee alodahi e dee hai naa donu bei mee i mua: de gau maolunga e hai naa ga maolalo, gai de gau maolalo e hai naa ga maolunga. 27 Gu maoha, gu maoha, au e oha naa gi maoha! Gai e dee ahe ange naa donu e hagaduu age ange, ga dae ai gi de humai o de ia gu hili, gai au ga gaavange gi de ia.’
28 Gai koe, tama a tangada, basa pelaabisi hai ange, ‘E hagadaba de Ia Aamua go Iahweh i de gau Ammon, ma alaadeu muna hagadookaa:
Dahi gadilaasa, dahi gadilaasa
gu dada mai e daa ai dangada,
gai gu hai gi malamalama e daa ai
ma de hai gi dabadaba bei de uila.*Jer 49.1-6; Ezk 25.1-7; Amos 1.13-15; Zep 2.8-11
29 Gilaadeu e hai denga midi hhadu i oo dagodo,
ma de tala oo dagodo i mee e loomai i de hadu muna,
ma de hagauda ange goe gi honga eu
o de gau baubau gu dai daa laa gi maakau,
gai delaadeu laangi e hagaduasala ai
gu dae mai donu.
30 Hagaahea ange de gadilaasa gi lo tono hale.
Go de mommee oou ne hagadau ai,
i de henua o oo maadua,
go kilaa aagu e hagamodu ai oo muna.
31 Au e hagaduasala naa goe i dogu bole
ma de hai baasi adu gi de goe i de kona dogu bole;
au e dugu ange naa goe gi de gau alasala,
go dangada e aabo i de oha mee.
32 Koe e bei naa dagodo o lahhie e hai ai laa de ahi,
oo dodo e hagassii saele naa i doo henua,
gai e deai ange naa donu dangada e manadua goe;
go au donu go Iahweh ne hagadaba.’ ”

*21:28 Jer 49.1-6; Ezk 25.1-7; Amos 1.13-15; Zep 2.8-11