30
De hagaduasala o Egypt
1 Gai Tagi Maolunga ne hagaago mai ana muna gi de au, ga hai mai, 2 “Tama a tangada, basa pelaabisi mage hai ange: E hagadaba de Ia Aamua go Iahweh,
Dangi see ma gi hai ange,
‘E vakaa naa i de laangi laa!’
3 De laangi laa gu baa mai donu,
de laangi o Tagi Maolunga gu baa mai donu;
se laangi e hagausinga ina,
gai se laangi hagamaatagu ange gi denga huaahenua.
4 De gadilaasa e humai naa ga hebagi ange gi Egypt,
gai Cush*Cush e bei go de bido gi lunga o Nile. e manavasaa naa
i de masavaa e maakau ai dangada i Egypt,
gai dono lava e moolia naa ga gaavee gee,
gai denga dagelo o de henua e oha naa.
5 Ethiopia, ma Put, ma Lud,†Lud e bei go Lydia. ma Arabia alodahi, ma Libya, aama dangada i denga henua o de hagatoo donu hagaheloongoi e daia naa ga maakau i de gadilaasa.
6 E hagadaba Tagi Maolunga:
Dangada e balea ange Egypt e daa donu gi maakau,
gai mahi o Egypt e hagamaolunga ai laa e hagadeai naa.
Gilaadeu e maakau naa i de gadilaasa i honga de henua,
mai i Migdol ga hano ai gi Syene,‡Syene e bei go Aswan.
go de Ia Aamua go Iahweh e hagadaba.
7 Gai delaadeu henua e ngadi dagodo naa
madali denga henua gu ngadi daakodo laa,
olaadeu aduhale alodahi e odi naa
i de ngadi daakodo bei denga aduhale gu maoha laa.
8 Gai gi iloo ai e gilaadeu bolo go au go Iahweh,
i dagu masavaa e dudu ai Egypt
ma de daa gi maakau gilaadeu ne balea ange ia.
9 De laangi laa gai au e hai naa gi hulo de gau hagailoo, i denga vaga gi hagamaatagu ina de gau Ethiopia e nnoho paba laa. Gai gilaadeu e maatagu naa i de laangi o Egypt e hagaduasala ai. Tilo, de mee nei e hai naa donu!
10 E hagadaba de Ia Aamua go Iahweh:
Au e hai naa Nebuchadnezzar, de hodooligi o Babylon
gi daia gi odi dangada soa o Egypt.
11 Gilaadeu ma dono hagabuulinga hebagi — go de huaahenua hugadoo alasala —
e hai naa gi loomai gi oohaa de henua.
Gilaadeu e dada naa alaadeu gadilaasa ga hebagi ange ai gi Egypt
gai de henua e honu naa i de gau maakau.
12 Au e hai naa hogi denga vai o Nile gi deai vai iai,
ma de hagao ange de henua gi de gau baubau;
gai au e hai naa de gau henua gee gi oohaa de henua ma mee alodahi iai.
Go au go Iahweh ne daalaa mee nei!
13 E hagadaba de Ia Aamua go Iahweh:
Au e oha naa denga diinonga,
ma de hai gi deai diinonga i Memphis.
Gai Egypt e deai naa sono dagi,
gai au e hai naa gi maatagu dangada i honga de henua.
14 Au e oha naa Pathros,
ga dudu Zoan i de ahi,
ma de hagaduasala Thebes.
15 Gai au e hagaduasala naa Pelusium i dogu bole,
go de mommee dagitilo o Egypt,
ma de daa gi maakau dangada soa i Thebes.
16 Au e dudu naa Egypt i de ahi;
gai Pelusium e duasala naa i dono mmae.
Thebes e oha naa ga maoha;
Memphis e duasala naa i laangi alodahi.
e daa naa ga maakau i de gadilaasa,
gai denga aduhale e gaavee naa.
18 Tahpanhes e gohu naa i de laangi,
i de masavaa aagu e hhadi ai de laagau hagahai hegau a Egypt.
Gai ono mahi e hagamaolunga ai laa e lilo naa.
De hagausinga e haoli naa de henua,
gai ono dangada e noonoodia naa ga gaavee gi dahi henua gee.
19 Deenei dagu hai e hagaduasala ai Egypt.
Gai gi iloo ai gilaadeu bolo go au donu go Iahweh.”
20 Gai de madaangahulu ma dahi ngadau huu i de hidu laangi o tahi malama, gai Tagi Maolunga ga hagaago mai ana muna gi de au, ga hai mai, 21 “Tama a tangada, au gu hhadi de lima o Pharaoh de hodooligi o Egypt, gai tilo, tigi saabini gi mahu ai, aabe gu hhau i de laagau gi ahe ange gi mmahi, ma de maua ai i de poo de gadilaasa. 22 Deenei ai, e hagadaba de Ia Aamua go Iahweh: Tilo, au e hai baasi ange gi Pharaoh, de hodooligi o Egypt. Au e hadihadi naa luoono lima, go dono lima mmahi laa aama dono lima gu hadi laa, ma de hai gi doo de gadilaasa e poo laa i dono lima. 23 Au e hai naa gi mavaevae saele de gau Egypt i magavaa o denga huaahenua, ma de hai gilaadeu gi nnoho saele i denga henua ange laa. 24 Gai au e hai naa gi mmahi de hodooligi o Babylon, ma de hai ia gi boogia dagu gadilaasa i dono lima; aagai au e hagamaaguluaa naa luu lima o Pharaoh, gai ia ga gonogono ai naa i mada i mua o de hodooligi o Babylon, bei dagodo o tangada gu lagohia ma gu dai magau. 25 Gai au e hai naa gi mmahi de hodooligi o Babylon, aagai e hai Pharaoh gi deai ono mahi. Gai gi iloo ai e gilaadeu bolo go au donu go Iahweh, i dagu masavaa e dugu ange ai dagu gadilaasa gi lo te lima o de hodooligi o Babylon, gai ia ga hebagi ange ai naa gi de henua go Egypt. 26 Gai au e hai naa gi mavaevae saele de gau Egypt gi denga huaahenua, ma de hai gilaadeu gi nnoho saele i denga henua ange laa. Gai gi iloo ai e gilaadeu bolo go au donu go Iahweh.”