24
De anibada hongagelegele baalanga
1 Gai ssiva ngadau huu, i de madaangahulu laangi o de madaangahulu malama, gai Tagi Maolunga ne hagaago mai ana muna gi de au, ga hai mai, 2 “Tama a tangada, siia ma gi daohia de laangi nei, go hiidinga anailaa nei gai de hodooligi o Babylon gu duuli luu baasi de aduhale go Jerusalem.*2 Ki 25.1; Jer 52.4 3 Gai koe daalaa ange de mee hagasengasenga nei gi de gau hagamaanege naa, ga hai ange gi gilaadeu, ‘E hagadaba de Ia Aamua go Iahweh:
Dugua ange de anibada e dunu,
dugua ange de anibada
ma gi liingia ange vai gi ono lodo.
4 Dilia ange denga dibaa kano manu gi ono lodo,
go diba danuaa alodahi,
go de aalanga o de vae ma de lima.
Haaoa gi honu ma denga ivi danuaa hugadoo;
5 hilihilia denga manu danuaa hugadoo
i de hagabuulingaa ssiibi.
Hagataulia age denga lahhie i lalo de anibada;
ga boale ai ma de dunu denga ivi i ono lodo.
6 Gai e hagadaba de Ia Aamua go Iahweh:
E vakaa naa de aduhale e daia gi maakau dangada,
ma de anibada gu hongagelegele baalanga laa,
gu dee maua i de hagagilimalali ono lodo!
Aaua dagidahi age denga kano manu i ono lodo,
gai e dee hilihili donu de hai e aau age ai.
7 Dodo o dangada aana ne daa ga maakau,
ia ne llingi ange gi honga de baba e deai mee iai;
ia tee llingi gi honga de gelegele,
gi maua ai i de haoli ange.
8 E hai ai au gi bole, ma de sui ange alaadeu hegau,
au ne llingi ange ono dodo gi honga de baba e deai mee iai
gi dee maua ai i de haoli ange.
9 Deenei ai, e hagadaba de Ia Aamua go Iahweh:
E vakaa naa de aduhale e daia ga maakau dangada!
Au e hagabudu naa hogi gi lagolago lahhie.
10 Hagataulia denga duudangaa lahhie e dahu ai de ahi,
duunaa denga kano manu gi mmoa danuaa,
ga hilo ange mee hagamanongi aagena,
gai ga dudu denga ivi i de ahi.
11 Gai dugu ange de ngadi anibada gi honga denga maga ahi
ga dae ai gi de mahana, gai denga copper iai gu kaa,
gi odi ai denga mee baubau iai i de vaivai,
gai gu deai mee hongagelegele baalanga iai.
12 Au gu hai mee alodahi e maua i de hai ange aagena,
gai denga hongagelegele baalanga tigi odi donu;
dilia ange gi lo te ahi ma ono hongagelegele baalanga.
13 Koe gu hakino gee i hiidinga o au dahulinga baubau; au ne hagatale de hagagilimalali goe, gai koe tee gilimalali donu. Deelaa ai, koe e dee maua donu gi gilimalali ga dae ai gi de sili dogu bole i dua dagu hagaduasala goe.
14 Go au donu go Iahweh ne hagadaba. Gu dae mai donu de masavaa e hagasula ai agu hegau. Au e dee hagaahe naa donu dagu muna; au e dee lodo aloha naa donu, aabe e sui dagu hagatau. Gai koe e hagaduasala naa donu gi bei dagodo o au hegau, go de Ia Aamua go Iahweh e hagadaba.’ ”
De magau o de bodu o Ezekiel
15 Gai Tagi Maolunga ne hagaago mai ange hogi ana muna gi de au, ga hai mai, 16 “Tama a tangada, tilo, au gu dai kave gee naa mai i oo daha de ia oou e aloha ai laa, i de masavaa moolau. Aagai koe e dee hinangalosaa donu be dangi aabe hai gi ssali oo loimada. 17 Gai koe dangi, gai haia gi deai e langona; gai koe e dee dangi i tangada magau. Noodia doo goobai i honga doo biho ma de ulumagi oo mee vae; gai koe gi dee haolia doo ngudu, aabe gi gaina gai a de gau hinangalosaa e gai.”
18 Gai au ne basa ange gi dangada i taiao, gai de ahiahi laa gai dogu bodu gu magau. Taiao age gai au ne hai ga bei muna gu lava i de tala mai gi de au.
19 Gai dangada ne hai mai gi de au, “Daalaa mai hagadoonunga o au mee e hai naa.”
20 Gai au ne hai ange gi gilaadeu, “Tagi Maolunga ne hagaago mai ana muna gi de au, ga hai mai, 21 ‘Hai ange gi de gau Israel: E hagadaba de Ia Aamua go Iahweh: Tilo, au e hai naa gi hakino gee dogu mommee dabu, go de hale buibui makaga oodou e tuhi naa, ma de llodo ai mmao, aama de malangilangi ai, gai oodou dama daane ma damaa hine e doe e daia naa ga maakau i de gadilaasa. 22 Gai goodou e hai naa ga bei agu mee gu hai nei: goodou e dee haoli naa oodou ngudu, aabe e gai mee a de gau hinangalosaa e gai laa. 23 Goodou e noonoa denga goobai malo i honga oodou biho, ma mee vae i oodou vae. Goodou e dee hinangalosaa aabe tangi, aagai goodou e gonogono naa i hiidinga oodou baubau, ma de hagadau daemaha i oodou magavaa. 24 Gai Ezekiel se hagailonga adu gi goodou; goodou e hai naa mee alodahi aana gu hai. De masavaa naa huu e hai ai mee nei, gai goodou gu iloo bolo go au donu de Ia Aamua go Iahweh.’
25 Gai koe, tama a tangada, de laangi naa huu aagu e kave gee ai delaadeu mommee buibui makaga, go de mommee olaadeu e malangilangi ai ma delaadeu mommee mahamaha, gai go mommee olaadeu e malangilangi mmao ai, aama alaadeu dama daane ma damaa hine — 26 de laangi laa, gai tangada e ola mai laa i de hebagi, e savini mai naa ga tala adu longo o de hebagi. 27 De laangi laa gai doo alelo e madala naa, gai koe e basa ange naa gi tangada e ola laa ga gaamai de longo gi de goe, doo alelo gu dee lau. Gai koe se hagailonga ange gi gilaadeu, gi iloo ai e gilaadeu bolo go au donu go Iahweh.”