32
Taahili o de hagaduasala o Pharaoh
1 Gai de madaangahulu ma lua ngadau huu i tahi laangi o de madaangahulu ma lua malama, gai Tagi Maolunga ne hagaago mai ana muna gi de au, ga hai mai, 2 “Tama a tangada, huudia taahili o de magau o Pharaoh, de hodooligi o Egypt, ma gi hai ange gi de ia:
‘Koe e bei dagodo o dahi laiono i magavaa o denga huaahenua,
aagai koe e bei dahi manu lausedi hagamaatagu;
e hagakobu saele i lodo oo saalingaa vai e noho ai laa,
ma de hagabeabeau lo te vai i luoo vae,
ma de hagabaubau lodo saalingaa vai.
3 E hagadaba de Ia Aamua go Iahweh:
Au e maga adu naa dagu galauna
ga buulou ai goe,
gai au e hai naa de hagabuulingaa dangada soa
gi daangia age goe gi uda.
4 Au e tili naa goe i honga de gelegele,
ma de maga ange goe gi lo te duu malaelae.
Au e hai naa denga manu llele gi toga i oo elunga,
gai denga manu lodo henua alodahi e boobosu naa i de gai goe.
5 Au e hagassii saele naa oo kano i honga denga mounga,
ma de hhao gi hoohonu lodo geelonga i oo kano.
6 Au e hagasii saele naa oo dodo i honga de henua
ga dae ai gi honga denga mounga,
gai denga saalingaa vai e hoohonu naa i oo dodo.
7 Gai de masavaa naa huu aagu e hagalilo ai goe,
gai au e haoli naa de langi, gi dee ssula iho ai denga heduu.
Au e haoli naa hogi de laa i dahi hagausinga,
gai de maasina e dee sula age naa hogi.*Isa 13.10; Mat 24.29; Mark 13.24-25; Luke 21.25; Rev 6.12-13; 8.12
8 Au e hai naa gi gohu denga mee hagamaalama i lo te langi
gi dee maalama ai honga doo henua,
go de Ia Aamua go Iahweh e hagadaba.
9 Au e hai naa gi manavasaa lodo o dangada soa,
i de masavaa aagu e oha ai goe i magavaa o denga huaahenua,
go denga henua aau tigi iloo.
10 Au e hai naa dangada soa gi llele mouli i oo dagodo,
gai olaadeu hodooligi e bolebole naa i delaadeu maatagu i oo hiidinga,
i de masavaa aagu e hagaabo ange ai dagu gadilaasa gi gilaadeu.
Gai gilaadeu e bolebole naa i taulooloa delaadeu mouli,
i de laangi aagu e oha ai goe.
11 Gai e hagadaba de Ia Aamua go Iahweh:
De gadilaasa a de hodooligi o Babylon
e dae mai naa ga hebagi adu gi de goe.
12 Au e daa naa gi maakau oo dangada soa
i gadilaasa a denga daane hebagi mmahi —
go denga daane o denga huaahenua alasala hugadoo.
Gai gilaadeu e oha naa mee o Egypt e tuhi ai laa ia,
gai ono dangada soa e hagadee kii ina naa.
13 Au e daa naa gi maakau ana manu haangai alodahi
i gaogao denga vai lagolago,
gu deai ange dangada e hagabeabeau ina
aabe ni manu haangai e hagabelabela ina kilaa.
14 Gai au e hai naa ono vai gi malino,
gai ono saalingaa vai e ssali naa bei lolo,
go de Ia Aamua go Iahweh e hagadaba.
15 De masavaa naa huu aagu e hai ai
de henua go Egypt gi ngadi dagodo,
ma de hai gi deai mee i honga de henua laa,
i de masavaa aagu e daa ai mee alodahi e mouli i kilaa,
gai gi iloo ai e gilaadeu bolo go au donu go Iahweh.’
16 Deenei taahili o de magau a dangada e hua ange gi de ia. Damaa hine o denga huaahenua e hua ange naa taahili nei gi Egypt ma ono dangada soa alodahi, go de Ia Aamua go Iahweh e hagadaba.”
17 Gai de madaangahulu ma lua ngadau huu i de madaangahulu ma lima laangi o de malama, gai Tagi Maolunga ne hagaago mai ana muna gi de au, ga hai mai, 18 “Tama a tangada, oo ma gi dangi i hiidinga o dangada soa o Egypt, haia ono dangada gi hulo gi de mommee o de gau maakau, madali dangada i denga huaahenua mmahi; gilaadeu gi hulo gi daho dangada gu loiho laa gi lo te geelonga laa: 19 ‘E aha, koe e kii ange de mahamaha i de gau ange laa? Hano iho gi lalo ma gi dagodo madali dangada tigi tuu dagaholiage.’
20 Gilaadeu gu maakau naa madali dangada gu daia ga maakau i de gadilaasa. De gadilaasa gu hagaabo; dugua ia gi gaavee madali ono dangada soa alodahi. 21 Denga daane mmahi i de mommee o de gau maakau, e tala naa dagodo o Egypt ma gilaadeu e balea ange ia, ‘Gilaadeu gu loiho ga naa daakodo madali gilaadeu tigi tuu dagaholiage, ma gilaadeu ne daa ga maakau i de gadilaasa.’
22 Assyria ma dono hagabuulinga hebagi i kilaa hogi; daanunga o ono daane alodahi gu maakau laa i luoono baasi, go gilaadeu alodahi ne daa ga maakau i de gadilaasa. 23 Olaadeu daanunga e daakodo i tagelo o de geelonga laa, gai dono hagabuulinga hebagi e danu i luu baasi dono daanunga. Dangada alodahi ne haia ga maatagu dangada e mouli, ne daia ga maakau i de gadilaasa.
24 Elam e danu hogi i kilaa, gai ono dangada soa e danu i ono gaogao. Gilaadeu alodahi ne daia ga maakau i de gadilaasa. Dangada alodahi ne hagamaatagu ina dangada e mouli, gu loiho gi lalo de gelegele tigi tuu dagaholiage. Gilaadeu ne hagadookaa madali dangada gu loiho gi lo te geelonga laa. 25 Dangada gu hai dono daanunga madali ono daane soa ne daia laa ga maakau i kilaa. Gilaadeu alodahi tigi tuu dagaholiage, ne daia ga maakau i de gadilaasa, go hiidinga gilaadeu ne hagamaatagu dangada e mouli i honga de henua. Gilaadeu ne dookaa madali dangada gu loiho gi lo te geelonga; gilaadeu gu daakodo madali dangada ne daia ga maakau.
26 Meshek ma Tubal i kilaa hogi, gai olaau dangada soa e danu i olaau gaogao. Gilaadeu alodahi tigi tuu dagaholiage, ne daia ga maakau i de gadilaasa, go hiidinga gilaadeu ne hagamaatagu dangada e mouli i honga de henua. 27 E aha, gilaadeu e tee danu madali denga daane hebagi tee tuu dagaholiage, gilaadeu ne danu ma olaadeu goloa hebagi, gai e ulunga ange gi alaadeu gadilaasa? Gai olaadeu haisala e haoli olaadeu ivi; e dee galemu donu denga daane hebagi nei ne hagamaatagu hogi de henua o dangada e mouli laa.
28 Egypt, koe e oha naa hogi ga dagodo madali dangada tigi tuu dagaholiage, go gilaadeu ne daia ga maakau i de gadilaasa.
29 Edom i kilaa hogi, madali ono hodooligi ma ono dagi alodahi; gilaadeu gu daakodo hogi madali dangada ne daia ga maakau i de gadilaasa, e dee galemu donu delaadeu mmahi. Gilaadeu gu daakodo hogi madali dangada tigi tuu dagaholiage gu maakau laa ma gu hulo gi lo te geelonga laa.
30 Denga dagi o ngaiho ma de gau Sidon alodahi i kilaa hogi; gilaadeu nei ne loiho hogi madali de gau maakau, teai selaadeu hagadubu, e dee galemu donu delaadeu mahi e hagamaatagu ai dangada. Gilaadeu ni dangada tigi tuu dagaholiage e danu madali dangada ne daia ga maakau i de gadilaasa; gilaadeu ne dookaa madali gilaadeu ne loiho laa gi lo te geelonga.
31 Gai Pharaoh — go ia ma dono hagabuulinga hebagi — e gidee naa gilaadeu, gai ia e maamaane naa ono lodo i hiidinga de soa ne maakau i de gadilaasa, go de Ia Aamua go Iahweh e hagadaba. 32 Au ne dugu ange ia gi hagamaatagu ina dangada e mouli, gai Pharaoh ma ono daane soa alodahi e danu naa hogi madali dangada tigi tuu dagaholiage laa, ma gilaadeu alodahi ne daa ga maakau i de gadilaasa, go de Ia Aamua go Iahweh e hagadaba.”